Russia | ఆ దేశాల నుంచి ఆయుధాలు కొనే యోచనలో రష్యా.. వాణిజ్య నౌకల్లో రవాణా చేస్తున్నారా?

ఉక్రెయిన్‌తో యుద్ధం మొదలైన తర్వాత పాశ్చాత్య దేశాలన్నీ రష్యాపై ఆంక్షలు విధించాయి. అదే సమయంలో ఉక్రెయిన్‌కు అవన్నీ మద్దతుగా నిలిచాయి. ముఖ్యంగా అగ్రరాజ్యం అమెరికా భారీగా ఆయుధాలు, ఆర్థిక సహకారం అందించడం మొదలు పెట్టింది. ఈ క్రమంలో యుద్ధాన్ని కొనసాగించేందుకు రష్యా చాలా కష్టపడుతోందని అమెరికా వర్గాలు చెప్తున్నాయి.

తమ వద్ద ఆయుధాలు అయిపోవడంతో విదేశాల నుంచి కొనుగోలు చేసేందుకు రష్యా ప్రయత్నిస్తోందని, దీనికోసం వాణిజ్య నౌకలను ఉపయోగించుకుంటోందని కొన్ని వార్తలు వినిపిస్తున్నాయి. సిరియాలో రష్యాకు చెందిన నౌకాశ్రయం నుంచి ఇటీవలే ఒక వాణిజ్య నౌక రష్యా చేరుకుంది. దీనిలో మిలటరీ ఆయుధాలే ఉన్నాయని పలు ఆరోపణలు వస్తున్నాయి.

టర్కీ మీదుగా ఈ నౌకలు వచ్చినప్పటికీ వాటిని ఆ దేశం అడ్డుకోలేదు. రష్యా-ఉక్రెయిన్ యుద్ధం మొదలవగానే.. తమ జలాల మీదుగా మిలటరీ నౌకలు వెళ్లకుండా టర్కీ ఆంక్షలు విధించింది. అయితే వాణిజ్య నౌకలకు ఎటువంటి అడ్డంకులు కల్పించలేదు. దీన్ని రష్యా క్యాష్ చేసుకొని వాణిజ్య నౌకల్లో ఆయుధాలు తెచ్చుకుంటోందని పాశ్చాత్య దేశాలు వాదిస్తున్నాయి.

అయితే ఈ విషయంపై రష్యా నుంచి ఎటువంటి వివరణ రాలేదు. ఇటీవల అమెరికా అధికారులు మాట్లాడుతూ.. ఇరాన్ నుంచి ఆయుధాలు కొనేందుకు రష్యా ప్రయత్నిస్తోందని చెప్పారు. రష్యా వద్ద ఉన్న ఆయుధాల నిల్వలు కరిగిపోతున్నాయని చెప్పడానికి ఇదే నిదర్శనమని వాళ్లు అంటున్నారు.

అయితే సిరియా నుంచి ఆయుధాలు తెచ్చుకోవడంతోపాటు ఇరాన్, ఉత్తర కొరియా వంటి దేశాల వద్ద నుంచి మిలటరీ ఆయుధాలు కొనుగోలు చేసేందుకు రష్యా ప్లాన్ చేస్తోందట. ఇటీవల రష్యా ఆక్రమించిన డోనెస్క్, లుషాంక్ ప్రాంతాలను స్వతంత్ర దేశాలుగా ఉత్తర కొరియా గుర్తించిన సంగతి తెలిసిందే.