Air Canada | వాంతి ఉన్న సీట్లలో కూర్చొనేందుకు నిరాకరించిన మహిళలు.. బలవంతంగా విమానం నుంచి దించివేత

Air Canada | వాంతి ఆనవాళ్లు ఉండటంతో పాటు బాగా చెడు వాసన వస్తున్న సీట్లలో కూర్చొనేందుకు ఇద్దరు మహిళా ప్రయాణికులు నిరాకరించారు. ఈ నేపథ్యంలో వారిని బలవంతంగా విమానం నుంచి దించివేశారు.

ఒట్టావా: వాంతి ఆనవాళ్లు ఉండటంతో పాటు బాగా చెడు వాసన వస్తున్న సీట్లలో కూర్చొనేందుకు ఇద్దరు మహిళా ప్రయాణికులు నిరాకరించారు. ఈ నేపథ్యంలో వారిని బలవంతంగా విమానం నుంచి దించివేశారు. కెనడా దేశంలో ఈ సంఘటన జరిగింది. సీటెల్ నుంచి మాంట్రియల్‌కు ప్రయాణించేందుకు ఇద్దరు మహిళలు ఎయిర్‌ కెనడా (Air Canada) విమానం ఎక్కారు. అయితే అంతకు ముందు ఆ విమానంలో ప్రయాణించిన వ్యక్తి వారి సీట్లలో వాంతి చేసుకోగా సిబ్బంది సరిగా శుభ్రం చేయలేదు. దీంతో పాటు చెడు వాసన రావడాన్ని మహిళా ప్రయాణికులు గమనించారు. ఈ నేపథ్యంలో తమకు వేరే సీట్లు కేటాయించాలని విమాన సిబ్బందిని కోరారు.

కాగా, విమానం ప్రయాణికులతో నిండిపోవడంతో ఆ మహిళా ప్రయాణికుల అభ్యర్థనను విమాన సిబ్బంది తిరస్కరించారు. తాము ఐదు గంటలు ప్రయాణించాల్సి ఉందని వారు రిక్వెస్ట్‌ చేసినప్పటికీ పట్టించుకోలేదు. ఇంతలో పైలట్‌ జోక్యం చేసుకున్నాడు. వాంతి ఆనవాళ్లు ఉన్న ఆ సీట్లలో ప్రయాణించని పక్షంలో విమానం నుంచి దిగిపోవాలని చెప్పాడు. అలా చేయని పక్షంలో వారిద్దరిని నో ఫ్లై లిస్ట్‌లో చేర్చుతామని హెచ్చరించాడు. దీంతో సిబ్బంది ఆ ఇద్దరు మహిళలను విమానం నుంచి కిందకు దించేశారు.

మరోవైపు ఆ ఇద్దరు మహిళల సీట్ల పక్కన సీటులో ప్రయాణించిన మరో మహిళా ప్రయాణికురాలు సుసాన్ బెన్సన్ ఈ విషయాన్ని ఫేస్‌బుక్‌లో పోస్ట్‌ చేశారు. వాంతి ఉన్న సీట్లలో ప్రయాణించాలని లేని పక్షంలో దిగిపోవాలని ఇద్దరు మహిళా ప్రయాణికులను హెచ్చరించారని, వారిని బలవంతంగా విమానం నుంచి దించివేశారని అందులో ఆరోపించారు. ఎయిర్‌ కెనడా విమాన పైలట్‌ తీరును విమర్శించారు.

కాగా, ఈ పోస్ట్‌ సోషల్‌ మీడియాలో వైరల్‌ అయ్యింది. ఈ నేపథ్యంలో ఎయిర్‌ కెనడా సంస్థ స్పందించింది. ఈ సంఘటనపై దర్యాప్తు జరిపి తగిన చర్యలు తీసుకుంటామని పేర్కొంది. తమ సిబ్బంది నుంచి తగిన మర్యాద అందుకోని ఆ ప్రయాణికుల నుంచి క్షమాపణలు కోరుతామని వెల్లడించింది.