పబ్బుల్లోకి మైనర్లకు నో ఎంట్రీ..

పబ్‌లలో మైనర్లకు ఎంట్రీ ఇవ్వొద్దని సైబరాబాద్‌ పోలీసులు హెచ్చరిస్తున్నారు. పబ్‌లలో నాన్‌ ఆల్కాహాలిక్‌ పార్టీలకు కూడా మైనర్లను అనుమతించవద్దని స్పష్టం చేస్తున్నారు.

• ఫాంహౌజ్‌ ప్రాంగణాల్లో మద్యం సేవించడం నిషేధం..
• మార్గదర్శకాలు జారీ చేసిన సైబరాబాద్‌ పోలీసులు

సిటీబ్యూరో, జూన్‌ 7 (నమస్తే తెలంగాణ): పబ్‌లలో మైనర్లకు ఎంట్రీ ఇవ్వొద్దని సైబరాబాద్‌ పోలీసులు హెచ్చరిస్తున్నారు. పబ్‌లలో నాన్‌ ఆల్కాహాలిక్‌ పార్టీలకు కూడా మైనర్లను అనుమతించవద్దని స్పష్టం చేస్తున్నారు. ఈ నేపథ్యంలో సైబరాబాద్‌ పోలీసు కమిషనర్‌ ఆదేశాల మేరకు డీసీపీలు, ఇతర ఉన్నతాధికారులు పబ్‌ యాజమాన్యాలతో సమావేశాలను నిర్వహించి వారికి పాటించాల్సిన మార్గదర్శకాలను సూచిస్తున్నారు. దీంతో పాటు నోటీసులను జారీ చేస్తున్నారు. మాదాపూర్‌ డీసీపీ శిల్పవల్లి ఇటీవల పలుమార్లు పబ్‌ యాజమాన్యాలు, నిర్వాహకులతో సమావేశమై మార్గదర్శకాలు వివరించారు.

మార్గదర్శకాలు..

• పబ్‌లలో మైనర్లకు మద్యం సరఫరా చేయొద్దు. మైనర్లకు పబ్‌లలో నో ఎంట్రీ. అనుమానం వస్తే ఆధార్‌ కార్డుల ద్వారా వయస్సును నిర్ధారించుకోవాలి.
• కస్టమర్లను ఆకర్షించేందుకు మహిళలతో అశ్లీల నృత్యాలను చేయించొద్దు.
• పబ్‌లకు 24 గంటలు అనుమతులు ఉన్నా… ఆ నిబంధనలకు కట్టుబడి ఉండాలి. ఉల్లంఘిస్తే కఠిన చర్యలు.
• నిషేధిత పదార్థాలను అనుమతించవద్దు.
• పబ్‌కు వచ్చే మహిళలు, యువతులను మహిళా ఉద్యోగులతోనే తనిఖీ చేయించాలి.
• పబ్‌ నిర్వాహకులు, యాజమాన్యాలు సెక్యూరిటీ గార్డులను పెట్టుకోవాలి. కానీ, వారు మాత్రం వినియోగదారులపై దాడులకు, అభ్యంతకరంగా వ్యవహరించవద్దు.
• మత్తు, డ్రగ్స్‌ పదార్థాలు పబ్‌ పరిసరాలు, పార్కింగ్‌ ప్రాంతాల్లో దొరికితే కఠిన చర్యలు తప్పవు.
• పబ్‌ల నుంచి మద్యం మత్తులో వాహనాలను నడిపించకుండా నిర్వాహకులు బాధ్యత వహించాలి. వాలెట్‌ డ్రైవర్‌ను పెట్టుకోవాలి. వారు వినకపోతే పోలీసులకు ఫిర్యాదు చేయాలి. డయల్‌ 100 లేదా సైబరాబాద్‌ వాట్సాప్‌ నం.9490617444కు ఫోన్‌ చేయాలి.

ఫామ్‌ హౌజ్‌లు.. ఇతర విడిది సౌకర్యాలు నిర్వహించే వారికి ఇచ్చిన నోటీసులు, ఆంక్షలు..

• వేడుకలు, పార్టీలు నిర్వహించే వాటికి కచ్చితంగా పోలీసు అనుమతి ఉండాలి.
• ఈ ప్రాంగణాల్లో జరిగే కార్యక్రమాలు, ఈవెంట్లు, వేడుకల్లో మద్యం నిషేధం. సంబంధిత శాఖ అధికారుల అనుమతి తప్పనిసరి..
• ఫామ్‌ హౌజ్‌ల వద్ద భద్రతకు సెక్యూరిటీని ఏర్పాటు చేసుకోవాలి.
• వేడుకలు, కార్యక్రమాలు నిర్వహించే వారి వివరాలు పూర్తిగా ఉండాలి.
• అగ్నిప్రమాదాల నివారణకు ఫైర్‌ సేఫ్టీ పరికరాలను ఏర్పాటు చేసుకోవాలి.
• సీసీ కెమెరాలు ఉండాలి. ఈ మార్గదర్శకాలు పాటించని వారిపై చట్టపరంగా కఠినంగా వ్యవహరిస్తామని సీపీ స్టీఫెన్‌ రవీంద్ర స్పష్టం చేశారు.