Diabetes | ఇకపై శ్వాస ద్వారా మధుమేహం నిర్ధారణ!.. పరీక్ష ఖర్చు తక్కువ, సమయం ఆదా!

మధుమేహాన్ని శ్వాస వదిలినంత సునాయాసంగా నిర్ధారించే రోజులు రాబోతున్నాయి. శ్వాసలోని ఎసిటోన్‌ను గుర్తించే సెన్సర్‌ను పరిశోధకులు అభివృద్ధి చేయడంతో ఇది సాధ్యం కాబోతున్నది. దీని ద్వారా మధుమేహం, ప్రీడయాబెటిస్‌ను వేగంగా, చౌకగా గుర్తించవచ్చు.

• కొత్త విధానాన్ని అభివృద్ధి చేసిన పెన్సిల్వేనియా స్టేట్‌ వర్సిటీ పరిశోధకులు

Diabetes | వాషింగ్టన్‌: మధుమేహాన్ని శ్వాస వదిలినంత సునాయాసంగా నిర్ధారించే రోజులు రాబోతున్నాయి. శ్వాసలోని ఎసిటోన్‌ను గుర్తించే సెన్సర్‌ను పరిశోధకులు అభివృద్ధి చేయడంతో ఇది సాధ్యం కాబోతున్నది. దీని ద్వారా మధుమేహం, ప్రీడయాబెటిస్‌ను వేగంగా, చౌకగా గుర్తించవచ్చు. పెన్సిల్వేనియా స్టేట్‌ యూనవర్సిటీ పరిశోధకులు ఈ సెన్సర్‌ను అభివృద్ధి చేశారు. ‘కెమికల్‌ ఇంజినీరింగ్‌’ జర్నల్‌లో ఈ పరిశోధన ఫలితాలను ప్రచురించారు. ప్రస్తుత పద్ధతుల్లో డయాబెటిస్‌, ప్రీడయాబెటిస్‌ను గుర్తించాలంటే డాక్టర్‌ను సంప్రదించవలసి ఉంటుంది, ల్యాబ్‌ వర్క్‌ జరగవలసి ఉంటుంది. వీటికి డబ్బు, సమయం అధికంగా అవసరమవుతాయి.

రక్తం లేదా చెమటలోని గ్లూకోజ్‌ను ఉపయోగించి ఈ పరీక్షను చేస్తారు. కరిగే కొవ్వుకు ఉప ఉత్పత్తిగా ఎసిటోన్‌ ప్రతి ఒక్కరి శ్వాసలోనూ ఉంటుంది. అయితే, ఎసిటోన్‌ లెవెల్స్‌ 1.8 పార్ట్స్‌ పెర్‌ మిలియన్‌ కన్నా ఎక్కువగా ఉంటే, మధుమేహం ఉన్నట్లు నిర్ధారణ చేయవచ్చు. ఈ పరిశోధనకు నేతృత్వం వహించిన హువాన్యు ‘లారీ’ చెంగ్‌ మాట్లాడుతూ, చెమటలోని గ్లూకోజ్‌ను గుర్తించే సెన్సర్లు ఉన్నప్పటికీ, వ్యాయామం, రసాయనాలు లేదా వేడి గాలి, ఆవిరి స్నానానికి ఉపయోగించే గది అవసరమవుతాయన్నారు.

ఈ పద్ధతి అన్నివేళలా ఆచరణ సాధ్యమైనది కాదన్నారు. తాము అభివృద్ధి చేసిన విధానంలో, ఓ వ్యక్తి శ్వాసను ఓ సంచిలోకి వదిలితే, ఆ సంచిలో తాము తయారు చేసిన సెన్సర్‌ను ఉంచాలని చెప్పారు. కొన్ని నిమిషాల తర్వాత ఫలితాలు వెల్లడవుతాయని తెలిపారు. నేరుగా ముక్కు క్రింద కానీ, మాస్క్‌ లోపల కానీ పని చేసే సరికొత్త సెన్సర్‌ను అభివృద్ధి చేయడం కోసం ప్రయత్నిస్తున్నట్లు చెప్పారు.