పిండిలో పురుగులు.. నాసిరకం సరుకులు

గురుకులాల్లో కిరాణా సరుకుల నాణ్యతలో రాజీలేదని గొప్పలు చెప్పిన రేవంత్‌ సర్కార్‌.. పాఠశాలలకు నాసిరకం వస్తువులు సరఫరా అవుతున్నా పట్టింపు లేన్నట్టు వ్యవహరిస్తున్నది. టెండర్ల నిబంధనలకు విరుద్ధంగా బ్రాండెడ్‌ ఐటమ్స్‌ బదులు లూజ్‌ మాల్‌ సప్లయ్‌, పురుగులున్న పిండి, పామాయిల్‌ సరఫరా చేస్తూ విద్యార్థుల ప్రాణాలతో చెలగాటమాడుతున్నది.

• ఇదీ గురుకులంలో కిరాణా సామగ్రి సరఫరా తీరు
• సన్‌ఫ్లవర్‌ బదులు పామాయిల్‌ నూనె సరఫరా
• పీఎంయూ టెండర్ల ద్వారా సర్కార్‌ బాగోతం
• నాణ్యతకు కాంట్రాక్టర్‌ తిలోదకాలు
• వద్దని ప్రిన్సిపాళ్లు తిరస్కరిస్తున్నా బేఖాతరు
• అడిగితే తాయిళాలు.. లేదంటే బెదింపులు
• మొరపెట్టుకుంటున్నా పట్టించుకోని వైనం
• మళ్లీ రేట్లను పెంచేందుకు ప్రతిపాదనలు
• వచ్చే ఏడాది టెండర్‌కు ఇప్పుడే సన్నాహాలు

హైదరాబాద్‌, నవంబర్‌ 9 (నమస్తే తెలంగాణ) : గురుకులాల్లో కిరాణా సరుకుల నాణ్యతలో రాజీలేదని గొప్పలు చెప్పిన రేవంత్‌ సర్కార్‌.. పాఠశాలలకు నాసిరకం వస్తువులు సరఫరా అవుతున్నా పట్టింపు లేన్నట్టు వ్యవహరిస్తున్నది. టెండర్ల నిబంధనలకు విరుద్ధంగా బ్రాండెడ్‌ ఐటమ్స్‌ బదులు లూజ్‌ మాల్‌ సప్లయ్‌, పురుగులున్న పిండి, పామాయిల్‌ సరఫరా చేస్తూ విద్యార్థుల ప్రాణాలతో చెలగాటమాడుతున్నది. నాణ్యతకు తిలోదకాలిచ్చి కమీషన్ల కోసం కాంట్రాక్టర్లు ఇష్టారాజ్యంగా వ్యవహరిస్తుండగా, సర్కార్‌ తీరుతో ప్రిన్సిపాల్స్‌ తలలు పట్టుకోవాల్సి వస్తున్నది. అదీగాక మళ్లీ ధరలను పెంచడంతోపాటు వచ్చే ఏడాదికి కూడా టెండర్‌ వేసేందుకు సిద్ధపడటం గమనార్హం.

పామోలిన్‌ సరఫరా..

రాష్టంలో ఎస్సీ, ఎస్టీ, బీసీ, మైనారిటీ, జనరల్‌ గురుకులాలతోపాటు, సంక్షేమ హాస్టళ్లు, కస్తూర్బా విద్యాలయాలు, గిరిజన ఆశ్రమ పాఠశాలలు, మోడల్‌ స్కూల్స్‌, ప్రభుత్వ పాఠశాలలు ఉన్నాయి. ఆయా సంస్థల్లోని విద్యార్థులకు మెనూ ప్రకారం భోజనం అందించాల్సి ఉంటుంది. బియ్యం ప్రభుత్వమే సరఫరా చేస్తుండగా, పాలను సైతం విజయ డెయిరీ ద్వారా సరఫరా అవుతాయి. అవి పోగా వంట తయారీకి ఫుడ్‌ ప్రొవిజన్‌కు సంబంధించిన కిరాణా సామగ్రి కొనుగోలు టెండర్లను ప్రభుత్వమే నిర్వహించింది.

2026-27 విద్యాసంవత్సరానికి సంబంధించి 93 ఐటమ్స్‌ను సప్లయ్‌ టెండర్‌ను నేకాఫ్‌(నేషనల్‌ ఫెడరేషన్‌ ఆఫ్‌ ఫార్మర్స్‌ ప్రొక్యూర్‌మెంట్‌ అండ్‌ ప్రాసెసింగ్‌ రిటైలింగ్‌ కో ఆపరేటివ్‌ లిమిటెడ్‌)కు రూ.763కోట్లకు అప్పగించింది. సెప్టెంబర్‌ నుంచే సరుకులను సప్లయ్‌ చేయాల్సి ఉండగా, నెల ఆలస్యంగా అక్టోబర్‌ నుంచి ప్రారంభించింది. ప్రస్తుతం ఆ వస్తువులను జాబితాలో ఏ కేటగిరీ కింద 27బ్రాండెడ్‌ ఐటమ్స్‌ ఉన్నాయి. ప్రస్తుతం క్షేత్రస్థాయిలో అవేవీ సరఫరా కావడం లేదని తెలుస్తున్నది. లూజ్‌గానే సరఫరా చేస్తున్నారని ప్రిన్సిపాల్స్‌ చెప్త్తున్నారు. అవి పూర్తిగా పురుగులు పట్టినవి అంటగడుతున్నారని మండిపడుతున్నారు. కొన్ని సరుకుల ప్యాకింగ్‌ బ్రాండెడ్‌ కవర్లలో ఉన్నా, అందులోని పదార్థాల్లో నాణ్యత లేదని వివరిస్తున్నారు. నాణ్యత లేదని తిప్పి పంపేందుకు యత్నించినా వినడం లేదని పలువురు ప్రిన్సిపాల్స్‌ తలలు పట్టుకుంటున్నారు.

తాయిళాలు ఎరచూపుతున్నారని, లేదంటే బెదిరిస్తున్నారు తప్ప సరుకులను మాత్రం వెనక్కి తీసుకునేది లేదని సప్లయ్‌దారులు తెగేసి చెబుతున్నారని వాపోతున్నారు. ఉన్నతాధికారులకు చెప్పినా ఫలితం లేకుండా పోయిందని ఆవేదన వ్యక్తంచేస్తున్నారు. నిజానికి టెండర్‌ దక్కించుకున్న సంస్థనే రాష్ట్రంలోని ప్రతి గురుకులానికి, సంక్షేమ హాస్టల్‌కు, స్కూళ్లకూ సంబంధించి కిరాణా సామగ్రిని సరఫరా చేయాల్సి ఉంటుం ది. అందుకోసం ప్రస్తుతం ఆ సంస్థ జిల్లాకో గోడౌన్‌ను ఏర్పాటు చేసింది. సరుకుల సప్లయ్‌ మాత్రం ఎక్కడికక్కడ సబ్‌ కాంట్రాక్టర్లకు అప్పగించిందని, ఫలితంగానే నాణ్యత లోపిస్తున్నదని ప్రిన్సిపాల్స్‌కు వివరిస్తున్నారు.

ఇప్పటికే అధిక ధరలకు.. మళ్లీ పెంపునకు ప్రతిపాదనలు

ప్రభుత్వ విద్యాసంస్థల్లోని విద్యార్థులకు అందించే 9 రకాల వస్తువులు, ఫుడ్‌ ప్రొవిజన్‌కు సంబంధించి టెండర్‌ ప్రక్రియను ప్రభుత్వం ఈ ఏడాది పూర్తిగా మార్చింది. జిల్లా స్థాయి ప్రొక్యూర్‌మెంట్‌ కమిటీ స్థానంలో ఎస్సీ గురుకుల సొసైటీ సెక్రటరీ నేతృత్వంలో పీఎంయూ (ప్రాజెక్టు మానిటరింగ్‌ యూనిట్‌)ను ఏర్పాటు చేసింది. సదరు పీఎంయూనే ఆయా వస్తువుల టెండర్లను ఖరారు చేసింది. ఫుడ్‌ప్రొవిజన్‌కు సంబంధించి 93వస్తువులను 763కోట్లకు ఏజెన్సీకి అప్పటించింది. సప్లయ్‌ జాబితాలో ఏ కేటగిరీ కింద 27బ్రాండెండ్‌ ఐటమ్స్‌ ఉన్నాయి. ఆయా వస్తువులు ఎమ్మార్పీ కంటే డిస్కౌంట్‌ ధరకు, మరో 28 వస్తువులను (పప్పులు, ఉప్పులు) హైదరాబాద్‌ హోల్‌సేల్‌ మార్కెట్‌ ధరల ఆధారంగా, 33 వస్తువులను వార్షిక రేట్ల ప్రకారం కొనుగోలు చేయాలని నిర్ణయించారు.

అయితే ఆచరణలో ఆ 3 కేటగిరీల ధరలను సైతం బహిరంగ మార్కెట్‌ కన్నా అధిక ధరలకే పీఎంయూ కట్టబెట్టింది. బహిరంగ మార్కెట్‌ లభిస్తున్న డిస్కౌంట్‌ కంటే అత్యల్ప డిస్కౌంట్‌కు, ఇతర వస్తువులను సగటును 10శాతం నుంచి 20శాతం మేరకు అత్యధిక ధరలను నిర్ణయించి ఏజెన్సీకి అప్పగించినట్టు తేటతెల్లమైంది. హోల్‌సేల్‌ మార్కెట్‌లో, బల్క్‌ ధరల కంటే కాంట్రాక్టర్లు ఎక్కువకు కోట్‌ చేయడం, ప్రభుత్వం అప్పగించడం గమనార్హం. కమీషన్ల పేరిట కోట్లను కొల్లగొడుతున్నారనే ఆరోపణలున్నాయి. ఇదిలా ఉంటే కిరాణా సామగ్రి సరఫరాను సదరు ఏజెన్సీ సెప్టెంబర్‌లో ప్రారంభించాలి. కానీ ఆలస్యంగా అక్టోబర్‌ నుంచే ప్రారంభించింది. అందులో దసరా సెలవులే ఉన్నాయి. కానీ టెండర్‌ కోట్‌ చేసిన ధరలను సవరించాలని, ధరలను పెంచాలని సదరు ఏజెన్సీ కోరడం, అధికారులు ప్రతిపాదనలు సిద్ధం చేయడం గమనార్హం. కమీషన్ల కోసమే ధరలు పెంచేందుకు ప్రభుత్వం సిద్ధమైందని తెలుస్తున్నది.

అప్పుడే వచ్చే ఏడాదికి సన్నాహాలు

ఈ ఏడాదికి సంబంధించిన వస్తువుల సప్లయ్‌నే పూర్తి కాలేదు. కానీ మరోవైపు ప్రభుత్వం 2027-28 విద్యా సంవత్సరానికి సంబంధించిన టెండర్లకు కసరత్తు ప్రారంభించింది. ఈ 2026-27విద్యా సంవత్సరం నుంచి ప్రభుత్వ సంస్థల్లోని విద్యార్థులకు రెండు జతల యూనిఫామ్స్‌, గురుకుల విద్యార్థులకు వాటితోపాటు అదనంగా పీటీ, నైట్‌ట్రాక్‌, బూట్లు, సాక్సులు, ట్రంకుబాక్సులు, ఐడీకార్డులు, ప్లేట్లు, గ్లాసు, కప్పు కటోరాలు 9రకాల వస్తువులను, మొత్తంగా 24వస్తువులతో కూడిన కిట్‌ను పంపిణీ చేయాలని నిర్ణయించారు. అందుకు సంబంధించిన టెండర్‌ విలువ దాదాపు రూ.1200 కోట్లు. గుజరాత్‌ తదితర కంపెనీలకు గత మే నెలలోనే ప్రభుత్వం కట్టబెట్టింది. టెండర్‌ దక్కించుకున్న ఏజెన్సీ సైతం 45రోజుల్లోనే యూనిఫామ్స్‌ను సప్లయ్‌ చేయాల్సి ఉంది.

టెండర్‌లో ఇదే ప్రధానమైన నిబంధన. అదీగాక ప్రభుత్వం గడువులోగా విద్యార్థులకు దుస్తులు అందించడమే లక్ష్యమని, పెద్ద కంపెనీలకే ఆ శక్తి ఉంటుందని, అందుకే నిబంధనలను మార్చాలని ప్రగల్భాలు పలికింది. కానీ 45రోజుల గడువు ముగిసి నెలలు దాటింది. కానీ ఇప్పటివరకు కనీసం 50శాతం మంది విద్యార్థులకు సైతం యూనిఫామ్స్‌ అందలేదు. రెండు యూనిఫామ్స్‌ను అందించాల్సి ఉండగా, ఇప్పటివరకు ఒకే యూనిఫామ్‌ను మాత్రమే అందించి చేతులు దులుపుకొన్నారు. ఇక వైట్‌ డ్రెస్‌, నైట్‌, పీటీ యూనిఫామ్స్‌ జాడనే లేకుండా పోయింది. చాలా పాఠశాలల్లో విద్యార్థులకు బూట్లు మాత్రమే సరఫరా చేశారు. సాక్సులను మాత్రం ఇవ్వలేదు. కానీ ప్రభుత్వం అప్పుడే వచ్చే ఏడాదికి సంబంధించిన టెండర్‌ ప్రక్రియకు ప్రభుత్వం సిద్ధమైంది. ఇండెంట్లను పంపించాలని ప్రిన్సిపాల్స్‌ను ఉరుకులు, పరుగులు పెట్టిస్తున్నది. సర్కార్‌ తీరుతో ఉద్యోగులు తలలు పట్టుకుంటున్నారు.