మేకప్‌ అండ్‌ కాస్మోటిక్‌ క్లినిక్‌లపై ఆరోగ్యశాఖ అధికారుల దాడులు

నగరంలో ఎలాంటి అనుమతి లేకుండా మేకప్‌, కాస్మోటిక్‌ పేరుతో క్లినిక్‌లను నిర్వహించడమే కాకుండా.. డీసీఏ అనుమతి లేకుండా సంబంధిత ఔషధాలను విక్రయిస్తున్న క్లినిక్‌లపై రంగారెడ్డి జిల్లా వైద్య, ఆరోగ్యశాఖ అధికారులు దాడులు జరిపారు.

• రెండు క్లినిక్‌లు సీజ్‌

సిటీబ్యూరో, ఏప్రిల్‌ 21 (నమస్తే తెలంగాణ): నగరంలో ఎలాంటి అనుమతి లేకుండా మేకప్‌, కాస్మోటిక్‌ పేరుతో క్లినిక్‌లను నిర్వహించడమే కాకుండా.. డీసీఏ అనుమతి లేకుండా సంబంధిత ఔషధాలను విక్రయిస్తున్న క్లినిక్‌లపై రంగారెడ్డి జిల్లా వైద్య, ఆరోగ్యశాఖ అధికారులు దాడులు జరిపారు. ఈ దాడుల్లో రాయదుర్గ ప్రాంతంలోని దీప్తీ పర్మినెంట్‌ మేకప్‌ అండ్‌ కాస్మోటిక్‌ క్లినిక్‌, మాదాపూర్‌లోని వీ- స్పార్క్‌ వెల్నెస్‌ క్లినిక్‌ను సీజ్‌ చేశారు. అధికారుల కథనం ప్రకారం.. గ్రేటర్‌ పరిధిలోని పలుచోట్ల ఎలాంటి అనుమతులు లేకుండానే బ్యూటీ, మేకప్‌, కాస్మోటిక్‌ కేర్‌ పేరుతో క్లినిక్‌లు నిర్వహిస్తున్నారు. దీంతో కొంత మంది రోగులకు వైద్యం వికటించి ప్రాణాల మీదకు తెచ్చుకుంటున్నారు.

ఈ మేరకు సమాచారం అందుకున్న వైద్య, ఆరోగ్యశాఖ అధికారులు ఈ నెల 20, 21వ తేదీల్లో నగరంలోని రాయదుర్గం ప్రాంతంలో ఉన్న దీప్తీ పర్మినెంట్‌ మేకప్‌ అండ్‌ కాస్మోటిక్‌ క్లినిక్‌, మాదాపూర్‌లోని వీ-స్పార్క్‌ వెల్నెస్‌ క్లినిక్‌పై దాడులు నిర్వహించారు. అర్హులైన డెర్మటాలజిస్టులు లేకుండానే గుడ్డిగా చర్మ సంరక్షణ, చర్మ సౌందర్య సంబంధిత చికిత్స నిర్వహిస్తున్నట్లు గుర్తించారు. అంతేకాకుండా డీసీఏ అనుమతి లేకుండానే బ్యూటీ ప్రొడక్ట్స్‌కు సంబంధించిన ఔషధాలు, ఇతర ఉత్పత్తులను సైతం విక్రయిస్తున్నట్లు గుర్తించారు. ఈ మేరకు ఆ రెండు క్లినిక్‌ల నిర్వాహకులకు నోటీసులు జారీ చేసినట్లు రంగారెడ్డి జిల్లా వైద్య, ఆరోగ్యశాఖ అధికారి డాక్టర్‌ వెంకటేశ్వర్లు తెలిపారు.