ఇస్తారా..? మొండికేస్తారా?

• మంత్రి కేటీఆర్‌ లేఖలను ఆలకిస్తారా..
• జీహెచ్‌ఎంసీకి రూ.7595 కోట్లు కేటాయించేనా..
• మూడోవంతు ఇస్తారా.. మొహం చాటేస్తారా..?
• మరికొద్ది గంటల్లో స్పష్టం కానున్న కేంద్రం వైఖరి
• ఆసక్తిగా ఎదురుచూస్తున్న నగరవాసులు

సిటీబ్యూరో, జనవరి 31 (నమస్తే తెలంగాణ): ఎన్‌డీఏ ప్రభుత్వం కేంద్ర వార్షిక బడ్జెట్‌-2022ను మరికొద్ది సేపట్లో ఆర్థిక మంత్రి నిర్మలా సీతారామన్‌ ప్రవేశపెట్టనున్నారు. ఉదయం 11గంటలకు ప్రవేశపెట్టే బడ్జెట్‌లో వాస్తవ రూపం దాల్చేలా బడ్జెట్‌ కేటాయింపులు ఉంటాయా? నగర మౌలిక వసతులకు నిధులు కేటాయిస్తారా? లేదా అన్నది నగరవాసులు ఆసక్తిగా ఎదురుచూస్తున్నారు. నగరానికి సంబంధించిన వివిధ ప్రాజెక్టుల కోసం మున్సిపల్‌ శాఖ మంత్రి కేటీ రామారావు ఇటీవల కేంద్ర ఆర్థిక మంత్రి నిర్మలా సీతారామన్‌కు లేఖ రాశారు. గ్రేటర్‌కు సంబంధించి రాష్ట్ర ప్రభుత్వం, జీహెచ్‌ఎంసీ అమలు చేస్తున్న వివిధ ప్రాజెక్టుల కోసం కేంద్ర బడ్జెట్‌లో రూ.7595 కోట్లు కేటాయించాలని కోరారు. ఈ నేపథ్యంలోనే జీహెచ్‌ఎంసీకి ఎన్ని కేటాయిస్తారు..? అన్నది వేచి చూడాల్సిందేనని అధికారులు చెబుతున్నారు.

• శరవేగంగా విస్తరిస్తున్న హైదరాబాద్‌ నగరంలో మౌలిక వసతుల కల్పనకు రాష్ట్ర ప్రభుత్వం విశేషంగా కృషి చేస్తున్నది. ప్రతి ఏటా నిర్ధేశిత లక్ష్యాలను ఖరారు చేస్తూ ప్రాజెక్టులను పూర్తి చేస్తున్నారు. ఇందులో భాగంగా ప్రతిపాదిత ప్రాజెక్టులకు నిధులను కేటాయించాలంటూ మంత్రి కేటీఆర్‌ కేంద్రానికి లేఖలు రాశారు.
• హైదరాబాద్‌ నగరం, శివారు ప్రాంతాల్లో చేపట్టిన లింక్‌ రోడ్ల నిర్మాణానికి రూ.2,400 కోట్లు ఖర్చు అవుతుందని అంచనా వేస్తున్నామని పేర్కొన్నారు. ఇందులో కేంద్రం మూడో వంతు భరించేలా కేంద్ర బడ్జెట్‌లో రూ.800 కోట్లు కేటాయించాలని కోరారు.
• నగర శివారు, నగరం నుంచి ఔటర్‌ రింగ్‌ రోడ్డుకు రోడ్లను వెడల్పు చేసి రవాణా సదుపాయాలను మెరుగుపర్చడానికి 104 అదనపు కారిడార్లను గుర్తించామని తెలిపారు. ఈ రోడ్ల కనెక్టివిటీ ద్వారా అర్బన్‌ రోడ్ల కనెక్టివిటీ కీలకంగా మారుతుందని పేర్కొన్నారు.
• రూ.11,500 కోట్లతో మూసీ నదిపై స్కైవే, నదికి ఇరువైపులా 16 కిలోమీటర్ల గ్రేడ్‌ సెపరేటర్లను నిర్మించాలని ప్రతిపాదించామని తెలిపారు.
• ప్యారడైజ్‌ జంక్షన్‌ నుంచి శామీర్‌పేట ఓఆర్‌ఆర్‌ జంక్షన్‌ వరకు, బోయిన్‌పల్లి నుంచి కండ్లకోయ వరకు ఆరు లైన్ల ఎలివేటెడ్‌ కారిడార్‌ నిర్మించాలని ప్రతిపాదించామని పేర్కొన్నారు. వీటికి రూ.9వేల కోట్ల అంచనా వ్యయం అవుతుందని, భూమి కేటాయింపుల అంశం కేంద్ర రక్షణ శాఖ పరిశీలనలో ఉన్నదని కేటీఆర్‌ వివరించారు.
• ఎస్సార్డీపీ రెండో దశ రూ.14 వేల కోట్ల అంచనాతో రూపొందించామని తెలిపారు. వీటన్నింటికీ రూ.34,500 కోట్లు అవసరమని పేర్కొన్నారు. ఇందులో 10 శాతం అంటే.. రూ.3,450 కోట్లు కేంద్రం కేటాయించాలని కేటీఆర్‌ విజ్ఞప్తి చేశారు. సీవరేజీ ట్రీట్‌మెంట్‌ ప్లాంట్‌ (ఎస్టీపీ) నిర్మాణాలకు అయ్యే వ్యయం రూ.8684.54 కోట్లలో కేంద్రం మూడో వంతు భరించాలని మంత్రి కేటీఆర్‌.. కేంద్ర ఆర్థిక మంత్రిని కోరారు.

పన్ను రేట్లపై ఊరట ఉండేనా?
ఆదాయపు పన్ను మినహాయింపులపై సర్వత్రా ఆసక్తి నెలకొంది. ఇన్‌కం ట్యాక్స్‌ రేట్స్‌ శ్లాబ్‌లను తగ్గించాలని పన్ను చెల్లింపుదారులు కోరుకుంటున్నారు. ప్రస్తుతం ఉన్న ఆదాయ పన్ను మినహాయింపు పరిమితిని రూ.2.5 లక్షల నుంచి రూ.5 లక్షలకు పెంచేలా నిర్ణయం తీసుకోవాలని కోరుతున్నారు. అదేవిధంగా సీనియర్‌ సిటిజన్‌ ఆదాయ పన్ను పరిమితిని రూ.10 లక్షలకు పెంచాలని విజ్ఞప్తి చేస్తున్నారు. మొత్తంగా పన్ను రేట్ల ఊరటపై పట్టణ వాసులు ఆసక్తిగా ఎదురుచూస్తున్నారు.