ఇదీ సర్కారుచిత్తశుద్ధి

• యమస్పీడ్‌గా మురుగునీటి శుద్ధి కేంద్రాల నిర్మాణం
• రూ.3,866.21 కోట్లతో 3 ప్యాకేజీలుగా విభజన
• తుదిదశకు చేరుకుంటున్న రెండో ప్యాకేజీ పనులు
• దసరా తర్వాత విడతల వారీగా అందుబాటులోకి..
• మార్చి కల్లా వందశాతం మురుగుశుద్ధి లక్ష్యం
• 8 మెట్రో నగరాల్లో మనమే ఆదర్శం
• త్వరలో ఎస్‌ఆర్‌డీపీ రెండోదశ పనులు

నదీజలాలు, చెరువులు కలుషితం కాకుండా మహానగరంలో ఉత్పత్తయ్యే మురుగునీటిని వందశాతం శుద్ధి చేసేందుకు రాష్ట్ర ప్రభుత్వం రూ.3,866.21 కోట్ల వ్యయంతో 31 నూతన సీవరేజి ట్రీట్‌మెంట్‌ ప్లాంట్ల (ఎస్టీపీ)ను నిర్మిస్తున్నది. ప్రస్తుతం 40 శాతం మురుగు శుద్ధి అవుతుండగా, నూతన ఎస్టీపీల ద్వారా నిత్యం 1950 ఎంఎల్‌డీల నీటిని 100 శాతం శుద్ధి చేయాలన్న సంకల్పంతో పనులను వేగంగా నిర్వహిస్తున్నది. మూడు ప్యాకేజీలుగా పనులు విభజించారు. ప్యాకేజీ-1,3 పనులు చురుగ్గా సాగుతుండగా, రెండో ప్యాకేజీ పనులు చివరిదశకు చేరుకుంటుండడంతో ఈ ప్యాకేజీలోని నాలుగు ఎస్టీపీలు దసరా నాటికి అందుబాటులోకి రానున్నాయి. మార్చి కల్లా వందశాతం పనులు పూర్తి చేసేందుకు జలమండలి కృతనిశ్చయంతో ఉంది. దేశంలోని 8 మెట్రో నగరాల్లో ఎక్కడా లేనివిధంగా నగరంలో అధికసంఖ్యలో ఎస్టీపీలు నిర్మిస్తుండడం గర్వకారణం.

సిటీబ్యూరో, సెప్టెంబర్‌ 4: (నమస్తే తెలంగాణ): హైదరాబాద్‌ మహానగరంలో వెలువడే మురుగు నీటిని వందశాతం శుద్ధి చేయాలనే లక్ష్యంతో రాష్ట్ర ప్రభుత్వం రూ.3,866.21 కోట్లతో 31 కొత్త సీవరేజీ ట్రీట్‌మెంట్‌ ప్లాంట్ల(ఎస్టీపీ)ను నిర్మిస్తున్నది. దేశంలో ఎనిమిది ముఖ్య నగరాల్లో ఎక్కడా లేని విధంగా మన హైదరాబాద్‌లో 40 శాతం మురుగును ప్రతి రోజు శుద్ధి చేస్తున్నామని, నూతన ఎస్టీపీల నిర్మాణం ద్వారా ప్రతి రోజూ 1950 ఎంఎల్‌డీ (మిలియన్‌ లీటర్‌ ఫర్‌ డే) మురుగునీటిని 100శాతం శుద్ధి చేయవచ్చన్న అంచనాతో జలమండలి ఆధ్వర్యంలో పనులను నిర్వహిస్తున్నది. ఇందులో భాగంగానే మూడు ప్యాకేజీల వారీగా పనులను విభజించి పనులు నిర్వహిస్తుండగా ప్యాకేజీ-2 పనులు తుది దశకు చేరాయి. దసరా నాటికల్లా ఈ ప్యాకేజీలోని నాలుగు ఎస్టీపీలను అందుబాటులోకి తీసుకువచ్చి 480.50 ఎంఎల్‌డీల మేర అదనంగా మురుగును శుద్ధి చేసి మూసీలోకి వదలనున్నారు. ఇక ప్యాకేజీ-1, 3 పనులు వేగవంతంగా జరుగుతున్నాయి. అయితే కొన్ని చోట్ల పనులు పట్టాలెక్కాల్సి ఉందని, న్యాయపరమైన చిక్కులను త్వరలోనే అధిగమించి పనులు చేపడతామని అధికారులు తెలిపారు. దసరా తర్వాత విడుతల వారీగా ఎస్టీపీలను అందుబాటులోకి తీసుకువస్తామని పేర్కొన్నారు. ప్రాజెక్టు ఒకటి, రెండు మినహా దాదాపు ఈ ఏడాది డిసెంబర్‌ నాటికల్లా పూర్తి చేస్తామని, వచ్చే ఏడాది మార్చి నాటికల్లా వంద శాతం మేర ప్రాజెక్టు పూర్తి చేసేలా చర్యలు తీసుకుంటున్నట్లు అధికారులు తెలిపారు.

ప్రాంతాల వారీగా పనులు ఇలా..

• ప్యాకేజీ -1(మూసీ ఉత్తరభాగం): 402.5 మిలియన్‌ లీటర్ల మురుగు శుద్ధికి వీలుగా 8 ఎస్టీపీల నిర్మాణాన్ని రూ.1230.21 కోట్ల అంచనా వ్యయంతో చేపడుతున్నారు. అంబర్‌పేటలో 212.50 ఎంఎల్‌డీ సామర్థ్యం, నల్లచెరువు 86.50 ఎంఎల్‌డీ, పెద్ద చెరువు, నాగారం 17.5 ఎంఎల్‌డి, ఆర్‌కేపురం సఫిల్‌గూడ 5.5 ఎంఎల్‌డీ, రామచెరువు 30 ఎంల్‌డీ, కాప్రా లేక్‌ 6 ఎంఎల్‌డీ, బండ చెరువు 15 ఎంఎల్‌డీ, న్యూ అల్వాల్‌ లేక్‌ 15.5 ఎంఎల్‌డీల మేర నిర్మాణ పనులు జరుగుతున్నాయి.
• ప్యాకేజీ -2 (మూసీ దక్షిణభాగం): 480.5 మిలియన్‌ లీటర్ల మురుగు నీటి శుద్ధికి వీలుగా రూ.1355.13 కోట్ల అంచనా వ్యయంతో 6 ఎస్టీపీలను నిర్మిస్తున్నారు. నాగోల్‌ 320 ఎంఎల్‌డీ, మిరాలం సైట్‌-1 41.5 ఎంఎల్‌డీ, అత్తాపూర్‌లో రెండు చోట్ల 104.0 ఎంఎల్‌డీ, కోకాపేట 15 ఎంఎల్‌డీ,
• ప్యాకేజీ-3 -(కూకట్‌పల్లి లేక్‌ క్యాచ్‌మెంట్‌ ): 376.5 మిలియన్‌ లీటర్ల మురుగు నీటి శుద్ధికి వీలుగా రూ.1280.87 కోట్ల అంచనా వ్యయంతో 17 ఎస్టీపీలను నిర్మిస్తున్నారు. ఫతేనగర్‌ 133 ఎంఎల్‌డీ, దుర్గం చెరువు 7, ఖాజాకుంట 20, మియాపూర్‌ పటేల్‌ చెరువు 7, ముళ్లకత్వ చెరువు 25, వెన్నెలగడ్డ 10 చోట్ల పనులు చురుగ్గా కొనసాగుతున్నాయి. మిగిలిన చోట కోర్టు కేసుల కారణంగా వాయిదా పడ్డాయని అధికారులు పేర్కొన్నారు.

మంత్రికేటీఆర్‌ప్రశంస

31 మురుగునీటి శుద్ధి కేంద్రాలు అందుబాటులోకొస్తే నగరంలో వందశాతం మురుగు శుద్ధి అవుతుంది. ప్రభుత్వ లక్ష్యం, సవాళ్లు అధిగమిస్తూ సకాలంలో పనులు నిర్వహిస్తున్న జలమండలి ఉన్నతాధికారులను పురపాలక మంత్రి కేటీఆర్‌ ఆదివారం ట్విట్టర్‌ వేదికగా ప్రశంసించారు. వచ్చే మార్చి నాటికి పనులన్నీ పూర్తయితే దేశంలో 100శాతం మురుగుశుద్ధి చేస్తున్న నగరంగా గుర్తింపు రానుందని పురపాలక శాఖ ప్రత్యేక ప్రధానకార్యదర్శి అర్వింద్‌కుమార్‌ మరో ట్వీట్‌ చేశారు.