Hyderabad | ఊరెళ్తున్నారా.. జర భద్రం.. సమాచారం ఇస్తే వచ్చేదాకా గస్తీ పెంచుతాం : సైబరాబాద్‌ సీపీ

వేసవికాలం వచ్చిందంటే చాలా మంది నగరాన్ని వదిలి ఇతర ప్రాంతాలకు వెళ్తుంటారు. పిల్లలకు సెలవులు కావడం, ఊష్ణతాపం నుంచి ఉపశమనం పొందేందుకు విహార యాత్రలు, తీర్ధయాత్రలు వెళ్లేందుకు మొగ్గు చూపుతారు.

Hyderabad |  సిటీబ్యూరో, ఏప్రిల్‌ 23 (నమస్తే తెలంగాణ) : వేసవికాలం వచ్చిందంటే చాలా మంది నగరాన్ని వదిలి ఇతర ప్రాంతాలకు వెళ్తుంటారు. పిల్లలకు సెలవులు కావడం, ఊష్ణతాపం నుంచి ఉపశమనం పొందేందుకు విహార యాత్రలు, తీర్ధయాత్రలు వెళ్లేందుకు మొగ్గు చూపుతారు. మరికొంత మంది స్వస్థలాలకు పయణమవుతుంటారు. ఈ క్రమంలో ఇళ్లకు తాళాలు వేసి వెళ్తుంటారు. ఇదే అదునుగా చూసుకొని దొంగలు చోరీలకు పాల్పడుతుంటారు. అయితే గతంతో పోల్చితే ఈ మధ్య కాలంలో వేసవి దొంగతనాలు చాలా వరకు తగ్గుముఖం పట్టినప్పటికీ పూర్తి స్థాయిలో తగ్గలేదని పోలీసు అధికారులు తెలుపుతున్నారు. సమ్మర్‌ క్రైమ్‌లో ముఖ్యంగా ఆటోమొబైల్‌, హౌస్‌ హోల్డ్‌ థెఫ్ట్‌, ప్రాపర్టీ థెఫ్ట్‌ వంటి ఆర్థిక పరమైన నేరాలు ఎకువగా జరుగుతుంటాయని సైబరాబాద్‌ పోలీస్‌ కమిషనర్‌ స్టీఫెన్‌ రవీంద్ర తెలిపారు. ఇంటికి తాళాలు వేసి ఊరెళ్లే వారు విలువైన ఆభరణాలు, నగదును బ్యాంకు లాకర్లలో భద్రపర్చుకోవాలని పేర్కొన్నారు. ఉరెళ్లేవారు స్థానిక పోలీస్‌ స్టేషన్‌లో సమాచారం ఇవ్వాలన్నారు.

ప్రత్యేక కార్యాచరణ రూపొందించాం

సమ్మర్‌ క్రైమ్స్‌ను నివారించేందుకు ప్రత్యేక కార్యాచరణ రూపొందించాం. సమ్మర్‌ క్రైమ్స్‌లో ముఖ్యంగా ఆటోమొబైల్‌, హౌస్‌ హోల్డ్‌ థెఫ్ట్‌, ప్రాపర్టీ థెఫ్ట్‌ వంటి ఆర్థిక పరమైన నేరాలు ఎకువగా జరుగుతుంటాయి. కమిషనరేట్‌ పరిధిలో ప్రధాన హాట్‌ స్పాట్స్‌ని గుర్తించాం. జోన్ల వారీగా పోలీస్‌ స్టేషన్ల పరిధిలోని ముఖ్యమైన హాట్‌ స్పాట్‌లపై రోజువారి సమీక్ష నిర్వహించేలా సంబంధిత అధికారులను ఆదేశించాం. జోన్లవారీగా డే&నైట్‌ బీట్లను స్వయంగా పర్యవేక్షిస్తున్నా. ప్రధానంగా ఇతర రాష్ట్రాల నుంచి వచ్చే అంతర్రాష్ట్ర ముఠాలపై నిఘా పెంచాం. జైలు నుంచి విడుదలైన పాత నేరస్తులపై ప్రత్యేక నిఘా పెట్టాం. రానున్న 45రోజులు చాలా కీలకం.

– స్టీఫెన్‌ రవీంద్ర, సైబరాబాద్‌ పోలీస్‌ కమిషనర్‌

ఈ జాగ్రతలు పాటించండి

• ఇంటికి తాళం వేసి, బయటకు వెళ్తున్నప్పుడు సెక్యూరిటీ అలారం, మోషన్‌ సెన్సార్‌ను ఏర్పాటు చేసుకోవాలి.
• ఇంటి ప్రధాన ద్వారానికి సెంట్రల్‌ లాక్‌ సిస్టమ్‌ ఏర్పాటు చేసుకోవాలి.
• కాలనీలో లేక ఇంటి పరిసరాల్లో గుర్తుతెలియన వ్యక్తులు సంచరిస్తే వెంటనే స్థానిక పోలీసులకు లేదా 100కు సమాచారం ఇవ్వాలి.
•  వాహనాలను ఇంటి ఆవరణలోనే పార్కింగ్‌ చేసుకోవాలి.
  ద్విచక్ర వాహనాలకు తప్పనిసరిగా తాళాలు వేయాలి. వీలైతే ద్విచక్ర వాహనాల చక్రాలకు గొలుసుతో కూడిన తాళాలు వేయాలి.
• ఎట్టిపరిస్థితుల్లోనూ నేపాలి వారిని ఇంట్లో పనికి పెట్టుకోవద్దు.
• నేర చరిత్రలేని, నమ్మకమైన వారిని మాత్రమే సెక్యూరిటీ గార్డుగా నియమించుకోవాలి.
• ఇంటికి నలువైపులా సీసీ కెమెరాలను అమర్చుకోవాలి. వాటిని ఆన్‌లైన్‌లో ఎప్పటికప్పుడు పరిశీలిస్తుండాలి.
• ఇంట్లో లేనప్పుడు ఇంటి ముందు చెత్తాచెదారం, న్యూస్‌ పేపర్‌, పాల ప్యాకెట్లు జమ కాకుండా చూసుకోవాలి. ఇంటి ముందు చెత్తాచెదారం, న్యూస్‌పేపర్‌, పాల ప్యాకెట్లు పడిఉన్నాయంటే మీరు ఇంట్లో లేరనే విషయాన్ని నేరస్తులు పసిగట్టి, దొంగతనాలకు పాల్పడే అవకాశముంటుంది.
• ఇంటి ప్రధాన ద్వారానికి తాళం వేసినప్పటికీ తాళం కనిపించకుండా డోర్‌ కర్టన్‌తో కవర్‌ చేయాలి.
• ఇంట్లో ఎవరూ లేనప్పుడు ఇంటిలోపల, బయట కూడా కొన్ని లైట్లు వేసి ఉంచాలి.
• మీ ఇంటిని గమనించమని, మీకు నమ్మకమైన ఇరుగు పొరుగు వారికి చెప్పాలి.
• అల్మారా, కబోర్డులకు సంబంధించిన తాళాలను చెప్పుల స్టాండ్‌, పరుపులు, దిండ్ల కింద, అల్మారాపైన, డ్రెస్సింగ్‌ టేబుల్‌ తదితర ప్రదేశాల్లో పెట్టకూడదు. ఇతర రహస్య ప్రదేశాల్లో దాచుకోవాలి.
• మీరు బయటకు వెళ్లిన లేదా వెళ్తున్న విషయాన్ని సోషల్‌ మీడియాలో షేర్‌ చేయడం మంచిదికాదు. ఇది ఒక రకంగా నేరస్తులకు మీరు ఇంట్లో లేరనే సమాచారం అందించినట్లే.