ఉప్పల్‌ జంక్షన్‌లో..స్కై వాక్‌ రెడీ!

అత్యంత రద్దీగా ఉండే ఉప్పల్‌ జంక్షన్‌లో పాదచారుల భద్రతకు శాశ్వత భరోసా కల్పిస్తూ హెచ్‌ఎండీఏ అంతర్జాతీయ హంగులతో అకాశమార్గాన్ని (స్కైవాక్‌) నిర్మిస్తున్నది. రూ.25 కోట్ల అంచనా వ్యయంతో చేపట్టిన ఈ స్కై వాక్‌ పనులు తుది దశకు చేరుకున్నాయి.

• డిసెంబర్‌లో అందుబాటులోకి తీసుకువచ్చేలా పనులు
• కనువిందు చేస్తున్న లూప్‌ ఆకారపు నిర్మాణం

సిటీబ్యూరో, అక్టోబర్‌ 27 (నమస్తే తెలంగాణ) : అత్యంత రద్దీగా ఉండే ఉప్పల్‌ జంక్షన్‌లో పాదచారుల భద్రతకు శాశ్వత భరోసా కల్పిస్తూ హెచ్‌ఎండీఏ అంతర్జాతీయ హంగులతో అకాశమార్గాన్ని (స్కైవాక్‌) నిర్మిస్తున్నది. రూ.25 కోట్ల అంచనా వ్యయంతో చేపట్టిన ఈ స్కై వాక్‌ పనులు తుది దశకు చేరుకున్నాయి. డిసెంబర్‌లో అందుబాటులోకి తీసుకువచ్చేలా పనులను వేగవంతం చేసినట్లు అధికారులు గురువారం వెల్లడించారు.

మెట్రో తరహాలో అన్ని వర్గాల వారికి అందుబాటులో ఉండే విధంగా అంతర్జాతీయ ప్రమాణాలతో స్కైవాక్‌ను నిర్మిస్తున్నది. రామంతాపూర్‌-బోడుప్పల్‌ రోడ్‌కు, హబ్సిగూడ-ఎల్బీనగర్‌ వైపు మార్గాలను అనుసంధానం చేస్తూ పాదచారులు అన్ని వైపులా వెళ్లేందుకు వీలుగా ఈ జంక్షన్‌ చుట్టూ సర్కిల్‌ ఆకారంలో స్కై వాక్‌ రానున్నది. ఎలివేటెడ్‌ కారిడార్‌తో పాటు సూర్యకాంతి, వర్షం బారిన పడకుండా అన్ని జాగ్రత్త చర్యలు చేపడుతున్నారు. ఉప్పల్‌ మెట్రోస్టేషన్‌కు కనెక్టివిటి ఇవ్వనున్నారు. అత్యాధునిక లైంటింగ్‌, వీధి దీపాలు తదితర అలంకరణల నడుమ ఈ అకాశమార్గం అందుబాటులోకి రానున్నది.

ఉప్పల్‌ జంక్షన్‌ స్కై వాక్‌ విశేషాలు

• లూప్‌ ఆకారంలో ఎలివేటెడ్‌ వాక్‌వే నిర్మాణం పనులకు రూ.25 కోట్ల మేర ఖర్చు చేస్తున్నారు.
• స్కైవాక్‌ మొత్తం పొడవు 640.0 మీటర్లు
• వెడల్పు -వర్టికల్‌ వెడల్పు- 3, 4,6 మీటర్లు
• ఎత్తు -ఆరు మీటర్లు
• లిఫ్ట్‌, ఎస్కలేటర్స్‌, మెట్ల సౌకర్యం ఉంటుంది.
• ఆరు చోట్ల ఎగ్జిట్‌/ఎంట్రీ పాయింట్స్‌ ఉంటాయి. నాగోల్‌ రోడ్‌ మెట్రోస్టేషన్‌, రామంతాపూర్‌ రోడ్‌, జీహెచ్‌ఎంసీ థీమ్‌ పార్కు, వరంగల్‌ బస్టాప్‌ (జీహెచ్‌ఎంసీ కార్యాలయం వద్ద, ఉప్పల్‌ పోలీస్‌స్టేషన్‌ (ఎమ్మార్వో కార్యాలయం), ఉప్పల్‌ ఎలక్ట్రికల్‌ సబ్‌స్టేషన్‌ ఎదురుగా..
• ఆన్‌..ఆఫ్‌ స్టేషన్‌లో ఓ సౌకర్యవంతమైన స్టోర్‌ (9300 స్కేర్‌ ఫీట్‌ విస్తీర్ణం) ఏర్పాటు చేస్తారు.