Wine Shops | శుక్ర, శనివారాలలో అర్ధరాత్రి ఒంటి గంట వ‌ర‌కు మ‌ద్యం దుకాణాలు ఓపెన్

జీహెచ్‌ఎంసీ పరిధిలో మద్యం మినహా ఆహారపు సరఫరాకు సంబంధించిన ఇతర హోటల్స్‌ను అర్ధరాత్రి ఒంటి గంట వరకు తెరుచుకోవచ్చంటూ నగర పోలీస్‌ కమిషనర్‌ సీవీ ఆనంద్‌ అంతర్గతంగా పోలీస్‌ అధికారులకు ఆదేశాలు జారీ చేశారు. ఈ సర్క్యూలర్‌ సోషల్‌ మీడియాలో వైరల్‌ అయ్యింది.

• నిర్వహణపై నగర పోలీసులకు అంతర్గత సర్క్యూలర్‌ జారీ

సిటీబ్యూరో, సెప్టెంబర్‌ 24 (నమస్తే తెలంగాణ): జీహెచ్‌ఎంసీ పరిధిలో మద్యం మినహా ఆహారపు సరఫరాకు సంబంధించిన ఇతర హోటల్స్‌ను అర్ధరాత్రి ఒంటి గంట వరకు తెరుచుకోవచ్చంటూ నగర పోలీస్‌ కమిషనర్‌ సీవీ ఆనంద్‌ అంతర్గతంగా పోలీస్‌ అధికారులకు ఆదేశాలు జారీ చేశారు. ఈ సర్క్యూలర్‌ సోషల్‌ మీడియాలో వైరల్‌ అయ్యింది. హైదరాబాద్‌లో రాత్రి 10 గంటలకే దుకాణాలు మూసేస్తూ ప్రజలపై లాఠీ ఛార్జీ చేస్తున్నారని, ఇటీవల పెద్ద ఎత్తున విమర్శలు వచ్చాయి. ఈ నేపథ్యంలోనే సీఎం అర్ధరాత్రి ట్రై కమిషనరేట్ల పరిధిలో దుకాణాలు తెరుకోవచ్చంటూ ఆదేశించిన విషయం తెలిసిందే. హైదరాబాద్‌ పోలీస్‌ కమిషనర్‌ సీవీ ఆనంద్‌ మంగళవారం దుకాణాలు తెరిచే విషయంలో సిబ్బందికి అంతర్గతంగా సర్క్యూలర్‌ జారీ చేసినట్లు సమాచారం.

సర్క్యూలర్‌లోని అంశాలు ఇలా..

• బట్టలు, జ్యువెలరీ దుకాణాలు, సూపర్‌ మార్కెట్లు, ఎలక్ట్రానిక్‌ షాప్స్‌, సెల్‌ ఫోన్‌ షాప్స్‌, జనరల్‌ అండ్‌ కిరాణా స్టోర్స్‌ బుక్‌ స్టాల్స్‌ ఉదయం 9 నుంచి రాత్రి 11 గంటల వరకు తెరిచి ఉంటాయి.
• మద్యం దుకాణాలు జీహెచ్‌ఎంసీ పరిధిలో ఉదయం 10 గంటల నుంచి రాత్రి 11 గంటల వరకు తెరుచుకోవచ్చు. జీహెచ్‌ఎంసీ పరిధితో పాటు జీహెచ్‌ఎంసీకి 5 కిలోమీటర్ల వరకు ఉన్న ప్రాంతాలలోని బార్లు(2బీ)లలో మద్యం సరఫరా చేయడానికి మాత్రం ఉదయం 10 నుంచి రాత్రి 12 గంటల వరకు (పని దినాలలో), వీకెండ్స్‌ (శుక్ర, శనివారాలలో) రాత్రి 10 గంటల నుంచి అర్ధరాత్రి ఒంటి గంట వరకు అనుమతి ఉంటుంది.
• ఆహారపు విక్రయాలకు సంబంధించిన దుకాణాలు తెలంగాణ రాష్ట్ర వ్యాప్తంగా ఉదయం 5 గంటల నుంచి అర్ధరాత్రి 12 గంటల వరకు తెరుచుకోవచ్చు. అయితే హోటల్స్‌, రెస్టారెంట్స్‌, దాబా, ఐస్‌క్రీమ్‌ పార్లర్స్‌, బేకరీస్‌, టిఫిన్‌ సెంటర్స్‌, కాఫీ షాప్స్‌, టీ స్టాల్స్‌, పాన్‌ షాప్స్‌ ఒంటి గంట వరకు తెరుచుకోవచ్చని సూచించారు. ఈ ఆదేశాలు ప్రభుత్వం నుంచి అధికారికంగా రావాల్సి ఉందని పేర్కొన్నారు.