వర్షాకాలంలో రోడ్ల తవ్వకాలపై నిషేధానికి తూట్లు

వర్షాకాలంలో రోడ్లను తవ్వడాన్ని నిషేధిస్తున్నాం.. రోడ్లను తవ్వితే కఠిన చర్యలు తీసుకుంటామంటూ జీహెచ్‌ఎంసీ కమిషనర్‌ ఇచ్చిన ఆదేశాలు క్షేత్రస్థాయిలో అమలుకు నోచుకోవడం లేదు. జీహెచ్‌ఎంసీ సర్కిల్‌ -18లోని పలు ప్రాంతాల్లో జలమండలితో పాటు ఇతర ప్రభుత్వ విభాగాలు జూన్‌ నెలలో సైతం రోడ్లను యథేచ్చగా తవ్వుతూ పనులు చేస్తున్నాయి.

• కమిషనర్‌ ఆదేశాలను తుంగలో తొక్కి పనులు
• రోడ్డు రిస్టోరేషన్‌లో జాప్యం
• ప్రధాన రోడ్లపై ట్రాఫిక్‌కు ఇబ్బందులు

బంజారాహిల్స్‌, జూన్‌ 18: వర్షాకాలంలో రోడ్లను తవ్వడాన్ని నిషేధిస్తున్నాం.. రోడ్లను తవ్వితే కఠిన చర్యలు తీసుకుంటామంటూ జీహెచ్‌ఎంసీ కమిషనర్‌ ఇచ్చిన ఆదేశాలు క్షేత్రస్థాయిలో అమలుకు నోచుకోవడం లేదు. జీహెచ్‌ఎంసీ సర్కిల్‌ -18లోని పలు ప్రాంతాల్లో జలమండలితో పాటు ఇతర ప్రభుత్వ విభాగాలు జూన్‌ నెలలో సైతం రోడ్లను యథేచ్చగా తవ్వుతూ పనులు చేస్తున్నాయి. దీంతో ప్రధాన రోడ్లతో పాటు కాలనీ రోడ్లపై వాహనదారులు తీవ్ర ఇబ్బందులు ఎదుర్కొంటున్నారు. తవ్విన రోడ్లను రిస్టోరేషన్‌ చేసినా వ్యర్థాలను తొలగించడంతో విపరీతమైన జాప్యం చేస్తుండడంతో పరిస్థితి మరింత దిగజారుతోందని ఆరోపణలు వినిపిస్తున్నాయి. బంజారాహిల్స్‌, జూబ్లీహిల్స్‌, వేంకటేశ్వరకాలనీ డివిజన్ల పరిధిలోని పలు ప్రాంతాల్లో మే 25 తర్వాత కూడా రోడ్ల తవ్వకాలు కొనసాగిస్తున్నారు. కొన్ని ప్రాంతాల్లో పనులను జీహెచ్‌ఎంసీ అధికారులు ఆపేసినా రోడ్ల రిస్టోరేషన్‌ను వేగవంతం చేయకపోవడంతో వర్షపునీటితో ప్రమాదం పొంచి ఉంది.

బంజారాహిల్స్‌ రోడ్‌ నెం.14లో శబ్దాలయ వెనకాలనుంచి జుడియో స్టోర్‌ దాకా జీహెచ్‌ఎంసీ ఆధ్వర్యంలో వరదనీటి లైన్‌ పనులు చేపట్టారు. నిర్దేశిత గడువులో రోడ్డు రిస్టొరేషన్‌ పనులు చేయకపోవడంతో రోడ్డుపై రాకపోకలకు తీవ్ర అంతరాయం ఏర్పడుతోంది. బంజారాహిల్స్‌ రోడ్‌ నెం.13 నుంచి బంజారాహిల్స్‌ రోడ్‌ నెం .లో కొత్తగా నిర్మిస్తున్న కార్పొరేట్‌ ఆస్పత్రికి సంబంధించిన అండర్‌ గ్రౌండ్‌ విద్యుత్‌ లైన్‌ కోసం జీహెచ్‌ఎంసీ నుంచి రోడ్డు కటింగ్‌ అనుమతి తీసుకుని పనులు పూర్తిచేశారు. అయితే, 15రోజుల క్రితమే రిస్టోరేషన్‌ పనులు పూర్తయినా శిథిలాలు తొలగించకపోవడంతో అసలే ఇరుకైన రోడ్డు మరింత కుంచించుకుపోయి వాహనదారులకు ఇబ్బందులు కలుతున్నాయి. బంజారాహిల్స్‌ రోడ్‌ నెం.14నుంచి శబ్దాలయ స్టూడియోస్‌, కేబీఆర్‌ పార్కు చౌరస్తా మీదుగా జలమండలి ఆధ్వర్యంలో మంచినీటి లైన్‌ కోసం జూన్‌ 10 నుంచి రోడ్డును తవ్వేసి పనులు చేశారు. వారంరోజులు గడిచినా రోడ్డు రిస్టోరేషన్‌ పనులు పూర్తిచేయకపోవడంతో అత్యంత రద్దీ చౌరస్తాలో సమస్యలు తలెత్తాయి. బంజారాహిల్స్‌ రోడ్‌ నెం.14లోని రాఘవేంద్ర కన్స్‌ట్రక్షన్స్‌ నుంచి జుడియో స్టోర్‌ దాకా మంచినీటి లైన్‌ కోసం ప్రత్యేకంగా లైన్‌ పనులు చేపట్టారు. అయితే, వర్షాకాలంలో రోడ్డు కటింగ్‌ నిషేధించిన తర్వాత పనులు ప్రారంభించడంతో 10 రోజుల క్రితం జీహెచ్‌ఎంసీ అధికారులు పనులు నిలిపివేయడంతో రోడ్డు మొత్తం గతుకులమయంగా మారింది. ఆగస్టు దాకా రోడ్డును తవ్వే అవకాశం లేకపోవడంతో పరిస్థితి మరింత దారుణంగా తయారయ్యే అవకాశం ఉంది.