ప్రామిసరీ నోటు రాయండిలా..

తిమ్మాపూర్‌ రూరల్‌, జనవరి 28: ఆర్థిక అవసరాలు ప్రతి ఒక్కరికీ ఉంటాయి. కోట్ల ఆస్తి ఉన్నా అత్యవసరానికో.. మరేదైనా పనికో ప్రతి మనిషి జీవితకాలంలో అప్పుచేయకుండా ఉండలేడు. కొంత మంది మంచివారు చెప్పిన సమయానికి తిరిగి ఇస్తున్నా.. కొంత మంది మొండివారు మాత్రం రుణాన్ని ఎగబెడుతున్నారు. దీంతో అవసరానికి అప్పు ఇచ్చిన వారు నష్టపోవాల్సిన పరిస్థితి నెలకొంటున్నది. అయితే అప్పు ఇచ్చేటప్పుడు పకడ్బందీగా ప్రామిసరీ నోటు రాయించుకుంటే చట్టపరంగా రాబట్టుకోవడానికి ఆస్కారం ఉంటుంది.

‘నేను నా అక్కర నిమిత్తం అప్పుగా తీసుకున్న రూపాయలను తిరిగి కోరినప్పుడు చెల్లిస్తానని ప్రామిస్‌ చేస్తూ రాసిచ్చే పత్రమే ప్రామిసరీ నోటు’. ఎంత ఆత్మీయ సంబంధం ఉన్నప్పటికీ డబ్బుల విషయంలో జాగ్రత్తగా వ్యవహరించాలి. ఎగనామం పెడితే చట్టపరంగా వెళ్లడానికి అనువుగా ప్రామిసరీ నోటును రాసుకోవాలి. ప్రామిసరీ నోటు రాసేటప్పుడు ఈ జాగ్రత్తలు తప్పనిసరిగా పాటిస్తే.. మీ డబ్బు మీ చేతుల్లో ఉన్నట్టే..!

• అప్పు ఇచ్చేవారు, తీసుకునేవారు.. తప్పనిసరిగా ప్రామిసరీ నోటు రాసేటప్పుడు ప్రత్యక్షంగా ఉండాలి.
• రుణదాతలు, గ్రహీతలు ఇద్దరూ 18 సంవత్సరాలు నిండిన మేజర్లు అయి ఉండాలి.
• దాత, గ్రహీతలకు ఎలాంటి మానసిక రుగ్మతలు ఉండరాదు. అలాగే పత్రం రాసిన వారుకూడా మానసికంగా ఆరోగ్యవంతులుగా ఉండాలి.
• ఒక ప్రామిసరీ నోటుపై రూ. కోటి వరకు రాసుకోవడం ఉత్తమం. అంతకు మించితే మరొకటి రాసుకోవడం మంచిది. అలాగే ప్రామిసరీ నోటు 3 సంవత్సరాల కాలం మాత్రమే చెల్లు బాటు అవుతుంది. ఒకవేళ అప్పు తీసుకున్నవారు మూడుసంవ సంవ త్సరాలకు చెల్లించలేని పక్షంలో అప్పటివరకు అయిన వడ్డీ, అసలు ఎంత అవుతుందో కలిపి మొత్తం రూపాయలను మళ్లీ కొత్తగా రాసుకుంటే లీగల్‌గా ఇబ్బంది ఉండదు.
• ప్రామిసరీ నోటుపై రూపాయి రెవెన్యూ స్టాంపు తప్పనిసరిగా ఉండాలి. అది లేకపోతే ప్రామిసరీ నోటుకు విలువ ఉండదు. ఆ స్టాంపుపైన అప్పు తీసుకున్న వారి సంతకాన్ని అడ్డంగా పెట్టించాలి.( పేపర్‌, స్టాంపు రెండింటిపై వచ్చేలా సంతకం ఉండాలి)
• ప్రామిసరీ నోటుతో పాటు రసీదుపై కూడా రుణగ్రహీత సంతకం తీసుకోవాలి.
• అప్పు తీసుకున్నవారికి జామీనుగా ఒకరు తప్పకుండా ఉండాలి. ఇద్దరు సాక్షులు కూడా కంపల్సరీ.
• అలాగే ఫలానా సమయానికి లేదా, రుణదాత అడిగినప్పుడు లేదా, దాత సూచించిన వారికి ఇస్తానని హామీ ఇస్తున్నాను అని రాయించుకోవాలి.
• ప్రామిసరీ నోటు మీద అప్పు ఇచ్చిన మొత్తం రూపాయలు, ఇచ్చిన తేదీ లేకుండా సంతకం తీసుకుంటే చట్టరీత్యా నేరం. ఈ జాగ్రత్తలు పాటిస్తే మీ డబ్బు మీ చేతిలో ఉన్నట్లే..