వాషింగ్టన్: అబార్షన్ డ్రగ్ మిఫిప్రిస్టోన్(Mifepristone) అందరికీ అందుబాటులో ఉండేలా ఇవాళ అమెరికా సుప్రీంకోర్టు తీర్పును వెలువరించింది. మరోవైపు ఆ డ్రగ్ బ్యాన్ గురించి లీగల్ కేసు కొనసాగనున్నది. మిఫిప్రిస్టోన్ గర్భనిరోధక మాత్రలపై ఇటీవల టెక్సాస్ కోర్టు విధించిన ఆంక్షలను సుప్రీంకోర్టు తోసిపుచ్చింది. ఆ ఆర్డర్పై స్టే విధించింది. మిఫిప్రిస్టోన్ ఔషధాన్ని బ్యాన్ చేయాలని టెక్సాస్ కోర్టు ఇటీవల ఓ సంచలన తీర్పు ఇచ్చిన విషయం తెలిసిందే.
మరో వైపు వాషింగ్టన్ కోర్టు మాత్రం ఆ అబార్షన్ పిల్ కనీసం 12 రాష్ట్రాల్లో అందుబాటులో ఉండేలా చర్యలను తీసుకోవాలని ఇటీవల ఆదేశించింది. దీంతో గర్భనిరోధక మాత్రలపై అమెరికాలో సందిగ్ధత నెలకొన్నది. ఈ నేపథ్యంలో అమెరికా సుప్రీంకోర్టు..మిఫిప్రిస్టోన్ గురించి కీలక తీర్పును వెలువరించింది.
అమెరికాలో 2020లో సుమారు 10 లక్షల మంది మహిళల వరకు అబార్షన్ చేయించుకున్నారు. గట్మాచర్ ఇన్స్టిట్యూట్ ప్రకారం దాంట్లో 53 శాతం మంది మిఫిప్రిస్టాన్ పిల్స్తోనే గర్భాన్ని తొలిగించుకున్నారు. ఈ మాత్రల వినియోగం 2008లో 17 శాతం ఉండేది. 2017 నాటికి ఆ మాత్రల వాడకం 39 శాతానికి పెరిగింది.