ఎంఆర్‌టీ తొలగింపు

ఉస్మానియా దవాఖాన కేంద్రంగా రాష్ట్రంలో కొనసాగుతున్న కారుణ్య నియామకాల దందాపై ఈ నెల 6,7వ తేదీల్లో నమస్తే తెలంగాణ ప్రచురించిన కథనాలపై ఎట్టకేలకు ప్రభుత్వం స్పందించింది.

• ఉస్మానియా దవాఖానలో కారుణ్య దందాపై స్పందించిన సర్కార్‌
• ఎంఆర్‌టీని తప్పించి.. డీహెచ్‌కు సరెండర్‌
• ‘నమస్తే’ కథనంతో చర్యలు

సిటీబ్యూరో, నవంబర్‌ 9 (నమస్తే తెలంగాణ): ఉస్మానియా దవాఖాన కేంద్రంగా రాష్ట్రంలో కొనసాగుతున్న కారుణ్య నియామకాల దందాపై ఈ నెల 6,7వ తేదీల్లో నమస్తే తెలంగాణ ప్రచురించిన కథనాలపై ఎట్టకేలకు ప్రభుత్వం స్పందించింది. 2012లో నకిలీ సర్టిఫికెట్‌తో ఎంఆర్‌సీ నుంచి ఎంఆర్‌టీగా పదోన్నతి పొందడమే కాకుండా తప్పుడు ‘మెడికల్‌ ఇన్‌వాల్యుయేషన్‌’ సర్టిఫికెట్లు సృష్టించి, అక్రమంగా కారుణ్య నియామకాలు పొందే ఉద్యోగులకు సహకరిస్తున్నట్లు ఆరోపణలు ఎదుర్కొంటున్న ఉస్మానియా దవాఖానలోని మెడికల్‌ రికార్డు టెక్నీషియన్‌ సమీయుద్దీన్‌ను విధుల నుంచి తప్పించి, డైరెక్టర్‌ ఆఫ్‌ హెల్త్‌కు సరెండర్‌ చేస్తూ సోమవారం ఉత్తుర్వులు జారీచేసింది.

గత కొంత కాలంగా ఆయనపై పెద్ద ఎత్తున ఆరోపణలతో కూడిన ఫిర్యాదులు వస్తున్న విషయం తెలిసిందే. ఈ క్రమంలో నమస్తే తెలంగాణ ఈ నెల 6, 7వ తేదీలలో వరుస కథనాలు ప్రచురించింది. దీంతో అధికారులు ఆరోపణలు ఎదుర్కొంటున్న ఎంఆర్‌టీని ఉస్మానియా విధుల నుంచి తప్పించి, డీహెచ్‌ కార్యాలయానికి అటాచ్‌ చేస్తూ ఆదేశాలు జారీచేశారు.

అంతేకాకుండా 2012లో ఉర్దూ విదారా నుంచి నకిలీ సర్టిఫికెట్‌తో అక్రమంగా ఎంఆర్‌సీ నుంచి ఎంఆర్‌టీగా పదోన్నతి పొందినట్లు వస్తున్న ఆరోపణలతో పాటు తప్పుడు ‘మెడికల్‌ ఇన్‌వాల్యుయేషన్‌’ సర్టిఫికెట్ల సృష్టిపై కూడా పూర్తిస్థాయి విచారణ జరిపేందుకు ప్రత్యేక కమిటీని ఏర్పాటు చేసినట్లు డీహెచ్‌ కార్యాలయ అధికారులు తెలిపారు.

అయితే వైద్య, ఆరోగ్యశాఖలో ఇలా నకిలీ సర్టిఫికెట్లపై పదోన్నతులు పొందిన వారు పదుల సంఖ్యలో ఉన్నట్లు తెలుస్తోంది. అంతేకాకుండా తప్పుడు పత్రాలతో జోరుగా కారుణ్య నియామకాలు జరుగుతున్నట్లు నల్లగొండ జిల్లా, శాలిగౌరారం పీహెచ్‌సీ హెల్త్‌ అసిస్టెంట్‌ చామకూరి రాజు ఉదంతంతో మరోసారి బట్టబయలైంది. అయితే ఈ కారుణ్య నియామకాల దందాలో మెడికల్‌ బోర్డుకు చెందిన కొందరు వైద్యుల పాత్రపై కూడా అనుమానాలు వస్తుండడంతో దర్యాప్తు సంస్థలు ఆ కోణంలో కూడా ఆరా తీస్తున్నాయి.