Gauravelli Project | ఎల్-21 మైనర్ కెనాల్ రద్దు చేయాలని రైతుల ఆందోళన.. పురుగల మందు డబ్బాలతో వాటర్ ట్యాంక్ ఎక్కిన సుందరగిరి రైతులు

గౌరవెల్లి ప్రాజెక్టుకు చెందిన ఎల్-21 మైనర్ కెనాల్‌ను రద్దు చేయాలని డిమాండ్ చేస్తూ సుందరగిరి గ్రామానికి చెందిన బాధిత రైతులు సోమవారం ఆందోళనకు దిగారు.

ఇదే రైతుల భూముల నుంచి డి-4, ఆర్-20 కాలువలకు సంబంధించి అధికారులు ఇప్పటికే సర్వేలు నిర్వహించారని, ఆ రెండు కాలువల విషయంలో రైతులు సహకరించారని పేర్కొన్నారు. అయితే ఎల్-21 మైనర్ కెనాల్ వల్ల తమ భూములకు తీవ్ర నష్టం వాటిల్లే అవకాశం ఉందని, ఈ విషయాన్ని పలుమార్లు అధికారుల దృష్టికి తీసుకెళ్లినా సమస్య పరిష్కారం కాలేదని ఆవేదన వ్యక్తం చేశారు. తమకు న్యాయం జరిగేంత వరకు వాటర్ ట్యాంక్‌ నుంచి కిందికి దిగేది లేదని రైతులు స్పష్టం చేశారు. సమస్య పరిష్కారం కాకపోతే తీవ్ర నిర్ణయం తీసుకుంటామని హెచ్చరించారు.

అధికారుల హామీతో ఆందోళన విరమణ
రైతులు వాటర్ ట్యాంక్ ఎక్కి ఆందోళనకు దిగిన విషయం తెలుసుకున్న తహసీల్దార్ కోడం కనకయ్య, ఎస్సై జగదీశ్వర్, స్థానిక సర్పంచ్ జంగ శిరీష, సింగిల్ విండో మాజీ చైర్మన్ జంగా వెంకటరమణారెడ్డి అక్కడికి చేరుకుని రైతులతో మాట్లాడారు. ఆందోళన విరమించాలని కోరారు. రైతుల సమస్యను కలెక్టర్ దృష్టికి తీసుకెళ్లి 31 మంది రైతులను కలెక్టర్ వద్దకు తీసుకెళ్లి న్యాయం జరిగేలా కృషి చేస్తానని తహసీల్దార్ హామీ ఇచ్చారు. దీంతో రైతులు ఆందోళన విరమించి వాటర్ ట్యాంక్‌ నుంచి కిందికి దిగారు. ఎల్-21 మైనర్ కెనాల్ విషయంలో ప్రభుత్వం, అధికారులు వెంటనే స్పందించి తమ భూములకు నష్టం కలగకుండా చర్యలు తీసుకోవాలని రైతులు కోరారు. ఈ కార్యక్రమంలో బాధిత రైతులు జీల సంపత్, జీల ఐలయ్య, జీల రవీందర్, జీల ధనేందర్, జీల మల్లేశం, జీల కుమారస్వామి, మంతెన బాబు, మంతెన మహేందర్ తదితరులు పాల్గొన్నారు.