వర్షం.. బండి చక్రం భద్రం.!

వరుసగా కురుస్తున్న వర్షాలతో వాహనదారులు ఇబ్బందులు ఎదుర్కొంటున్నారు. రోడ్లపై వాహనాలు అదుపుతప్పి పడిపోతున్నారు. దీంతో వెనుకలా వచ్చే వాహనాలు సైతం ప్రమాదానికి గురవుతున్నాయి.

• ప్రతి 5 వేల కిలోమీటర్లకు ఒకసారి వీల్‌ చెకప్‌
• వాహనదారులకు టైర్లపై అవగాహన తప్పనిసరి
• వానకాలంలో గ్రిప్‌లేని టైర్లతో ముప్పు
• ప్రతి 50 వేల కిలోమీటర్లకు కొత్త టైర్‌ అమర్చాల్సిందే
• నాణ్యతలేని టైర్లపై బబుల్స్‌ మాదిరిగా ఎయిర్‌జాం

సిటీబ్యూరో, సెప్టెంబర్‌ 2 ( నమస్తే తెలంగాణ ): వరుసగా కురుస్తున్న వర్షాలతో వాహనదారులు ఇబ్బందులు ఎదుర్కొంటున్నారు. రోడ్లపై వాహనాలు అదుపుతప్పి పడిపోతున్నారు. దీంతో వెనుకలా వచ్చే వాహనాలు సైతం ప్రమాదానికి గురవుతున్నాయి. కొన్ని ఘటనల్లో ప్రాణాలు కోల్పోతున్నారు. వానకాలంలో డ్రైవింగ్‌ చేయడం, వాహన మెయింటెనెన్స్‌ చాలా కీలకమని మెకానికల్‌ ఎక్స్‌పర్ట్స్‌ చెబుతున్నారు. టైరులో గాలి ఎంత ఉండాలి? ఎయిర్‌ ప్రజర్‌ లోపం ఉంటే ఏమవుతుంది? టైర్ల నాణ్యత ఎలా తెలుసుకోవాలి? తదితర వాటిపై వాహనదారులకు తక్కువ అవగాహన ఉంటుంది. ఫలితంగా వాహనం కండిషన్‌ ఎలా ఉన్నప్పటికీ డ్రైవ్‌ చేస్తూ ప్రాణాల మీదకు తెచ్చుకుంటున్నారు. ముఖ్యంగా వర్షాకాలంలో వాహన టైర్లు మంచి కండిషన్‌లో లేకపోతే చాలా ప్రమాదకరమని నిపుణులు హెచ్చరిస్తున్నారు.

టైర్ల గ్రిప్‌ చెక్‌ చేసుకోవాలి
– నాయుడు, మారుతీ షోరూం
టైర్ల పనితీరు సరిగా లేకపోతే స్కిడ్‌ అయ్యే ప్రమాదం అధికంగా ఉంటుంది. సడెన్‌ బ్రేకులు వేసినా ప్రమాదమే. అందుకే టైర్ల పనితీరు బాగుండేలా చూసుకోవాలి. కారు మోడల్‌ను బట్టీ టైర్లు.. వాటి పరిమాణాన్ని బట్టీ ఎయిర్‌ ఫిలప్‌ చేయాల్సి ఉంటుంది. సాధారణంగా 32 పాయింట్లతో గాలి నింపుతే సరిపోతుంది. ఒక్కో వెహికిల్‌లో ఒకటి రెండు పాయింట్లు ఎక్కువ తక్కువ ఉంటాయి. కారును ఎక్కువగా వినియోగించని వాళ్లు కనీసం పది నుంచి 15 నిమిషాలు కారును స్టార్ట్‌ చేసి ఉంచాలి. దీనివల్ల టైర్లు డ్యామేజీ అవకుండా ఉంటాయి. కారు బ్రేకుల పనితీరు తగ్గితే వెంటనే మెకానిక్‌కు చూపించాలి. వర్షంకాలంలో బ్రేకులు త్వరగా క్షీణిస్తాయి.

చక్రాలు సాఫీగా తిరగాల్సిందే..!

• ఏ వాహనానికైనా చక్రాలు అత్యంత ముఖ్యం. బండి కండిషన్‌ ఎలా ఉన్నా కొంతదూరం డ్రైవ్‌ చేసుకుంటూ వెళ్లాలంటే టైర్లు ఉండాల్సిందే. అవే లేకుండా ఏమీ చేయలేం. అంతటి ప్రాధాన్యతగల చక్రాలపై వాహనదారులకు అవగాహన అత్యంత అవసరమని మెకానిక్‌ ఎక్స్‌పర్ట్స్‌ చెబుతున్నారు.
• ముఖ్యంగా టైరు నాణ్యతను ఎప్పటికప్పుడు పరిశీలించుకోవాలి. చాలా మంది టైర్లు గ్రిప్‌ను కోల్పోతున్నా నిర్లక్ష్యంతో వాహనాన్ని అలాగే నడుపుతుంటారు. ఇది చాలా ప్రమాదకరం. ప్రమాదాలకు అధిక కారణం టైర్లు బాగులేకపోవడమే.
• కార్ల టైర్లల్లో సరిపడా గాలి ఉండేలా చూసుకోవాలి. టైరు పరిణామాన్ని బట్టీ గాలి నింపుతారు. 14 ఇంచుల టైరులో 29, 15 ఇంచుల టైరులో 30, 16, 36 ఎయిర్‌ పాయింట్లుతో గాలి ఫిల్‌ చేయించుకోవాలి.
• కారును ఎక్కువగా వినియోగించకపోతే టైర్లు హార్డుగా మారే ప్రమాదం ఉంది. ఆ సమయంలో అధిక వేగంతో ప్రయాణం చేసినప్పుడు టైరు కదలికల్లో మార్పు వస్తుంది. రోడ్డుపై మేకులు, బండలు ఉన్నప్పుడు లేదా బ్రేకులు వేయడానికి ప్రయత్నించిన సమయంలో ఒక్కసారిగా కారు టైరు బ్లాస్ట్‌ అయ్యే ప్రమాదం ఉంది.
• వాహనదారులు ఇష్టారీతిన డ్రైవ్‌ చేయడం కూడా ప్రమాదమే. ముఖ్యంగా సడెన్‌ బ్రేకులు ఎక్కువసార్లు వేయడం, స్పోర్ట్స్‌ వాహనాల మాదిరిగా వీల్స్‌ ను ఎక్కువ సార్లు అటు ఇటూ తిప్పడం కూడా టైర్‌ నాణ్యతపై ప్రభావం చూపుతుంది. నెమ్మదగా టైర్‌ గ్రిప్స్‌ బలాన్ని కోల్పోతాయి.
• ప్రతి 5 వేల కిలో మీటర్లకు ఒక్కసారి తప్పనిసరిగా వీల్‌ బ్యాలెన్స్‌ చేక్‌ చేసుకోవాలి. టైర్లలో ఎయిర్‌ కండిషన్‌ చూసుకోవాలి.
• 40 వేల కిలో మీటర్లను పూర్తి చేసుకున్న కార్లు తప్పనిసరిగా కొత్త టైర్లను అమర్చుకోవాలి.
• టైర్లను కొనుగోలు చేసే సమయంలో నూతన తేదీల తయారీనే ఎంచుకోవాలి. ఉదాహరణకు 2019 మ్యానుఫక్చరింగ్‌ టైరును ఈ ఏడాదిలో కొనుగోలు చేయడం మంచిది కాదని ఎక్స్‌పర్ట్స్‌ చెబుతున్నారు. తక్కువ ధరకు వస్తుందని కాల పరిమితితో సంబంధం లేకుండా కొనుగోలు చేసి ప్రమాదాల బారిన పడుతున్నారు.
• టైరులో గాలి చెక్‌ చేసుకోవాలి. కారును ముందుకు వెనుక్కి తిప్పడం వలన టైరులోని గాలిని తెలుసుకునే వీలుంది. టైర్‌లో తక్కువ గాలి ఉంటే కారులోని ఇంజిన్‌పై ఒత్తిడి పడుతుంది. ఇది కారు మైలేజీ సమస్యలకు కారణమవుతుంది. టైర్లు త్వరగా అరిగిపోతాయి.
• హ్యాండ్‌ బ్రేక్‌ను తీసి ఉంచడం వల్ల కారు భూమిపై సరిగ్గా పొంది టైర్లు అనుకూలంగా ఉంటాయి. దీంతో టైర్లపై సమానంగా భారం పడుతుంది. లేదంటే టైర్లు హార్డ్‌గా మారతాయి.
• టైర్లు సక్రమంగా లేకపోయినా ఒక్కోసారి బ్రేకులు పడవు. అందుకే టైర్ల గ్రిప్‌లపై కూడా దృష్టి సారించాలి. టైరుపై 2 ఎంఎం ట్రేడ్‌ ఉండాలని మెకానిక్‌లు సూచిస్తున్నారు.