SFJ | ఆపరేషన్‌ బ్లూ స్టార్‌కు 40 ఏండ్లు.. భారత ఎంబసీ ఆఫీసుల లాక్‌డౌన్‌కు ఎస్‌ఎఫ్‌జే పిలుపు

పంజాబ్‌లోని స్వర్ణ దేవాలయంపై ఆపరేషన్‌ బ్లూ స్టార్‌ జరిగి 40 ఏండ్లు పూర్తయిన సందర్భంగా కెనడాలోని భారత రాయబార కార్యాలయాల లాక్‌డౌన్‌కు సిక్కు వేర్పాటువాదులు పిలుపునిచ్చారు.

• ‘40 ఏండ్ల ఆపరేషన్‌ బ్లూ స్టార్‌’కు ఎస్‌ఎఫ్‌జే నిరసన

SFJ | టొరంటో, జూన్‌ 2: పంజాబ్‌లోని స్వర్ణ దేవాలయంపై ఆపరేషన్‌ బ్లూ స్టార్‌ జరిగి 40 ఏండ్లు పూర్తయిన సందర్భంగా కెనడాలోని భారత రాయబార కార్యాలయాల లాక్‌డౌన్‌కు సిక్కు వేర్పాటువాదులు పిలుపునిచ్చారు. ఒట్టావాలోని భారత హైకమిషన్‌, వాంకోవర్‌, టొరంటోలోని దౌత్య కార్యాయాలను ఈ నెల 6న లాక్‌డౌన్‌ చేయాలని సిక్స్‌ ఫర్‌ జస్టిస్‌ (ఎస్‌ఎఫ్‌జే) జనరల్‌ కౌన్సెల్‌ గురుపత్వంత్‌ పన్నూన్‌ పిలుపునిచ్చారు. ఈ మేరకు ఇప్పటికే ముందస్తు నోటీసు ఇచ్చినట్టు పేర్కొన్నారు.

ఖలీస్థానీ వేర్పాటువాదాన్ని అణచి వేసేందుకు 1984 జూన్‌ ఆరో తేదీన అమృత్‌సర్‌లోని స్వర్ణ దేవాలయం కంప్లెక్స్‌పై భారత ప్రభుత్వం ఆపరేషన్‌ బ్లూస్టార్‌ అనే పేరుతో సైనిక చర్య నిర్వహించినట్టు ఆయన గుర్తుచేశారు. అలాగే, అదే ఏడాది నవంబర్‌లో అప్పటి ప్రధానమంత్రి ఇందిరాగాంధీ హత్య అనంతరం దేశవ్యాప్తంగా జరిగిన సిక్కువ్యతిరేక అల్లర్లకు కూడా 40 ఏండ్లు నిండాయని తెలిపారు. నాటి సిక్కు మారణహోమాన్ని అధికారికంగా గుర్తించాలని న్యూ డెమెక్రటిక్‌ పార్టీ (ఎన్‌డీపీ) కోరింది.