Visit:
Hyderabad | శేరిలింగంపల్లి, మార్చి 03: ఇద్దరూ సాఫ్ట్‌వేర్‌ ఉద్యోగులు.. ప్రేమించి పెళ్లి చేసుకున్నారు. కానీ వాళ్ల కాపురం మాత్రం సజావుగా సాగలేదు. ఆరు నెలల్లోనే దంపతుల మధ్య మనస్పర్థలు మొదలయ్యాయి. చిన్న చిన్న విషయాలకే గొడవలు జరిగేవి. ఈ క్రమంలోనే జరిగిన గొడవతో మనస్తాపానికి గురైన భార్య.. బలవన్మరణానికి పాల్పడింది. అయితే వరకట్న వేధింపుల కారణంగానే తన కుమార్తె ఆత్మహత్య చేసుకుందని మృతురాలి తల్లి పోలీసులకు ఫిర్యాదు చేసింది.
వివరాల్లోకి వెళ్తే.. వికారాబాద్‌ జిల్లా తోర్‌మామిడి కమలాపురం ప్రాంతానికి చెందిన దేవిక (25) పుణేలోని ఎంబీఏ పూర్తి చేసి నగరంలోని సాఫ్ట్‌వేర్‌ కంపెనీలో ఉద్యోగం చేస్తుంది. ఆమెకు అదే కంపెనీలో పనిచేస్తున్న మంచిర్యాలకు చెందిన సద్గుర్తి సతీశ్‌ చంద్రతో పరిచయం ఏర్పడింది. ఆ పరిచయం కాస్త ప్రేమగా మారడంతో ఇద్దరూ పెళ్లి చేసుకోవాలని నిర్ణయించుకున్నారు. పెద్దలను ఒప్పించి గత ఆగస్టు 23వ తేదీన గోవాలో అంగరంగ వైభవంగా వివాహం చేసుకున్నారు. పెళ్లయిన అనంతరం దేవిక, సతీశ్‌ ఇద్దరూ రాయదుర్గం పరిధిలోని ప్రశాంతి హిల్స్‌లో కాపురం పెట్టారు. కానీ వారి ప్రేమ పెళ్లి ఎక్కువ రోజులు సంతోషంగా లేదు. కొద్దిరోజులకే ఇద్దరి మధ్య గొడవలు మొదలయ్యాయి. తరచూ ఏదో విషయంలో గొడవపడుతూనే ఉన్నారు.
ఈ క్రమంలోనే ఆదివారం రాత్రి 11 గంటలకు దేవిక, సతీశ్‌ చంద్ర గొడవపడ్డారు. దీంతో మనస్తాపానికి గురైన దేవిక తన గదిలోకి వెళ్లి లోపలి నుంచి గడియపెట్టుకుంది. సతీశ్‌ చంద్ర కూడా ఇంట్లో నుంచి బయటకు వెళ్లి అర్ధరాత్రి 12 గంటల తర్వాత తిరిగి వచ్చాడు. ఆ తర్వాత దేవిక గది తలుపులు పెట్టి ఉండటంతో గట్టిగా కొట్టి చూశాడు. కోపంతో లోపలి నుంచి గడియపెట్టి ఉండటంతో నిద్రపోయిందని భావించి తన గదిలోకి వెళ్లి నిద్రపోయాడు. తెల్లవారుజామున లేచిన సతీశ్‌ చంద్ర మరోసారి దేవిక గది తలుపులు తట్టినా స్పందించలేదు. ఉదయం పనిమనిషి వచ్చి తలుపుకొట్టిని దేవిక తలుపు తీయలేదు.
ఉదయం 10 గంటలకు దేవిక ఆఫీసుకు వెళ్లాల్సి ఉండగా.. అప్పటికీ తలుపులు తీయడంతో అనుమానం వచ్చిన సతీశ్‌ చంద్ర గది తలుపులు కొట్టాడు. అయినా డోర్‌ తీయకపోవడంతో.. తలుపులు బద్దలగొట్టి లోపలికి వెళ్లి చూడగా.. గదిలో ఉన్న సీలింగ్‌ ఫ్యాన్‌కు ఉరేసుకుని కనిపించింది. స్థానికుల ద్వారా సమాచారం అందుకున్న రాయదుర్గం పోలీసులు సంఘటనాస్థలికి చేరుకుని ఘటనాస్థలిని పరిశీలించారు. పోస్టుమార్టం నిమిత్తం మృతదేహాన్ని ఉస్మానియా ఆస్పత్రికి తరలించారు. ఈ మేరకు మృతురాలి తల్లి రామలక్ష్మీ ఫిర్యాదు మేరకు కేసు నమోదు చేసుకుని దర్యాప్తు చేపట్టారు. కట్నం కోసం తరచూ సతీశ్‌ చంద్ర వేధించడంతోనే తన కుమార్తె మనస్తాపానికి గురై ఆత్మహత్య చేసుకుందని దేవిక తల్లి పోలీసులకు ఫిర్యాదు చేసింది.
