Visit:
కరీంనగర్‌ కార్పొరేషన్‌, నవంబర్‌ 29 : తెలంగాణలో రాబోయేది బీఆర్‌ఎస్‌ ప్రభుత్వమేనని, మళ్లీ వంద సీట్లతో కేసీఆర్‌ సీఎం కావడం ఖాయమని మాజీ మంత్రి, ఎమ్మెల్యే గంగుల కమలాకర్‌ ధీమా వ్యక్తం చేశారు. ‘రామరాజ్యం ఏర్పాటు కావాలంటే.. రాముడు వనవాసం చేయాల్సి వచ్చింది. తెలంగాణలో రామరాజ్యం కోసం ప్రస్తుతం కేసీఆర్‌ ఐదేళ్లు వనవానం చేస్తున్నట్లుగానే భావించుకుందాం’ అని పేర్కొన్నారు. దీక్షా దివస్‌ను పురస్కరించుకొని శనివారం జిల్లా కేంద్రంలోని బీఆర్‌ఎస్‌ పార్టీ కార్యాలయంలో వేడుకలు నిర్వహించారు. ఈ సందర్భంగా ఏర్పాటు చేసిన ఫొటో ఎగ్జిబిషన్‌ను ఎమ్మెల్యే పాడి కౌశిక్‌రెడ్డితో కలిసి గంగుల ప్రారంభించారు. కేసీఆర్‌ అలుపెరుగని పోరాటంతోనే తెలంగాణ సాకారమైందని గుర్తు చేశారు. రాష్ట్రంలో భూమి, గాలి, నీరు ఉన్నంత వరకు కేసీఆర్‌ పేరు మారుమోగుతూనే ఉంటుందని తెలిపారు. బీఆర్‌ఎస్‌ నామరూపాలు లేకుండా చేస్తామని కొందరు అంటున్నారని కానీ, బీఆర్‌ఎస్‌ అంటే గాలికిపోయే పార్టీ కాదని 60 లక్షల మంది క్రియాశీలక సభ్యులు ఉన్న పార్టీ అని స్పష్టం చేశారు. కేసీఆర్‌ను వెన్నుపొడిచిన వారు కాలగర్భంలో కలిసిపోయారని పేర్కొన్నారు. మళ్లీ బీఆర్‌ఎస్‌ అధికారంలోకి వస్తే దోషులు, దొంగలను పార్టీలోకి తీసుకునేది లేదని చెప్పారు. టీడీపీ నుంచి తాను గెలిచినా ఉద్యమ టైంలో ప్రజల కోరిక మేరకు పార్టీ వీడుతున్నట్టు చంద్రబాబుకు చెప్పామని గుర్తు చేశారు.
ప్రపంచంలో ఉద్యమాలు చాలా జరిగాయని, కానీ తెలంగాణ ఉద్యమం మాత్రం అతి పెద్దదన్నారు. సకల జనులు పాల్గొన్నారని గుర్తు చేశారు. తెలంగాణ తేకపోతే రాళ్లతో కొట్టి చంపండి అని కేసీఆర్‌ చెప్పారని, అహర్నిశలూ కృషిచేశారన్నారు. కానీ అప్పటి ప్రభుత్వాల నిర్భందాలతో ఇబ్బంది పెట్టిన క్రమంలో ఇలా అయితే రాష్ట్రం వచ్చే పరిస్థితి లేదని కేసీఆర్‌ దీక్షకు దిగారని గుర్తుచేశారు. 2009 నవంబర్‌ 29న ‘కేసీఆర్‌ సచ్చుడో… తెలంగాణ అచ్చుడో’ అనే నినాదంతో బయలుదేరిన క్రమంలో పోలీసులు అరెస్టు చేశారని పేర్కొన్నారు. అప్పుడే ఢిల్లీలో కదలిక మొదలైందని, ఆ తర్వాత ఎందో ఆత్మ బలిదానాల తర్వాత కేంద్ర మెడలు వంచి కేసీఆర్‌ రాష్ర్టాన్ని సాధించారని గుర్తు చేశారు. తెలంగాణ వచ్చిన తర్వాత తెలంగాణ ఎలా అభివృద్ధి జరిగిందో, కరీంనగర్‌ ఎలా అభివృద్ధి చెందిందో చూస్తున్నామన్నారు. రాబోయే రోజుల్లో పార్టీని మరింత బలోపేతం చేసి అధికారంలోకి వస్తామని చెప్పారు. ఇక్కడ మాజీ ఎమ్మెల్యే సుంకె రవిశంకర్‌, మాజీ ఎమ్మెల్సీ నారదాసు లక్ష్మణ్‌రావు, బీఆర్‌ఎస్‌ జిల్లా అధ్యక్షుడు జీవీ రామకృష్ణారావు, జడ్పీ మాజీ చైర్‌పర్సన్‌ కనుమల్ల విజయ, వివిధ కార్పొరేషన్ల మాజీ చైర్మన్లు బండ ప్రకాశ్‌, రవీందర్‌సింగ్‌, నగర బీఆర్‌ఎస్‌ అధ్యక్షుడు చల్ల హరిశంకర్‌, జిల్లా గ్రంథాలయ సంస్థ మాజీ చైర్మన్లు ఏనుగు రవీందర్‌రెడ్డి, పొన్నం అనిల్‌, రాష్ట్ర నాయకుడు వీర్ల వెంకటేశ్వర్‌రావు, బీఆర్‌ఎస్‌ మాజీ ప్రజాప్రతినిధులు, నాయకులు, కార్యకర్తలు పాల్గొన్నారు.
తెలంగాణ రాష్ర్టాన్ని సాధించిన గొప్ప వ్యక్తి కేసీఆర్‌. ఆయన పోరాటం వల్లే రాష్ట్రం సాధ్యమైంది. స్వరాష్ట్రంలో తొలి సీఎంగా కేసీఆర్‌ రాష్ర్టాన్ని అన్ని రంగాల్లో అభివృద్ధి చేశారు. తెలంగాణ అంటేనే కేసీఆర్‌. బీఆర్‌ఎస్‌ పార్టీని ఎవరూ ఏమీ చేయలేరు. కాంగ్రెస్‌ రెండేండ్ల పాలనలో ప్రభుత్వంపై తీవ్ర వ్యతిరేకత వచ్చింది. సర్పంచ్‌, స్థానిక సంస్థల ఎన్నికల్లో బీఆర్‌ఎస్‌ సత్తా ఏంటో చూపిస్తాం. బీఆర్‌ఎస్‌ అత్యధికంగా స్థానాలు గెలుచుకోవడం ఖాయం.
– హుజూరాబాద్‌ ఎమ్మెల్యే పాడి కౌశిక్‌రెడ్డి
