నగరంలో యథేచ్ఛగా పార్కింగ్‌ దోపిడీ
- బల్దియా పార్కింగ్‌ నిబంధనలకు నీళ్లు
- వాణిజ్య సముదాయాలు,
- దవాఖానలు, థియేటర్లలో ఇష్టారాజ్యం
- నూతన పార్కింగ్‌ విధానాన్ని పట్టించుకోని సంస్థలు
- ఒక్కచోట.. తీరొక్క రీతిలో వసూలు
- ఫిర్యాదు చేయాలంటున్న ఈవీడీఎం విభాగం
- సాయికుమార్‌ మార్కెటింగ్‌ ఉద్యోగి. వ్యక్తిగత పనిపై సికింద్రాబాద్‌ క్లాక్‌టవర్‌ సమీపంలోని ఓ కాంప్లెక్స్‌లో ద్విచక్ర వాహనాన్ని నిలిపివెళ్లాడు.10 నిమిషాల్లోపే పనిముగించుకొని వెళ్తుండగా పార్కింగ్‌ ఫీజు అంటూ రూ.20 వసూలు చేశారు.
- పల్లవిరెడ్డి తన తండ్రికి బాగోలేదని బంజారాహిల్స్‌లోని ప్రైవేటు దవాఖానకు వెళ్లింది. డాక్టర్‌ను కలిసి అరగంటలోపే వెనక్కి వచ్చినా పార్కింగ్‌ ఫీజంటూ రూ.50 తీసుకున్నారు.
- ఇవీ నగరంలో ఇష్టారాజ్యంగా సాగుతున్న పార్కింగ్‌ దోపిడీకి మచ్చుతునకలు.
- వాహనదారులకు ఊరటనిస్తూ బల్దియా తెచ్చిన నూతన పార్కింగ్‌ విధానాన్ని చాలాచోట్ల బేఖాతర్‌ చేస్తున్నారు. కొన్నిచోట్ల దబాయించి వసూలు చేస్తుండగా, మరికొన్నిచోట్ల నిర్వహణ (మెయింటెనెన్స్‌) పేరుతో దోచుకుంటున్నారు. పార్కింగ్‌ రసీదుతో నేరుగా లేదా ట్విటర్‌ ద్వారా ఫిర్యాదు చేస్తే భారీ జరిమానా విధించి కఠిన చర్యలు తీసుకుంటామని ఈవీడీఎం విభాగం అధికారులు సూచిస్తున్నారు.
కొండాపూర్‌/బేగంపేట పార్కింగ్‌ ఎక్కడెక్కడ ఉచితమంటే?
- నగరమంతా ఎక్కడైనా సరే.. ఏ కాంప్లెక్సైనా సరే మొదటి అరగంట పార్కింగ్‌ ఉచితమే.
- ఐమాక్స్‌ లాంటి మల్టీస్క్రీన్‌లు ఉన్న కాంప్లెక్స్‌లలో పార్కింగ్‌ పూర్తిగా ఉచితం.
- ఆర్టీసీ క్రాస్‌ రోడ్స్‌లో ఉన్న సంధ్య, సుదర్శన్‌ లాంటి సింగిల్‌ స్క్రీన్‌ థియేటర్లలో మాత్రం ఉచితం వర్తించదు.
- కమర్షియల్‌ కాంప్లెక్స్‌ లలో మొదటి 30 నిమిషాలు ఉచితం. అదే కాంప్లెక్స్‌లో షాపింగ్‌ చేసి రసీదు చూపిస్తే మరో అరగంట వరకు ఉచితం.
- ఏదైనా హాస్పిటల్‌లో ఇన్‌పేషెంట్‌గా చేరితే.. డిశ్ఛార్జి అయ్యే వరకు పార్కింగ్‌ ఫీజు చెల్లించనవసరం లేదు. అయితే అందుకు ఆధారాలు చూపించాలి.
- ఏదైనా హాస్పిటల్‌లో విజిటర్‌గా వెళితే మాత్రం వారికి అక్కడ ఉండే పెయిడ్‌ పార్కింగ్‌ వర్తిస్తుంది. కానీ మొదటి అరగంట మాత్రం ఉచితమే.
ఇవీ ఉదాహరణలు
- సికింద్రాబాద్‌ క్లాక్‌ టవర్‌ నవకేతన్‌ కాంప్లెక్స్‌ లో ఎస్‌ఆర్‌ ఎంటర్‌ ప్రైజెస్‌ పేరుతో ఓ పార్కింగ్‌ ఏజెన్సీ ముక్కు పిండి వసూలు చేస్తున్నది. ఒక్కో ద్విచక్ర వాహనానికి రూ 20 వరకు, కార్లకు 40 నుంచి 100 వరకు రుసుం బాదుతున్నారు.
- మదీనాగూడ-చందానగర్‌ ప్రధాన రహదారిలో ఉన్న ఓ షాపింగ్‌ మాల్‌లో ద్విచక్ర వాహనంతో అలా పార్కింగ్‌ చేసి ఐదు నిమిషాల్లోనే తిరిగి అక్కడి నుంచి వెళ్లిపోతే రూ. 20లు రసీదు చేతులో పెడుతున్నారు. ఉచిత పార్కింగ్‌ పాలసీ ఆమలు ఏ మాత్రం నోచుకోవడం లేదు.
- జూబ్లీహిల్స్‌లోని ఓ ప్రధాన కార్పొరేట్‌ ఆసుపత్రిలో మొదటి అరగంట ఉచిత పార్కింగ్‌ అస్సలు అమలు కావడం లేదు. మొదటి 3 గంటలు తప్పనిసరనే నిబంధనతో బైకులు, కార్లకు ముక్కు పిండి వసూలు చేస్తున్నారు. రిపోర్టులు తీసుకునేందుకు వెళ్లినా, టెస్టులు ఇచ్చేందుకు వెళ్లినా, డాక్టర్‌ అపాయింట్‌మెంట్‌ చూపించినా.. పార్కింగ్‌ ఫీజు మాత్రం తప్పనిసరిగా వసూలు చేస్తున్నారు.
పార్కింగ్‌ టికెట్లు ఇలా ఉండాలి
బల్దియా మార్గనిర్దేశాల మేరకు అన్ని వాణిజ్య సంస్థలు, నిర్దిష్టమైన నమూనాలో పార్కింగ్‌ టిక్కెట్లను ముద్రించాలి. టిక్కెట్లపై పార్కింగ్‌ నిర్వహణ ఏజెన్సీ పేరు, చిరునామా, మొబైల్‌ నెంబరు ఉండాలి. పార్కింగ్‌ ఫీజు వసూలు చేస్తే ‘పెయిడ్‌’అని, ఉచితమైతే ఎగ్జెంప్టెడ్‌’ అని స్టాంపు వేయాలి. పార్కింగ్‌ ఇన్‌ఛార్జి సంతకంతో కూడాని పార్కింగ్‌ టిక్కెట్లను వాహనాలు నిలిపిన వారందరికీ ఇవ్వాలి. పా ర్కింగ్‌ టికెట్లపై ఇన్‌కమింగ్‌, అవుట్‌ గోయింగ్‌ తప్పనిసరిగా ముద్రించాలి. పార్కింగ్‌ పాలసీపై జీహెచ్‌ఎంసీ మార్గనిర్దేశకాలను ప్రతి కాంప్లెక్స్‌లో పెద్ద పెద్ద అక్షరాలతో డిస్‌ప్లే చేయాలి.
అసలు లక్ష్యమిది…
నగరంలో ఎక్కడైనా సరే మొదటి 30 నిమిషాలు ఉచితంగా పార్కింగ్‌ చేసుకోవచ్చు. 30 నిమిషాల నుంచి గంట వరకైతే… షాపింగ్‌ రసీదు చూపిస్తేనే ఉచిత పార్కింగ్‌ సౌలభ్యం ఉంటుంది. ఆపై సమయాలకు సంబంధిత మాల్‌ నిబంధనల ప్రకారం ఛార్జీలు వసూలు చేయాలి. ఇది ఉచిత పార్కింగ్‌ విధానాన్ని ప్రకటిస్తూ పురపాలక శాఖ 2018 మార్చి 20న ఉత్తర్వులు జారీ చేసింది. కాగా, సింగిల్‌ స్క్రీన్‌ థియేటర్ల యజమానుల కోరిక మేరకు ఉచిత పార్కింగ్‌ నుంచి వారికి ఇటీవల మినహాయింపునిచ్చింది. ఈ మినహాయింపును సాకుగా చూపి అనేక కమర్షియల్‌ కాంప్లెక్స్‌లు బల్దియా ఆదేశాలకు వ్యతిరేకంగా పార్కింగ్‌ ఫీజు వసూలు చేస్తున్నారు.
ఎలా వసూలు చేస్తున్నారంటే..
పార్కింగ్‌ ఫీజు వసూలు చేసే విషయమై బల్దియా విడుదల చేసిన మార్గనిర్దేశాలపై చాలా మందికి అవగాహన లేకపోవడం వల్లే ఆయా కాంప్లెక్స్‌లు అడ్డగోలు వసూళ్లకు దిగుతున్నాయి. ఏదైనా ఓ కాంప్లెక్స్‌లోకి ప్రవేశించగానే.. బల్దియా ఉత్తర్వులతో నిమిత్తం లేకుండా ‘ఇదిగో..పెయిడ్‌ పార్కింగ్‌’ అంటూ ఓ రసీదు చేతిలో పెడుతున్నారు. ఏదైనా చెప్పబోతే..‘ఇక్కడింతే’ అని నిర్లక్ష్యంగా సమాధానమిస్తున్నారు. ద్విచక్ర వాహనానికి గంటకు రూ.10 నుంచి 30 వరకు వసూలు చేస్తున్నారు. కార్లకు రూ.40 నుంచి వంద వరకు ఉంటుం ది. పార్కింగ్‌ పాలసీపై బల్దియా మార్గదర్శకాలేవీ అక్కడ కనిపించేలా ఉంచరు. పార్కింగ్‌ వసూలు చేసేవారికి వీటిపై అవగాహన ఉండదు. దీంతో చాలా సార్లు వాహనదారులకు, పార్కింగ్‌ నిర్వాహకులకు ఘర్షణ జరుగుతూనే ఉంటుంది. కొన్ని కాంప్లెక్స్‌లు పార్కింగ్‌ నిర్వహణను బయటి వ్యక్తులకు అప్పగిస్తున్నాయి. అటువంటి వారు ఇష్టానుసారంగా వసూలు చేస్తున్నారు. అన్ని రకాల అనుమతులున్నాయి కాబట్టి తప్పనిసరిగా చెల్లించాల్సిందేనని దబాయిస్తుంటారు.
ఎక్కడ ఉచితం?
- నగరమంతా ఎక్కడైనా సరే.. ఏ కాంప్లెక్సైనా సరే మొదటి అరగంట పార్కింగ్‌ ఉచితమే.
- ఐమాక్స్‌ లాంటి మల్ట్రీ స్క్రీన్‌లు ఉన్న కాంప్లెక్స్‌లలో పార్కింగ్‌ పూర్తిగా ఉచితం
- ఆర్టీసీ క్రాస్‌ రోడ్స్‌లో ఉన్న సంధ్య, సుదర్శన్‌ లాంటి సింగిల్‌ స్క్రీన్‌ థియేటర్లలో మాత్రం ఉచితం వర్తించదు
- కమర్షియల్‌ కాంప్లెక్స్‌ లలో మొదటి 30 నిమిషాలు ఉచితం. అదే కాంప్లెక్స్‌లో షాపింగ్‌ చేసి రశీదు చూపిస్తే మొదటి గంట వరకు ఉచితం
- ఏదైనా హాస్పిటల్‌లో ఇన్‌పేషెంట్‌గా చేరితే.. డిశ్చార్జి అయ్యే వరకు పార్కింగ్‌ ఫీజు చెల్లించనవసరం లేదు. అయితే అందుకు ఆధారాలు చూపించాలి
- ఏదైనా హాస్పిటల్‌లో విజిటర్‌గా వెళ్తే మాత్రం అక్కడ ఉండే పెయిడ్‌ పార్కింగ్‌ వర్తిస్తుంది. కానీ మొదటి అరగంట మాత్రం ఉచితమే.
- ఎన్‌ఫోర్స్‌మెంట్‌ సెల్‌కు ఫిర్యాదు చేయండి
- మీ పార్కింగ్‌ రసీదు లేదా టికెట్‌పై ఇన్‌కమింగ్‌, అవుట్‌ గోయింగ్‌ సమయాలు ముద్రిం చి ఉండేలా చూడాలని ఎన్‌ఫోర్స్‌మెంట్‌ సెల్‌ విభాగం సూచించింది. బల్దియా ఆదేశాలకు వ్యతిరేకంగా పార్కింగ్‌ వసూలు చేస్తున్న వారిని నియంత్రించేందుకు నగర పౌరులు తమ వంతు బాధ్యతగా ఫిర్యాదులు చేయాలని చెప్పింది. ఎక్కడైనా అక్రమంగా పార్కింగ్‌ ఫీజు వసూలు చేసినైట్లెతే తగిన ఆధారాలతో ఫొటో తీసి ఆన్‌లైన్‌లో ఎన్‌ఫోర్స్‌మెంట్‌ విజిలెన్స్‌ డిజాస్టర్‌ మేనేజ్‌మెంట్‌ విభాగానికి పంపితే వారికి పెనాల్టీ విధిస్తామని అధికారులు స్పష్టం చేశారు. ఈవీడీఎం ట్విట్టర్‌ ఖాతాకు కానీ, జీహెచ్‌ఎంసీ టోల్‌ఫ్రీ 040-21111111 నంబరులో కానీ సమాచారం అందిస్తే రూ.50వేల వరకు జరిమానా విధిస్తామని బల్దియా ఎన్‌ఫోర్స్‌మెంట్‌ విభాగం తెలియజేసింది.
Read Today's Latest Hyderabad News in Telugu and Telugu News
- Follow Us :
-
