నొక్కి పట్టి.. కన్‌ఫ్యూజ్‌ చేసి..!

• ఏటీఎం మిషన్లను పరేషాన్‌ చేస్తున్న హర్యానా ముఠా
• ఎర్రర్‌ పేరుతో బ్యాంక్‌కు టోకరా.. సెక్యూరిటీ లేని ఏటీఎంలే టార్గెట్‌
• ముఠాను పట్టుకున్న హైదరాబాద్‌ పోలీసులు

దొంగలు తెలివిమీరారు.. ఏటీఎం
మిషన్‌నే కన్‌ప్యూజ్‌ చేస్తున్నారు. సాంకేతిక సమస్య సృష్టించి డబ్బులు నొక్కేస్తున్నారు. కాని ట్రాన్సాక్షన్‌ ఫెయిల్‌ అని రశీదు రావడంతో పాటు స్క్రీన్‌పై చూపుతుంది. దీన్ని ఆసరాగా చేసుకుని తమకు డబ్బులు రాలేవని బ్యాంకు నుంచి మరల డబ్బులు నొక్కేస్తున్నారు. హర్యానాకు చెందిన ఓ ముఠా రెండేళ్లుగా ఈ తరహా మోసాలకు పాల్పడుతూ లక్షలాది రూపాయలను బ్యాంక్‌ల నుంచి దర్జాగా కొట్టేస్తుంది. ఓ బ్యాంక్‌ సిబ్బందికి వచ్చిన అనుమానంతో ముఠా భాగోతం బయటపడింది. దీనికి సంబంధించిన వివరాలను హైదరాబాద్‌ పోలీస్‌ కమిషనర్‌ కార్యాలయంలో
సీపీ అంజనీకుమార్‌ వెల్లడించారు.

• సిటీబ్యూరో, నవంబర్‌ 16(నమస్తే తెలంగాణ):హైదరాబాద్‌ హుస్సేనీఆలం ప్రాంతానికి చెందిన ఎస్‌బీఐ ఏటీఎంలో ఆగస్టు, సెప్టెంబర్‌ నెలలో ఇద్దరు వ్యక్తులు అనుమానిత ప్రవర్తనతో, మోసపూరితంగా ఏటీఎం నుంచి రూ.53 వేలు విత్‌డ్రా చేసినట్లు పోలీసులకు ఫిర్యాదు అందింది. దీనిపై సీసీ పుటేజీలను పరిశీలించిన చార్మినార్‌ పోలీసులు సోమవారం మహ్మద్‌ ఇర్షాద్‌, మహ్మద్‌ అసీం ఖాన్‌, రిజ్వాన్‌ ఖాన్‌, ముస్తాక్‌ ఖాన్‌, అసిఫ్‌ ఖాన్‌లను అదుపులోకి తీసుకుని విచారించారు.
• బంధువుల పేర కొత్త ఖాతాలు..!
  పోలీసుల విచారణలో ఎనిమిది మంది ముఠా సభ్యుల పేర్లు బయటకు వచ్చాయి. ఈ ముఠా సభ్యులు వారి కుటుంబ సభ్యులు, బంధువుల పేరుతో ఖాతాలు తెరుస్తారు. వాటికి వచ్చే ఏటీఎం కార్డులు తీసుకుంటారు. ఎస్‌బీఐ ఏటీఎం కేంద్రాలకు వెళ్లి ఆ కార్డుల సాయంతో నగదు విత్‌డ్రాకు టైప్‌ చేస్తారు. మిషన్‌ విత్‌డ్రాను అంగీకరించి డబ్బులను రిలీజ్‌ చేస్తుంది. మిషన్‌ నుంచి నగదు బయటికి రాగానే ఆ నగదును లాగకుండా, మిషన్‌ వెనక్కి తీసుకోకుండా అలానే పట్టుకుంటారు. చివరి సెకన్‌లో మిషన్‌కు సరఫరా అయ్యే కరెంట్‌ బటన్‌ను ఆఫ్‌ చేస్తారు. దీంతో మిషన్‌ టెక్నికల్‌ ఎర్రర్‌ అని సమాధానం ఇస్తుంది.
• చార్జీ బ్యాక్‌ ఆప్షన్‌ కింద ఫిర్యాదు
  నగదును తీసుకుని టెక్నికల్‌ ఎర్రర్‌ అంటూ వచ్చే సమాధానం లేదా రశీదుతో తిరిగి బ్యాంక్‌కు సంబంధించిన టోల్‌ ఫ్రీ నంబరుకు ఫోన్‌ చేస్తారు. మాకు డబ్బులు రాలేదు కాని మా ఖాతాలో డబ్బులు డెబిట్‌ అయ్యాయంటూ మెసేజ్‌ వచ్చింది. ఏటీఎం మిషన్‌ టెక్నికల్‌ ఎర్రర్‌ అని సమాధానం ఇచ్చిందని చార్జీ బ్యాక్‌ ఆప్షన్‌ కింద ఫిర్యాదు చేస్తారు.
  నాలుగు రోజుల్లో డబ్బులు వాపస్‌
  బ్యాంక్‌ ఈ ఆప్షన్‌ను పరిశీలించి నాలుగు రోజుల్లో డబ్బులను వారి ఖాతాలకు వాపస్‌ పంపిస్తుంది. ఇలా ఈ ముఠా సభ్యులు ఈ ఏడాదిలో దాదాపు రూ.5 లక్షల వరకు వివిధ బ్యాంక్‌లకు టోకరా వేశారు. అయితే గత ఏడాదిలో ఎంత మోసం చేశారనేది ప్రధాన సూత్రదారుడు ముబీన్‌ అహ్మద్‌, అతడి అనుచరులు అబిద్‌ ఖాన్‌, జబీద్‌ ఖాన్‌లు దొరికితే స్పష్టత వస్తుందని సీపీ అంజనీకుమార్‌ చెప్పారు. అరెస్టయిన వారి నుంచి 3 ఆటోలు, 5 మొబైల్‌ ఫోన్‌లు, 11 ఏటీఎం కార్డులు, ఓ ద్విచక్రవాహనాన్ని స్వాధీనం చేసుకున్నారు. ఈ సమావేశంలో దక్షిణ మండలం డీసీపీ గజారావు భూపాల్‌, చార్మినార్‌ ఏసీపీ భిక్షంరెడ్డి, ఇన్‌స్పెక్టర్‌ గురు నాయుడు, అదనపు ఇన్‌స్పెక్టర్‌ మల్లేశ్‌, తదితర అధికారులు పాల్గొన్నారు.
  సన్‌సిటీలో ఈ హర్యానా ముఠా..
  హర్యానాకు చెందిన వీరంతా కొన్ని సంవత్సరాల కిందట నగరానికి వచ్చి సన్‌సిటీలో నివాసముంటున్నారు. హర్యానాకు చెందిన ముబీన్‌ అహ్మద్‌ ద్వారా వీరంతా ఈ టెక్నిక్‌ను నేర్చుకున్నారు. ఆటో నడుపుతూ వారికి అనువైన ఎస్‌బీఐ ఏటీఎం కేంద్రాలను ఎంచుకుంటారు. ఇలా ముఠా సభ్యులు వివిధ రాష్ర్టాల్లో మోసాలకు పాల్పడుతున్నట్లు హైదరాబాద్‌ పోలీసులు అనుమానిస్తున్నారు.

మోసానికి ఆ 30 సెకన్లు
ఏటీఎం మిషన్‌లో గందరగోళం సృష్టించి డబ్బులు కాజేస్తున్న ముఠా సభ్యులు కీలకమైన 30 సెకన్ల సమయంలో అప్రమత్తంగా ఉంటారు. సెక్యూరిటీ సిబ్బంది ఉండని ఎస్‌బీఐ ఏటీఎం కేంద్రాలను ఎంచుకుని ఉదయం 6 నుంచి 10 గంటల సమయంలో చోరీ చేస్తారు. చోరీ చేసే సమయంలో ఇద్దరు లోపల, ఇద్దరు బయట ఉంటారు. పిన్‌ నొక్కగానే డబ్బులు బయటకు వస్తాయి. ఇలా రిలీజ్‌ అయిన నగదును తీసుకోకపోతే 30 సెకన్ల తర్వాత వెనక్కి వెళ్తుంది. వెనక్కి వెళ్లే సమయంలో డబ్బులు పట్టేసుకుంటారు. లేదా పవర్‌ ఆఫ్‌ చేస్తారని పోలీసుల దర్యాప్తులో వెల్లడైంది.