త్వరలో బతుకమ్మకుంట పునరుద్ధరణ

అంబర్‌పేటలోని బతుకమ్మకుంట పునరుద్ధరణపై హైడ్రాకు అనుకూలంగా మంగళవారం తన తుది తీర్పులో బతుకమ్మకుంటగానే గుర్తిస్తూ హైకోర్టు తీర్పునిచ్చిందని హైడ్రా కమిషనర్‌ రంగనాథ్‌ ఓ ప్రకటనలో తెలిపారు.

• హైడ్రాకు అనుకూలంగా హైకోర్ట్టు తీర్పు: కమిషనర్‌ రంగనాథ్‌

సిటీబ్యూరో, జనవరి 7(నమస్తే తెలంగాణ): అంబర్‌పేటలోని బతుకమ్మకుంట పునరుద్ధరణపై హైడ్రాకు అనుకూలంగా మంగళవారం తన తుది తీర్పులో బతుకమ్మకుంటగానే గుర్తిస్తూ హైకోర్టు తీర్పునిచ్చిందని హైడ్రా కమిషనర్‌ రంగనాథ్‌ ఓ ప్రకటనలో తెలిపారు. బతుకమ్మకుంట తమదంటూ ఎడ్ల సుధాకర్‌రెడ్డి అనే వ్యక్తి దాఖలు చేసిన పిటిషన్‌ను కొట్టేసిన హైకోర్టు కుంట పునరుద్ధరణలో హైడ్రా చర్యలు సక్రమమేనంటూ తీర్పునిచ్చిందని ఆయన పేర్కొన్నారు. త్వరలోనే బతుకమ్మకుంటకు పూర్వవైభవం తీసుకొస్తామని, 1962-63 లెక్కల ప్రకారం మొత్తం 14.06 ఎకరాల విస్తీర్ణంలో బతుకమ్మకుంట ఉందని, బఫర్‌జోన్‌తో కలిపి మొత్తం వైశాల్యం 16.13 ఎకరాల విస్తీర్ణంగా తేల్చారని రంగనాథ్‌ తెలిపారు. ప్రస్తుతం మిగిలి ఉన్న 5.15ఎకరాల భూమిలోనే బతుకమ్మకుంటను పునరుద్ధరిస్తామని రంగనాథ్‌ పేర్కొన్నారు.

ఆక్రమణల ఫిర్యాదులపై హైడ్రా కమిషనర్‌ పర్యటన

జూబ్లీహిల్స్‌ రోడ్డు నంబర్‌-52లోని నందగిరి హిల్స్‌ హుడా లేఅవుట్‌లో ప్రభుత్వ స్థలం, పార్కులు, గురుబ్రహ్మనగర్‌ బస్తీ ప్రాంతాల్లో డబుల్‌బెడ్రూంలు నిర్మించేందుకు కేటాయించిన స్థల ఆక్రమణల ఫిర్యాదులపై హైడ్రా కమిషనర్‌ రంగనాథ్‌ మంగళవారం ఆయా ప్రాంతాల్లో పర్యటించారు.