Amin Ul Haq : 20 ఏండ్ల తర్వాత ఆఫ్ఘన్‌ చేరాడు.. ఎవరంటే..?

Amin Ul Haq : ఒసామా బిన్‌ లాడెన్‌ సన్నిహితుడు, ప్రముఖ ఆయుధ సరఫరాదారు అయిన అమిన్-ఉల్-హక్ ఆఫ్ఘనిస్తాన్‌కు తిరిగి వచ్చారు. దాదాపు 20 సంవత్సరాలపాటు పాకిస్తాన్‌లో జీవితం గడిపి అమిన్‌ ఇవాళే ఆఫ్ఘన్‌ చేరుకున్నాడు. విలాసవంతమైన కారులో ఇంటికి వచ్చిన...

August 31, 2021 / 04:19 PM IST

Amin Ul Haq : 20 ఏండ్ల తర్వాత ఆఫ్ఘన్‌ చేరాడు.. ఎవరంటే..?

పెషావర్‌ : ఒసామా బిన్‌ లాడెన్‌ సన్నిహితుడు, ప్రముఖ ఆయుధ సరఫరాదారు అయిన అమిన్-ఉల్-హక్ (Amin Ul Haq) ఆఫ్ఘనిస్తాన్‌కు తిరిగి వచ్చారు. దాదాపు 20 సంవత్సరాలపాటు పాకిస్తాన్‌లో జీవితం గడిపి అమిన్‌ ఇవాళే ఆఫ్ఘన్‌ చేరుకున్నాడు. విలాసవంతమైన కారులో ఇంటికి వచ్చిన అమిన్‌కు తాలిబాన్‌తోపాటు స్థానిక మద్దతుదారులు ఘనంగా స్వాగతం పలికారు.

ఆఫ్ఘనిస్తాన్‌ను తాలిబాన్‌ ఆక్రమించిన తర్వాత భయంకరమైన ఉగ్రవాదులు స్వదేశానికి తిరిగి రావడం ప్రారంభించారు. వీరిలో ముఖ్యంగా ఆయుధాల సరఫరాదారు అమిన్-ఉల్-హక్ ఉన్నారు. అమెరికా దళాలు వెళ్లిపోవడానికి ఒక రోజు ముందు అమిన్ ఆఫ్ఘనిస్తాన్‌కు తిరిగి వచ్చాడు. 20 ఏండ్ల తరువాత ఆఫ్ఘనిస్తాన్‌లోని నాంగర్‌హార్ ప్రావిన్స్‌లోని తన ఇంటికి తిరిగి వచ్చాడు. బిన్ లాడెన్ 9/11 దాడుల తర్వాత తొరాబోరా గుహల్లో దాక్కున్నాడు. ఆ సమయంలో అమిన్ కూడా అతనితో ఉన్నాడు. అనంతరం పాకిస్తాన్‌లో తలదాచుకున్నాడు. విలాసవంతమైన కారులో నంగర్‌హార్‌కు అమిన్‌ తిరిగి రాగానే అతడి మద్దతుదారులు ఘనంగా స్వాగతం పలికారు. కారులో నుంచే మద్దతుదారుల శుభాకాంక్షలు స్వీకరించాడు. కొంతమంది తాలిబాన్లు కూడా అమిన్ కాన్వాయ్‌లో చేరినట్లు సమాచారం.

మీడియా నివేదికల ప్రకారం, అమిన్‌ ఉల్‌ హక్‌ రాకతో అల్ ఖైదా మరోసారి శక్తివంతంగా తయారవొచ్చు. అమిన్ ఇంటికి వచ్చిన వీడియో సోషల్ మీడియాలో వైరల్ అవుతున్నది. తెల్లటి లగ్జరీ కారులో వచ్చిన అమిన్‌.. మద్దతుదారుల మధ్యకు రాగానే కారు విండోను కొద్దిగా కిందికి దింపి చేతులు ఊపాడు. బిన్‌ లాడెన్‌ అల్‌ ఖైదాకు ఆయుధాలను సరఫరా చేయడంలో అమిన్‌ది ప్రముఖ పాత్ర. 2008 పాకిస్తాన్‌లో అరెస్ట్‌ అయినప్పటికీ.. నేరారోపణలను నిరూపించే ఆధారాలు లేకపోవడంతో కోర్డు విడిచిపెట్టింది.