జంక్‌ఫుడ్‌తో డిప్రెషన్‌

జంక్‌ ఫుడ్‌, అధికంగా ప్రాసెస్‌ చేసిన ఆహార పదార్థాలకు.. డిప్రెషన్‌కు మధ్య చాలా బలమైన సంబంధం ఉందని ఇటీవలి అధ్యయనాలు స్పష్టం చేస్తున్నాయి. మనం తీసుకునే ఆహారం కేవలం శారీరక ఆరోగ్యాన్నే కాకుండా, మానసిక స్థితిని కూడా తీవ్రంగా ప్రభావితం చేస్తుందని పలు పరిశోధనలు నిరూపిస్తున్నాయి. ఇదే విషయంపై కాలిఫోర్నియా విశ్వవిద్యాలయం పరిశోధకులు తాజాగా ఓ అధ్యయనం నిర్వహించారు. ఇందుకు సంబంధించిన వివరాలు జామా సైకియాట్రీలో ప్రచురితమయ్యాయి.

జంక్‌ ఫుడ్‌, అధికంగా ప్రాసెస్‌ చేసిన ఆహార పదార్థాలకు.. డిప్రెషన్‌కు మధ్య చాలా బలమైన సంబంధం ఉందని ఇటీవలి అధ్యయనాలు స్పష్టం చేస్తున్నాయి. మనం తీసుకునే ఆహారం కేవలం శారీరక ఆరోగ్యాన్నే కాకుండా, మానసిక స్థితిని కూడా తీవ్రంగా ప్రభావితం చేస్తుందని పలు పరిశోధనలు నిరూపిస్తున్నాయి. ఇదే విషయంపై కాలిఫోర్నియా విశ్వవిద్యాలయం పరిశోధకులు తాజాగా ఓ అధ్యయనం నిర్వహించారు. ఇందుకు సంబంధించిన వివరాలు జామా సైకియాట్రీలో ప్రచురితమయ్యాయి. మేజర్‌ డిప్రెషన్‌తో బాధపడుతున్న వ్యక్తులు తమ ఆహారంలో జంక్‌ ఫుడ్‌, అల్ట్రా-ప్రాసెస్డ్‌ ఆహార పదార్థాలను 85 శాతానికి పైగా తగ్గించినప్పుడు, వారిలో డిప్రెషన్‌ లక్షణాలు, ఆందోళన గణనీయంగా తగ్గినట్లు తేలిందని పరిశోధకులు వెల్లడించారు.

చిప్స్‌, కూల్‌ డ్రింక్స్‌, ఫాస్ట్‌ ఫుడ్‌, ఇన్‌స్టంట్‌ ఫుడ్స్‌, ప్యాకేజ్డ్‌ స్వీట్లు వంటి వాటిలో ఉండే అధిక చక్కెర, ఉప్పు, అనారోగ్యకరమైన కొవ్వులు.. మెదడులో ఆనందాన్ని కలిగించే ‘డోపమైన్‌’ హార్మోన్‌ను ఉత్పత్తి చేస్తాయి. ఫలితంగా, వీటికి బానిస అయ్యే అవకాశం ఎక్కువగా ఉంటుంది. ఇక జంక్‌ ఫుడ్‌ వల్ల డిప్రెషన్‌కు గురయ్యే ప్రమాదం కూడా ఉన్నదని హెచ్చరిస్తున్నారు. పొట్టలో ఉండే మంచి బ్యాక్టీరియా.. మెదడుకు కావాల్సిన సెరోటోనిన్‌ వంటి రసాయనాలను ఉత్పత్తి చేయడంలో కీలక పాత్ర పోషిస్తుంది. జంక్‌ ఫుడ్‌ ఎక్కువగా తీసుకుంటే.. ఈ బ్యాక్టీరియా దెబ్బతింటుంది. ఫలితంగా, శరీరంలో క్రానిక్‌ ఇన్‌ఫ్లమేషన్‌కు దారితీసి, మెదడు పనితీరును నేరుగా దెబ్బతీస్తుందని పరిశోధకులు హెచ్చరిస్తున్నారు.

అధికంగా రీఫైండ్‌ చేసిన కార్బోహైడ్రేట్లు, షుగర్‌ ఉండే జంక్‌ ఫుడ్‌ తీసుకోవడం వల్ల రక్తంలో గ్లూకోజ్‌ స్థాయులు ఒక్కసారిగా పెరిగి మళ్లీ పడిపోతాయి. ఇది మూడ్‌ స్వింగ్స్‌, విపరీతమైన అలసట, ఆందోళనకు కారణమవుతుందట. ఫలితంగా దీర్ఘకాలంలో డిప్రెషన్‌ బారిన పడే ప్రమాదం ఉన్నదని నిపుణులు హెచ్చరిస్తున్నారు. కాబట్టి, జంక్‌ ఫుడ్‌ను వీలైనంతగా దూరం పెట్టాలని సూచిస్తున్నారు. ఇక, కేవలం ఆహారంలో మార్పులు చేయడం వల్లే డిప్రెషన్‌ పూర్తిగా తగ్గిపోదు. కాబట్టి, ఇప్పటికే డిప్రెషన్‌కు వాడుతున్న మందులను ఎట్టిపరిస్థితుల్లోనూ ఆపకూడదని సూచిస్తున్నారు. డాక్టర్ల సలహా మేరకు తీసుకునే కౌన్సెలింగ్‌, థెరపీ, మెడికేషన్‌తోపాటు ఆహారంలో మార్పులు చేసుకోవడం ద్వారా మానసిక ఆరోగ్యాన్ని వేగంగా మెరుగుపరుచుకోవచ్చని అంటున్నారు.