నిషేధం ఉన్నా ప్రైవేట్‌ జెట్‌లకు అనుమతి!

హైదరాబాద్‌లోని బేగంపేట విమానాశ్రయంలో చట్ట విరుద్ధంగా ప్రైవేట్‌ జెట్లు, హెలీకాప్టర్లు రాకపోకలు సాగిస్తున్నాయి. వాణిజ్యయాన(కమర్షియల్‌) విమానాలపై నిషేధం ఉన్నప్పటికీ పలువురు ప్రముఖులు వాణిజ్యేతర విమానాలుగా తప్పుడు పత్రాలు సమర్పించి ఈ విమానాశ్రయం సేవలు వినియోగించుకుంటున్నట్లు ఆరోపణలున్నాయి.

• బేగంపేట ఎయిర్‌పోర్టు నుంచి జోరుగా విమానాలు

హైదరాబాద్‌, జూన్‌ 20 (నమస్తే తెలంగాణ): హైదరాబాద్‌లోని బేగంపేట విమానాశ్రయంలో చట్ట విరుద్ధంగా ప్రైవేట్‌ జెట్లు, హెలీకాప్టర్లు రాకపోకలు సాగిస్తున్నాయి. వాణిజ్యయాన(కమర్షియల్‌) విమానాలపై నిషేధం ఉన్నప్పటికీ పలువురు ప్రముఖులు వాణిజ్యేతర విమానాలుగా తప్పుడు పత్రాలు సమర్పించి ఈ విమానాశ్రయం సేవలు వినియోగించుకుంటున్నట్లు ఆరోపణలున్నాయి. అయితే, ఈ విమానాశ్రయం జనావాసాల మధ్య ఉండడంతో సమీప ప్రాంతాల జనం తీవ్ర భయాందోళనలకు గురవుతున్నారు.

2008 ఒప్పందానికి విరుద్ధంగా

విమానయాన మంత్రిత్వశాఖ, శంషాబాద్‌లోని రాజీవ్‌గాంధీ అంతర్జాతీయ విమానాశ్రయం మధ్య 2008లో కుదిరిన ఒప్పందం ప్రకారం బేగంపేట్‌ విమానాశ్రయం నుంచి ఎటువంటి కమర్షియల్‌ ఫ్లైట్స్‌ సేవలు కొనసాగించకూడదు. ప్రభుత్వ ప్రముఖులు, పోలీస్‌, రక్షణ రంగం సహా నాన్‌- కమర్షియల్‌కు సంబంధించిన ఇతర విమానాలకు మాత్రమే అనుమతి ఉంది. అయినా అక్కడ నిత్యం చిన్నతరహా కమర్షియల్‌ ఫ్లైట్లు రాకపోకలు సాగిస్తున్నాయి.

ఎంతోకాలంగా ఇది జరుగుతున్నా ఎవ్వరూ పెద్దగా పట్టించుకోలేదు. కానీ ఇటీవల అహ్మదాబాద్‌లో ఎయిర్‌ ఇండియా విమాన ప్రమాదం అనంతరం అందరి దృష్టి బేగంపేట ఎయిర్‌పోర్టుపై పడింది. చుట్టూ దట్టమైన జనావాసాల మధ్య ఈ విమానాశ్రయం ఉండడంతో స్థానికులు ఎప్పుడే ప్రమాదం జరుగుతుందోనని భయాందోళనలకు గురవుతున్నారు. పలువురు పారిశ్రామికవేత్తలు, కార్పొరేట్‌ ప్రముఖులు, రియల్‌ ఎస్టేట్‌ వ్యాపారులు, సినీనటులు, వారి కుటుంబ సభ్యులు తరచూ ఈ విమానాశ్రయాన్ని వినియోగిస్తున్నారు. అహ్మదాబాద్‌ విమాన ప్రమాద ఘటన అనంతరం కూడా ఈ రాకపోకలు యథావిథిగా కొనసాగినట్లు స్థానికులు చెబుతున్నారు.

నెలలో కనీసం 15-20 జెట్‌లు

• బేగంపేట్‌ విమానాశ్రయంలో ఏటీసీ సేవలతోపాటు ప్రభుత్వ ప్రముఖులు, రక్షణ రంగం, పోలీస్‌, నాన్‌-కమర్షియల్‌ విమానాలకు మాత్రమే అనుమతి ఉంది.
• నగరంలోని పలువురు సెలబ్రిటీలు, వ్యాపారవేత్తలు తరచూ బేగంపేట్‌ ఎయిర్‌పోర్టు నుంచి హెలీకాప్టర్లలో ప్రయాణం సాగిస్తున్నారు
• నెలలో కనీసం 15-20 బిజినెస్‌ జెట్‌లు ఇక్కడినుంచి ప్రయాణం సాగిస్తున్నటు స్థానికులు చెబుతున్నాయి
• అహ్మదాబాద్‌లో విమాన ప్రమాద ఘటన తరువాత కూడా ప్రైవేట్‌ జెట్‌ల రాకపోకలు కొనసాగాయి.
• బేగంపేట్‌ నుంచి కమర్షియల్‌ జెట్‌లు ప్రయాణం సాగించడం కేంద్ర ఏవియేషన్‌ శాఖ ఆదేశాల ఉల్లంఘన కిందకు వస్తుందని అధికారవర్గాలు చెబుతున్నాయి
• జనావాసాల మధ్య ఉండడంతో ఆహారం కోసం పక్షుల సంచారం కూడా అధికంగా ఉంటుదని, దీంతో ప్రమాదాలకు ఆస్కారం ఎక్కువని నిపుణులు అభిప్రాయపడుతున్నారు.