పటాకులతో జర పైలం

దీపావళి పండుగ జీవితాల్లో వెలుగులు నింపాలి. కానీ నిర్లక్ష్యం, చిన్నపాటి తప్పిదాలతో కొందరు కంటి చూపును కోల్పోయి జీవితాన్ని అంధకారం చేసుకుంటున్నారు. ఈ నేపథ్యంలో చిన్నపాటి జాగ్రత్తలు, అప్రమత్తతో దీపావళిని ఆనందోత్సాహాలతో జరుపుకోవాలంటూ.. ప్రజలకు సూచిస్తున్నారు కంటి వైద్యనిపుణులు.

సిటీబ్యూరో: దీపావళి పండుగ జీవితాల్లో వెలుగులు నింపాలి. కానీ నిర్లక్ష్యం, చిన్నపాటి తప్పిదాలతో కొందరు కంటి చూపును కోల్పోయి జీవితాన్ని అంధకారం చేసుకుంటున్నారు. ఈ నేపథ్యంలో చిన్నపాటి జాగ్రత్తలు, అప్రమత్తతో దీపావళిని ఆనందోత్సాహాలతో జరుపుకోవాలంటూ.. ప్రజలకు సూచిస్తున్నారు కంటి వైద్యనిపుణులు. ఈ దీపావళి సమయంలో ప్రజలు, చిన్నారులు జాగ్రత్తలు పాటించి, ఆనందంగా పండుగను జరుపుకోవాలని సరోజి దేవి కంటి దవాఖాన మాజీ సూపరింటెండెంట్‌ డాక్టర్‌ రవీందర్‌గౌడ్‌ ప్రజలకు విజ్ఞప్తి చేశారు.

జాగ్రత్తలివి..

• మైదానాలు, ఖాళీ స్థలాల్లో మాత్రమే పటాకులు కాల్చాలి.
• పిల్లలు పటాకులు కాల్చే సమయంలో పెద్దవారు కచ్చితంగా వెంట ఉండాలి. పిల్లలను ఒంటరిగా పటాకులను కాల్చనివ్వద్దు.
• పటాకులను కాల్చే సమయంలో కండ్లకు ప్రొటెక్టడ్‌ గ్లాసెస్‌ను పెట్టుకోవడం ఉత్తమం.
• దీపాలకు దగ్గరగా పటాకులను పెట్టరాదు.
• పొడవైన పూల చెడితో మాత్రమే పటాకులను పేల్చడం చేయాలి.
• పటాకులను నేరుగా అగ్గి పుల్లతో లేదా కాగితాలతో అంటించడం ప్రమాదకరం.
• కాల్చిన వెంటనే పటాకుల వద్ద వెళ్లి చూడొద్దు. అవి కొన్నిసార్లు పేలిపోవడం వల్ల ప్రమాదం జరగొచ్చు.
• తారాజువ్వలు, రాకెట్లు, చిచ్చుబుడ్లు వంటివి పైన రంగుల వెలుగులు వెదజల్లుతున్న సమయంలో వాటిని పైకి ముఖం పెట్టి చూడకూడదు. అలా చేయడం వల్ల వాటి నుంచి వెలువడే నిప్పురవ్వలు కండ్లలో పడి చూపు దెబ్బతినే ప్రమాదమున్నది
• నాణ్యమైన, గుర్తింపు గల కంపెనీలకు చెందిన పటాకులను మాత్రమే కొనుగోలు చేయాలి.
• చిచ్చుబుడ్లు, రాకెట్లు, ఫూల చడీలను వెలిగించే సమయంలో వాటిని తలకు దూరంగా పెట్టి వెలిగించాలి.కాలిపోయిన వెంటనే వాటికి దగ్గరగా ముఖం పెట్టి చూడటం చాలా ప్రమాదకరం.
• పెట్రోల్‌ బంక్‌లు, గ్యాస్‌ డిపోలు, గుడిసెలు, తాటిపత్రాలతో కట్టిన దుకాణాలు, మండే సామర్థ్యం గల దుకాణాలు, ఇతర కేంద్రాల వద్ద పటాకులను కాల్చరాదు.
• ముందుజాగ్రత్తగా దగ్గరలో కనీసం రెండు బక్కెట్ల నీటిని అందుబాటులో పెట్టుకోవాలి.
• చిన్నచిన్న కాలిన గాయాలు జరిగిన వెంటనే గాయంపై నీటిని పోయాలి. ఒంటికి మంటలు అంటుకున్న సందర్భంలో శుభ్రమైన కాటన్‌ బెడ్‌షీట్‌, దుప్పటితో బాధితులకు మంటలను ఆర్పివేసి ఆస్పత్రికి తరలించాలి.