Visit:
హైద‌రాబాద్ : రాష్ట్ర రాజ‌ధాని హైద‌రాబాద్ న‌గ‌రంలో మ‌ళ్లీ వ‌ర్షాలు కురియ‌నున్నాయి. గ‌త కొద్ది రోజుల నుంచి న‌గ‌రంలో ఎండ‌లు దంచికొడుతున్న విష‌యం తెలిసిందే. సోమ‌వారం మ‌ధ్యాహ్నం నుంచి వాతావ‌ర‌ణం కాస్త చ‌ల్ల‌బ‌డింది. రాత్రి స‌మ‌యంలో పలు ప్రాంతాల్లో చిరుజ‌ల్లులు కురిశాయి. ఇక న‌గ‌రంలో మంగ‌ళ‌వారం తేలిక‌పాటి నుంచి మోస్త‌రు వ‌ర్షాలు కురిసే అవ‌కాశం ఉంద‌ని హైద‌రాబాద్ వాతావ‌ర‌ణ కేంద్రం హెచ్చ‌రించింది. ఈ మేర‌కు హైద‌రాబాద్ న‌గ‌రానికి ఎల్లో అల‌ర్ట్ జారీ చేసింది. రాష్ట్ర వ్యాప్తంగా కూడా పలు ప్రాంతాల్లో భారీ వ‌ర్షాలు కురిసే అవ‌కాశం ఉంద‌ని ఐఎండీ హెచ్చ‌రించింది.
హైద‌రాబాద్‌లోని పలు ప్రాంతాల్లో బుధ‌వారం ఉద‌యం వ‌ర‌కు 0.10 మి.మీ. నుంచి 2.40 మి.మీ. వ‌ర్ష‌పాతం న‌మోద‌య్యే అవ‌కాశం ఉంద‌ని అధికారులు పేర్కొన్నారు. చాంద్రాయ‌ణ‌గుట్ట, రాజేంద్ర‌న‌గ‌ర్, మ‌ల‌క్‌పేట, ఎల్బీన‌గ‌ర్, చార్మినార్, బండ్ల‌గూడ, యూసుఫ్‌గూడ ఏరియాల్లో 2.50 మి.మీ. నుంచి 15.50 మి.మీ. వ‌ర్ష‌పాతం న‌మోద‌య్యే అవ‌కాశం ఉంది.
