మూసీ నివాసితులకు..12వేల డబుల్‌ ఇండ్లు

• మూసీ సుందరీకరణకు ఆక్రమణలన్నీ తొలగించాలని నిర్ణయం
• వారికి 2బీహెచ్‌కే ఇండ్లు ఇచ్చేందుకు ప్రణాళికలు
• ప్రతాపసింగారం మీదుగా రేడియల్‌ రోడ్డు
• ప్రతిపాదనలు సిద్ధం చేసిన ఎంఆర్‌డీసీఎల్‌

సిటీబ్యూరో, జూన్‌ 5 (నమస్తే తెలంగాణ): మూసీ నది పరిరక్షణకు తెలంగాణ రాష్ట్ర ప్రభుత్వం చర్యలు చేపట్టింది. 2017లో మూసీ రివర్‌ ఫ్రంట్‌ డెవలప్‌మెంట్‌ కార్పొరేషన్‌ లిమిటెడ్‌(ఎంఆర్‌డీసీఎల్‌)ను ఏర్పాటు చేసింది. ఎంఆర్‌డీసీఎల్‌ మొదట మూసీ నదికి ఇరువైపులా ఉన్న కబ్జాలను గుర్తించేందుకు రెవెన్యూ శాఖతో కలిసి క్షేత్ర స్థాయిలో డిజిటల్‌ సర్వే నిర్వహించింది. ఈ సర్వేలో మూసీకి ఇరువైపుల బఫర్‌ జోన్‌లో 8,491 ఆక్రమణలు ఉన్నట్లు గుర్తించింది. మూడు జిల్లాల పరిధిలో విస్తరించిన మూసీ నదికి ఇరువైపుల ఉన్న నివాస ప్రాంతాల నుంచి మురుగునీరు మూసీలోకి చేరుతుందని, తద్వారా మూసీ మురికి కూపంగా మారుతున్నదని గుర్తించారు. మూసీ పరిరక్షణకు మూసీకి ఇరువైపుల ఉన్న అక్రమ నిర్మాణాలను తొలగించి వారికి ప్రత్యామ్నాయంగా 2బీహెచ్‌కే ఇండ్లు నిర్మించి ఇవ్వాలని నిర్ణయించారు. ఇందుకోసం సుమారు 12వేల 2బీహెచ్‌కే ఇండ్లను నిర్మించనున్నారు. అందుకు ప్రభుత్వం ప్రణాళికలు రూపొందిస్తున్నది. వీటితో పాటు మూసీ సుందరీకరణకు మూసీ రివర్‌ ఫ్రంట్‌ అథారిటీ నిరంతరం కసరత్తు చేస్తున్నది.

ఇప్పటి వరకు చేపట్టిన కార్యక్రమాలు..

• మూసీ సుందరీకరణ ప్రాజెక్టులో భాగంగా సుమారు పది చోట్ల ఫ్లోటింగ్‌ వేస్ట్‌ బారియర్స్‌ (ఎఫ్‌టీబీ)ను ఏర్పాటు చేసి మూసీనదిలో నీటితో పాటు పారుతూ వచ్చే చెత్తాచెదారాన్ని ఎక్కడికక్కడ తొలగించేలా ఏర్పాట్లు చేశారు. వీటిని ప్రధానంగా లంగర్‌హౌజ్‌లోని బాపూఘాట్‌ నుంచి నాగోల్‌ వరకు ఉన్న ప్రాంతాల్లో ఏర్పాటు చేశారు. ప్రతి 2-3 కి.మీ ఒకటి చొప్పున ఏర్పాటు చేసి మూసీలో చెత్తాచెదారం నిలిచిపోకుండా ఉండేలా చూస్తున్నారు.
• మూసీ వెంబడి దోమల నియంత్రణకు ప్రత్యేక బృందాలు నిర్విరామంగా పనిచేస్తున్నాయి. డ్రోన్‌ కెమెరాలతో యాంటీ లార్వా మందులను పిచికారీ చేస్తున్నారు. ఇందుకోసం 642బృందాలు పనిచేస్తున్నాయి. ఐఓటీ యంత్రాలను వినియోగిస్తూ దోమల నివారణ చర్యలు చేపట్టారు.
• మూసీ నది సుందరీకరణ ప్రాజెక్టులో భాగంగా ఇరువైపుల తీర ప్రాంతంలో ఎలాంటి కబ్జాలు కాకుండా నిరంతరం పర్యవేక్షిస్తున్నారు. పలు చోట్ల సీసీ కెమెరాలను ఏర్పాటు చేసి మూసీ తీరప్రాంతంలో కొత్తగా నిర్మాణాలు చేపట్టకుండా, మట్టి, చెత్తాచెదారం వేయకుండా అడ్డుకుంటున్నారు.
• మూసీ నదిపై తెలంగాణ ప్రభుత్వం కొత్తగా 15 చోట్ల చారిత్రాత్మక నేపథ్యం ప్రతిబింబించేల రూ.390 కోట్లతో హైలెవల్‌ బ్రిడ్జిలను నిర్మించేందుకు ప్రణాళికలు రూపొందిస్తున్నది.
•  స్వచ్ఛ మూసీలో భాగంగా నదిలో వందశాతం స్వచ్ఛమైన నీటి ప్రవాహమే లక్ష్యంగా రూ.3890 కోట్లతో 31చోట్ల శుద్ధి కేంద్రాలను నిర్మిస్తున్నారు.
• మూసీ రివర్‌ ఫ్రంట్‌ డెవలప్‌మెంట్‌ కార్పొరేషన్‌ ఆధ్వర్యంలో మూసీ నది పొడవునా డ్రోన్‌తో సర్వే చేయించారు. మూసీకి ఇరువైపులా 50 మీటర్ల మేర బఫర్‌ జోన్‌గా గుర్తించారు.
• తాత్కాలికంగా ఏర్పాట్లు కాకుండా శాశ్వత ప్రాతిపదికన మూసీ తీర ప్రాంతం అభివృద్ధిపైనే ప్రధానంగా దృష్టి సారించింది.
• ఉప్పల్‌ భగాయత్‌ లేఅవుట్‌ను అభివృద్ధి చేసిన హెచ్‌ఎండీఏ మూసీ నది తీరం వెంబడి ఉన్న బఫర్‌ జోన్‌లో సుందరీకరణ పనులు చేపట్టింది. రామంతాపూర్‌లోని కేటీఆర్‌ నగర్‌ నుంచి నాగోల్‌ ఇన్నర్‌ రింగురోడ్డు బ్రిడ్జి వరకు, అక్కడి నుంచి ఫీర్జాదిగూడ వరకు లేఅవుట్‌లో భాగంగా మూసీ వెంబడి బఫర్‌ జోన్‌ 50 మీటర్ల తర్వాత సుమారు 120 అడుగుల వెడల్పుతో 4 వరుసలతో రహదారిని నిర్మించారు.
• ఉప్పల్‌ భగాయత్‌లో మినీ శిల్పారామం కోసం సుమారు 9 ఎకరాలను హెచ్‌ఎండీఏ కేటాయించింది. అక్కడ శిల్పారామం నిర్మాణం కోసం రూ.5 కోట్లను ఖర్చు చేసి రకరకాల స్టాల్స్‌, గ్రామీణ వాతావరణం ఉట్టిపడేలా పలు నిర్మాణాలు చేపట్టారు.
• నాగోల్‌ బ్రిడ్జి వద్ద నుంచి దిల్‌సుఖ్‌నగర్‌, కొత్తపేట వైపు 2-3 కి.మీ దూరం నడక మార్గాలను, పచ్చని పచ్చిక బయళ్లను ఏర్పాటు చేశారు. స్థానికులు ఉదయం, సాయంత్రం వేళల్లో నడక సాగించేలా మార్గాలను పరిమిత స్థాయిలో అభివృద్ధి చేశారు. ఇదే స్థాయిలో నగరం మీదుగా 52 కి.మీ మేర ఉన్న మూసీ తీరప్రాంతాన్ని దశల వారీగా సుందరీకరణ చేసే ప్రణాళికలను మూసీ రివర్‌ ఫ్రంట్‌ డెవలప్‌మెంట్‌ అధికారులు రూపొందించారు.
• నాగోల్‌ వద్ద ఇన్నర్‌ రింగు రోడ్డు నుంచి మూసీ నది పొడవునా ఫీర్జాదిగూడ, పర్వత్‌నగర్‌, ప్రతాపసింగారం మీదుగా గౌరెల్లి, కొర్రెముల వరకు 4 వరుసలతో రేడియల్‌ రోడ్డును నిర్మించాలని ప్రతిపాదనలు సిద్ధం చేసింది.