సేవలు.. మన హక్కు

వినియోగదారుడు ఏదైనా వస్తువును కొనుగోలు చేసిన నుంచి, సేవలను వినియోగించుకున్న వినియోగదారులు రెండేండ్ల లోపు వినియోగదారుల కమిషన్‌ను ఆశ్రయించవచ్చు.

• అందకుంటే కన్జ్యూమర్‌ కమిషన్‌ను ఆశ్రయించండి
• ఆఫ్‌లైన్‌తోపాటు ఆన్‌లైన్‌నూ ఫిర్యాదులు చేయొచ్చు
• రెండేండ్లలోపు ఫిర్యాదు స్వీకరించేందుకు అవకాశం..

వినియోగదారుడు ఏదైనా వస్తువును కొనుగోలు చేసిన నుంచి, సేవలను వినియోగించుకున్న వినియోగదారులు రెండేండ్ల లోపు వినియోగదారుల కమిషన్‌ను ఆశ్రయించవచ్చు.

సిటీబ్యూరో, జూన్‌ 12 (నమస్తే తెలంగాణ) : వస్తువు కొనుగోలు చేసిన తరుణంలోగానీ, ఆరోగ్య బీమా పాలసీలు తీసుకొని సేవల్లో అంతరాయం ఏర్పడినా.. బీమా పాలసీ కంపెనీలు సేవలందించేందుకు కొర్రీలు పెట్టినా.. వినియోగదారుల సేవల్లో అలసత్వం వహించినా.. నిబంధనల ప్రకారం హైదరాబాద్‌ కన్జ్యూమర్‌ కమిషన్‌-1 ఆశ్రయించవచ్చు. ఆఫ్‌లైన్‌తో పాటు ఆన్‌లైన్‌లోనూ ఫిర్యాదులు స్వీకరించేందుకు అవకాశం ఉన్నదని వినియోగదారుల కమిషన్‌ అధికారులు చెబుతున్నారు. మీకు సేవల్లో అన్యాయం జరిగిందని భావిస్తే నిర్భయంగా నాంపల్లిలోని కమిషన్‌ కార్యాలయాన్ని సంప్రదించవచ్చని సూచనలు చేశారు. నాంపల్లిలోని హైదరాబాద్‌ జిల్లా కన్జ్యూమర్‌ కమిషన్‌-1, కమిషన్‌-2, కమిషన్‌-3 నిత్యం వినియోగదారులకు న్యాయం చేసేందుకు కృషి చేస్తున్నాయని హైదరాబాద్‌ కన్జ్యూమర్‌ కమిషన్‌-1 సూపరింటెండెంట్‌ మధుకుమార్‌ వెల్లడించారు.

రెండేండ్లలోపు ఫిర్యాదు చేయాలి..

• సివిల్‌ కోర్టుల్లోనైతే మూడేండ్ల వరకు కూడా ఫిర్యాదును స్వీకరించేందుకు నిబంధనలు ఉన్నట్లు తెలిపారు.
• ఫిర్యాదుదారుడికి.. వ్యతిరేక పార్టీకి మధ్య ఉత్తర ప్రత్యుత్తరాలు నడుస్తూ ఉంటే.. ఎప్పుడైనా ఫిర్యాదు చేసుకోవచ్చు. కొన్ని కేసుల్లో ఈ సౌలభ్యం ఉండదు.
• రూ.50లక్షల లోపు విలువ చేసే వస్తువులను కొనుగోలు చేసిసేవల లోపం తలెత్తినప్పుడు, సేవలను పొందలేనప్పుడు జిల్లా కమిషన్‌ను ఆశ్రయించవచ్చు.
• ఆన్‌లైన్‌లో కూడా అప్లికేషన్లకు అవకాశం ఉంటుంది..కానీ చాలా మంది వినియోగదారులు అసంపూర్తి సమాచారాన్ని పంపుతుండటం వల్ల వాటిని తిరిగి మ్యాన్‌వల్‌గా రాయాల్సి వస్తుంది. అందువల్ల మ్యాన్‌వల్‌గానే ఫిర్యాదులు చేస్తే మంచిదని అధికారులు సూచిస్తున్నారు.
• అసంపూర్తి ఫిర్యాదులపై వినియోగదారులకు ఫోన్‌ చేసి కార్యాలయానికి రావాలని సూచించి పూర్తిస్థాయిలో ఫిర్యాదులను పూరించి సహకరిస్తున్నట్లు పేర్కొన్నారు.
• చిన్న, చిన్న కేసుల్లో లాయర్‌ లేకుండానే కేసును విచారించేందుకు ఫిర్యాదుదారులకు అవకాశం ఉంటుందని, ఏ విషయమైనా వారే వాదించేందుకు వీలుంటుంది. త్వరగానే కేసులు పరిష్కారమవుతాయి.
• వినియోగదారులు నష్టపరిహారం కింద ఎంతైనా అడిగే వీలుంటుంది. ఒకప్పుడు మాత్రం పరిమితి ఉండేది. అడిగేదాన్ని బట్టి కోర్టు ఫీజు చెల్లించాల్సి ఉంటుంది.

రూ.5లక్షల లోపైతే.. కోర్టు ఫీజు ఉండదు..

• రూ.5లక్షల లోపు నష్టపరిహారం తీర్పులపై లాంటి కోర్టు ఫీజు ఉండదని, రూ.5లక్షల నుంచి రూ.10లక్షల వరకు రూ.500 కోర్టు ఫీజు ఉంటుందని, రూ.10లక్షల నుంచి రూ.20లక్షల వరకు రూ.800 ఫీజు, రూ.20లక్షల నుంచి రూ.50లక్షల వరకు రూ.1000 ఫీజు ఉంటుందని పేర్కొన్నారు. డీడీ రూపంలోనైనా చెల్లించవచ్చని పేర్కొన్నారు.
• వినియోగదారులు ఫిర్యాదు చేసిన తర్వాత… వ్యతిరేక పార్టీకి నోటీసులు పంపిస్తారు. అప్పుడు ఫిర్యాదులో పేర్కొన్న అంశాలపై అఫిడవిట్‌ను సమర్పించాల్సి ఉంటుంది. వ్యతిరేక పార్టీకి నోటీసులు అందిన తర్వాత.. ఫిర్యాదుదారు పేర్కొన్న అంశాలు వాస్తవం కాదని వ్యతిరేక పక్షం కూడా అఫిడవిట్‌ను దాఖలు చేస్తుంది. ఇరుపక్షాలు వాదనలు విని, సమర్పించిన పత్రాలను పరిశీలించిన అనంతరం కమిషన్‌ ఆదేశాలు జారీ చేస్తుంది.
• పెద్ద పెద్ద కేసుల్లో (గోదాంలు, కార్ల షెడ్లు లాంటివి కాలిపోయిన లాంటి కేసుల్లో ఇన్సూరెన్స్‌ క్లెయిమ్‌ చేసే విషయంలో) లాయర్లు అవసరపడతారని, వైద్యం చేయడంలో నిర్లక్ష్యం, నిర్మాణ రంగం లాంటి రంగాల్లో నిబంధనల ప్రకారం ఫిర్యాదుదారులు చెప్పలేనటువంటి సందర్భంలో అడ్వకేట్లు అవసరమవుతారని చెప్పారు.
• సందేహాలు ఉంటే.. ఫిర్యాదుదారులు 040-24733368లో సంప్రదించాలని సూచిస్తున్నారు.