పిజ్జా తిన‌డం అంటే ఇష్ట‌మా? ఈ విష‌యం తెలిస్తే అస్స‌లు ముట్టుకోరు !!

October 29, 2021 / 10:48 PM IST

pizza | మీకు పిజ్జా అంటే ఇష్ట‌మా !! పిజ్జాలు, బ‌ర్గ‌ర్లు లొట్ట‌లేసుకుని మ‌రి తింటారా !! అయితే మీకో షాకింగ్ న్యూస్‌.. ఎందుకంటే మీరు తినే పిజ్జాలు ఆరోగ్యానికి అంత మంచిది కాదు.. ఆ చెప్పారులే.. ఆ మాకు తెలుసులే.. ఎంత‌మంది చెప్ప‌లేదు అని అనుకుంటున్నారా? కానీ ఇప్పుడు అంత‌కంటే డేంజ‌ర‌స్ విష‌యం ఒక‌టి బ‌య‌ట‌ప‌డింది. డామినోస్‌, పిజ్జాహాట్‌ వంటి రెస్టారెంట్లు పిజ్జాల రుచి కోసం బ‌ట్ట‌లు ఉతికే డిట‌ర్జెంట్ల‌ను త‌యారు చేసేందుకు వాడే ర‌సాయ‌నాల‌ను ఉప‌యోగిస్తున్నారంట‌.

సబ్బులు, సర్ఫులు, రబ్బరు గ్లౌజుల తయారీలో వాడే రసాయనాలను(ఫ్తాలేట్లు) మెక్‌ డొనాల్డ్స్‌, బర్గర్‌ కింగ్‌, పిజ్జా హట్‌, డామినోస్‌ లాంటి ప్రఖ్యాత సంస్థల్లో పిజ్జాలు, బర్గర్లు తయారు చేయడానికి వాడుతున్నట్టు తేలింది. అమెరికాకు చెందిన జార్జ్‌ వాషింగ్టన్‌, బోస్టన్‌, హార్వర్డ్‌ యూనివర్సిటీలు, టెక్సస్‌లోని సౌత్‌వెస్ట్‌ రిసెర్చ్‌ ఇన్‌స్టిట్యూట్‌ శాస్త్రవేత్తలు నిర్వహించిన అధ్యయనంలో ఈ విషయం వెల్లడైంది. అధ్యయనం వివరాలను ఎక్స్‌పోజర్‌ సైన్స్‌ అండ్‌ ఎన్విరాన్‌మెంటల్‌ ఎపిడమాలజీ వీక్లీ జర్నల్‌లో ప్రచురించారు. అమెరికాలో ఒక నగరంలో ఉన్న ఔట్‌లెట్‌లలో 64 నమూనాలు తీసుకొని పరీక్షించగా అందులో 80% ఆహార పదార్థాల్లో ఫ్తాలేట్లు ఉన్నట్టు తేలింది. ప్లాస్టిక్‌ మృదువుగా ఉండటానికి ఫ్తాలేట్లను వాడతారు. ఇవి ఆస్తమా, మెదడు, కిడ్నీ సంబంధిత వ్యాధులను కలుగజేస్తాయి. మానవ ప్రత్యుత్పత్తి వ్యవస్థపై దుష్ప్రభావం చూపిస్తాయి. ఈ అధ్యయనం ఫలితాలు తీవ్ర ఆందోళనకరంగా ఉన్న నేపథ్యంలో దీనిపై సమీక్షిస్తామని ఎఫ్‌డీఏ ప్రకటించింది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి