44 కాలనీల్లో క్రమబద్ధీకరణకు మార్గదర్శకాలు

హైదరాబాద్‌, మేడ్చల్‌ మల్కాజిగిరి, రంగారెడ్డి జిల్లాల పరిధిలోని 44 కాలనీల ప్రజలకు రెవెన్యూ శాఖ తీపికబురు అందించింది.

• జీవో 118 మార్గదర్శకాలు విడుదల
• 20 వరకు దరఖాస్తుల స్వీకరణ
• గజానికి ఫీజు రూ.250,ప్రాసెసింగ్‌ ఫీజు రూ.500

హైదరాబాద్‌, డిసెంబర్‌ 5 (నమస్తే తెలంగాణ): హైదరాబాద్‌, మేడ్చల్‌ మల్కాజిగిరి, రంగారెడ్డి జిల్లాల పరిధిలోని 44 కాలనీల ప్రజలకు రెవెన్యూ శాఖ తీపికబురు అందించింది. నిషేధిత భూముల రెగ్యులరైజేషన్‌కు సంబంధించిన మార్గదర్శకాలను చీఫ్‌ కమిషనర్‌ ఆఫ్‌ ల్యాండ్‌ అడ్మినిస్ట్రేషన్‌ (సీసీఎల్‌ఏ) సోమవారం విడుదల చేసింది. ఆయా కాలనీలవాసులు ఈ నెల 20లోపు దరఖాస్తు చేసుకోవాలని సూచించింది. ఆరు నియోజకవర్గాల పరిధిలోని 44 కాలనీల భూములు దాదాపు 15 ఏండ్లుగా నిషేధిత జాబితాలో ఉన్నాయి. ఇందులో వెయ్యి గజాల్లోపు ఉన్న భూములను రెగ్యులరైజ్‌ చేస్తామని మంత్రి కేటీఆర్‌ గతంలో హామీ ఇచ్చారు. ఈ మేరకు ప్రభుత్వం ఈ ఏడాది అక్టోబర్‌ 28న ఉత్తర్వులు జారీ చేసింది. తాజాగా, మార్గదర్శకాలను విడుదల చేసింది. దాదాపు 15 వేల మందికి లబ్ధి చేకూరుతుందని అంచనా.

• మీసేవ కేంద్రాల ద్వారానే దరఖాస్తు చేయాలి.
• చదరపు గజానికి రూ.250 చొప్పున చెల్లించాలి.
• గుర్తింపు ధ్రువీకరణ పత్రంగా ఆధార్‌కార్డును జతచేయాలి.
• నివాస ధ్రువీకరణ కోసం రిజిస్టర్డ్‌ డాక్యుమెంట్‌ లేదా ఆస్తిపన్ను రశీదు లేదా కరెంటు బిల్లు రశీదు లేదా నల్లా బిల్లు రశీదు లేదా ఆ స్థలం తమదే అని నిరూపించే ఏదైనా ధ్రువీకరణ పత్రం అందించాలి.
• స్థలం/ఇల్లు ఫొటోను జత చేయాలి.
• ప్రాసెసింగ్‌ ఫీజు కింద రూ.500 చెల్లించాలి.
• ఈ నెల 20 తుది గడువు.