ప్రయాణం..కావొద్దు ప్రమాదం ..!

దసరా పండుగకు ఊరెళ్తున్నారా ? ఓ పక్క ఆర్టీసీ బస్సులు రద్దీ.. మరోపక్క రైళ్లు కిటకిట.. ఇంకో వైపు ట్రావెల్స్‌ భారీ వసూళ్లు.. వీటి మధ్య సొంత వాహనంలోనే హాయిగా ప్రయాణించడం మేలు అనుకొని నగరవాసులు తమ సొంతూళ్లకు బయలుదేరుతుంటారు.

• సేఫ్‌ జర్నీకి జాగ్రత్తలు తప్పనిసరి

సిటీబ్యూరో, అక్టోబర్‌ 11 (నమస్తే తెలంగాణ) : దసరా పండుగకు ఊరెళ్తున్నారా ? ఓ పక్క ఆర్టీసీ బస్సులు రద్దీ.. మరోపక్క రైళ్లు కిటకిట.. ఇంకో వైపు ట్రావెల్స్‌ భారీ వసూళ్లు.. వీటి మధ్య సొంత వాహనంలోనే హాయిగా ప్రయాణించడం మేలు అనుకొని నగరవాసులు తమ సొంతూళ్లకు బయలుదేరుతుంటారు. ప్రయాణించాల్సిన దూరం, మార్గంపై ముందస్తు ప్రణాళిక వేసుకుంటే ఎలాంటి ప్రమాదానికి గురి కాకుండా, హాయిగా గమ్యస్థానాన్ని చేరుకోవచ్చని నిపుణులు చెబుతున్నారు.

వాహన పరిమితికి సరిపడా ఎంతమంది వెళ్లొచ్చో..అంతేమంది ప్రయాణిస్తే ఎలాంటి సమస్యలు ఎదురుకావని సూచిస్తున్నారు. రవాణా శాఖ అధికారులు రోడ్డు నిబంధనలపై అవగాహన కల్పిస్తున్నారు. సీటుబెల్ట్‌, హెల్మెట్లు ప్రాణ రక్షకులు అని తప్పకుండా వాటిని ధరించాలని చెబుతున్నారు. మరోవైపు వాహన సంఘాలు సైతం సెల్ఫీ విత్‌ సీట్‌ బెల్ట్‌ కార్యక్రమంపై ప్రచారం చేస్తున్నాయి.

ఈ సూచనలు పాటించండి..

• గమ్యాన్ని ఏ మార్గంలో చేరుకోవచ్చనే విషయంపై అవగాహన పెంచుకోవాలి. మార్గ సూచికలు ఉన్నా.. సరే ప్రత్యామ్నాయ ప్రయత్నాలు విరమించుకుంటే మంచిది. ప్రమాద జోన్‌లో అప్రమత్తంగా వ్యవహరించాలి. రోడ్డుకు ఎడమ వైపు ఏర్పాటు చేసే బ్లాక్‌ స్పాట్‌ సూచికలను గమనిస్తూ ఉండాలి.
• రాత్రివేళల్లో ప్రయాణం చేయాల్సి వస్తే అప్రమత్తంగా ఉండాలి. సాధ్యమైనంత వరకు సాధారణ వేగంలోనే ఉండాలి. ఏకధాటిగా వాహనాలు నడపకుండా మధ్యలో కొంత విశ్రాంతి తీసుకోవడం మంచిది. నిద్రకు దూరంగా ఉన్నవారిని ముందు సీట్లలో కూర్చోబెట్టాలి. రాత్రివేళ ఎక్కువగా జరిగే ప్రమాదాలు ఆగి ఉన్న వాహనాలే కారణమవుతున్నాయి. ఎక్కడైనా మన వాహనాలను నిలపాల్సి వస్తే ఇండికేటర్లు ఆన్‌ చేసి ఉండటం శ్రేయస్కరం.
• ప్రయాణంలో సాంకేతిక సమస్యలు తలెత్తకుండా చూసుకోవాలి. స్టెప్నీ తప్పనిసరిగా ఉండేలా జాగ్రత్త తీసుకోవాలి.
• ప్రయాణం మధ్యలో వాహనం బ్రేక్‌డౌన్‌, ఇతర రిపేర్లు ఎదురైతే కారు ఏం కంపెనీయో దానిని బట్టి టోల్‌ ఫ్రీ నంబర్‌కు ఫిర్యాదు చేయొచ్చు. ఆ టీం మీకు 3-4 గంటల్లోపు అందుబాటులోకి వస్తుంది. వివిధ కస్టమర్ల సేవా కేంద్రాల నంబర్లను మీ దగ్గర ఉంచుకోవాలి. ఫస్ట్‌ ఎయిడ్‌ కిట్‌ వెంట పెట్టుకోవడం మంచిది.