గచ్చిబౌలిలో విషాదం..

ఒకే కుటుంబానికి చెందిన ముగ్గురు ఆత్మహత్యకు పాల్పడిన విషాద ఘటన గచ్చిబౌలి పోలీస్‌ స్టేషన్‌ పరిధిలో చోటు చేసుకుంది.

• ఒకే కుటుంబానికి చెందిన ముగ్గురి బలవన్మరణం

శేరిలింగంపల్లి, నవంబర్‌ 9: ఒకే కుటుంబానికి చెందిన ముగ్గురు ఆత్మహత్యకు పాల్పడిన విషాద ఘటన గచ్చిబౌలి పోలీస్‌ స్టేషన్‌ పరిధిలో చోటు చేసుకుంది. పోలీసులు తెలిపిన వివరాల ప్రకారం.. పాలమూరు జిల్లా అచ్చంపేట మండలం తాళ్ల చెరువు గ్రామానికి చెందిన బత్తుల మారెడ్డి (65) ఆయన భార్య బత్తుల భారతి (60), కుమారుడు బత్తుల నిశాంత్‌ రెడ్డి (38) ఏడాది కాలంగా గౌలిదొడ్డిలోని జయభేరి నిర్వాణ అపార్ట్‌మెంట్‌లో నివాసముంటున్నారు. మారెడ్డి కార్పొరేషన్‌ బ్యాంకులో మేనేజర్‌గా పనిచేసి పదవి విరమణ చేయగా, ఆయన భార్య ఓ ప్రైవేటు కళాశాలలో ప్రొఫెసర్‌గా పనిచేసి రిటైర్‌ అయ్యారు. కుమారుడు నిశాంత్‌రెడ్డి సాఫ్ట్‌వేర్‌ ఉద్యోగిగా పనిచేస్తున్నాడు.

నిశాంత్‌ రెడ్డికి మియాపూర్‌కు చెందిన తేజస్వినితో వివాహమైంది. వీరికి పదేండ్ల కుమారుడు సంతానం. అయితే నిశాంత్‌ రెడ్డి కొంతకాలంగా మానసిక ఆరోగ్య సమస్యలు, ఇతర అనారోగ్య సమస్యలతో బాధపడుతున్నట్లు తెలుస్తోంది. ఈ క్రమంలో అతని ప్రవర్తనలో మార్పులు రావడంతో కుటుంబంలో తరచూ గొడవలు జరుగుతున్నట్లు సమాచారం. ఈ పరిణామాలతో విసిగిపోయిన తేజస్విని కుమారుడితో కలిసి మియాపూర్‌లోని పుట్టింటికి వెళ్లిపోయినట్లు తెలిసింది. భార్య, కుమారుడు దూరంగా ఉండడంతో నిశాంత్‌ రెడ్డి తీవ్ర మనస్థాపానికి గురైనట్లు ప్రాథమికంగా తెలుస్తోంది.

ఈ పరిణామాలతో ఆందోళనకు గురైన తల్లిదండ్రులు కూడా తీవ్ర మానసిక ఒత్తిడికి లోనైనట్లు సమాచారం. ఈ క్రమంలో ఆదివారం ముగ్గురూ ఆత్మహత్యకు పాల్పడినట్లు పోలీసులు గుర్తించారు. తొలుత తల్లి భారతి మృతి చెందగా, అనంతరం తండ్రి మారెడ్డి, కుమారుడు నిశాంత్‌ రెడ్డి కూడా ప్రాణాలు తీసుకున్నట్లు పోలీసుల ప్రాథమిక విచారణలో వెల్లడైనట్లు సమాచారం. ఆదివారం ఉదయం అపార్ట్‌మెంట్‌లో ముగ్గురు మృతి చెందినట్లు పోలీసులకు సమాచారం అందింది.

వెంటనే గచ్చిబౌలి పోలీసులు ఘటనా స్థలానికి చేరుకుని పరిశీలించారు. మృతదేహాలను తదుపరి పరీక్షల కోసం ఆసుపత్రికి తరలించి, కేసు దర్యాప్తు చేపట్టారు. కుటుంబ సమస్యలు, అనారోగ్య ఇబ్బందులు, మానసిక ఒత్తిడి వంటి అంశాలు ఈ విషాదానికి కారణమయ్యాయా ? అనే కోణంలో పోలీసులు విచారణ జరుపుతున్నారు. ముగ్గురి మరణానికి దారి తీసిన పూర్తి పరిస్థితులు పోలీసుల దర్యాప్తులో వెల్లడి కావాల్సి ఉంది.