GHMC | జీహెచ్‌ఎంసీలో రూ. 26 కోట్లతో ఆర్వోబీలకు మరమ్మతులు

మేయర్‌ గద్వాల్‌ విజయలక్ష్మి అధ్యక్షతన బుధవారం జీహెచ్‌ఎంసీ స్టాండింగ్‌ కమిటీ సమావేశం జరిగింది. 16 అంశాలను ఆమోదించిన కమిటీ సభ్యులు.. పలు కీలక నిర్ణయాలు తీసుకున్నారు.

• మరిన్ని చోట్ల జంక్షన్ల అభివృద్ధి
• ‘బయో మెట్రిక్‌ అటెండెన్స్‌’కు ఈ-ప్రొక్యూర్‌మెంట్‌ టెండర్‌
• బల్దియా ‘స్టాండింగ్‌ కమిటీ’లో పలు కీలక నిర్ణయాలు

GHMC | సిటీబ్యూరో, మార్చి 13 (నమస్తే తెలంగాణ) : మేయర్‌ గద్వాల్‌ విజయలక్ష్మి అధ్యక్షతన బుధవారం జీహెచ్‌ఎంసీ స్టాండింగ్‌ కమిటీ సమావేశం జరిగింది. 16 అంశాలను ఆమోదించిన కమిటీ సభ్యులు.. పలు కీలక నిర్ణయాలు తీసుకున్నారు.

బేగంపేట ఆర్వోబీ మరమ్మతులు, పునరుద్ధరణ పనులకు రూ.20కోట్లతో పనులు, రామకృష్ణాపురం (సికింద్రాబాద్‌) రైల్వే స్టేషన్‌ వద్ద ఆర్‌కేపురం ఆర్వోబీ పునరుద్ధరణ చర్యలకు రూ. 6 కోట్ల పనులకు గ్రీన్‌సిగ్నల్‌ ఇచ్చారు. యూసుఫ్‌గూడ బస్తీ జంక్షన్‌ అభివృద్ధికి అంచనా రూ. 4.90 కోట్లకు, రహ్మత్‌నగర్‌ పీజీఆర్‌ విగ్రహం జంక్షన్‌ అభివృద్ధికి అంచనా వ్యయం రూ. 5.17 కోట్ల పనులకు కమిటీ ఆమోదం తెలిపింది.

మరిన్ని అంశాలివీ..

• జీహెచ్‌ఎంసీలో ఔట్‌సోర్సింగ్‌, రెగ్యులర్‌ సిబ్బంది హాజరు పరిశీలనకు మొబైల్‌ ఆధారిత ఫేషియల్‌ రికగ్నిషన్‌ (ముఖగుర్తింపు) బయో మెట్రిక్‌ అటెండెన్స్‌ మేనేజ్‌మెంట్‌ సిస్టం అమలు చేసేందుకు ఈ-ప్రొక్యూర్‌మెంట్‌ టెండర్‌ ఆహ్వానించేందుకు ఆమోదం.
• ఆర్‌సీపురం రాయ సముద్రం ట్యాంక్‌ మిషన్‌ కాకతీయలో భాగంగా ఇంటేక్‌-1 నుంచి ఇంటేక్‌-2 వరకు డ్రైనేజీ మళ్లింపు పనులు, ఇంటరాఫ్షన్‌ అండ్‌ డైవర్షన్‌ ( ఐ అండ్‌ డీ)లు చేపట్టేందుకు రూ.2.52 లక్షల పనులకు టెండర్లు పిలిచేందుకు అనుమతి.
• అన్నపూర్ణ భోజన పథకానికి సంబంధించిన ఏజెన్సీ హరేకృష్ణ మూవ్‌మెంట్‌ చారిటబుల్‌ ఫౌండేషన్‌తో ఒప్పందం పూర్తి అయినందున మరో రెండు సంవత్సరాల పొడగింపునకు ఎంవోయూ కుదుర్చుకునేందుకు కమిటీ ఆమోదించింది.
• బేగంపేట ఆర్వోబీ మరమ్మతులు, పునరుద్ధరణ పనులకు రూ.20కోట్ల అంచనా ప్రతిపాదనకు పరిపాలన అనుమతికి కమిటీ ఆమోదం.
• రామకృష్ణాపురం (సికింద్రాబాద్‌) రైల్వే స్టేషన్‌ వద్ద ఆర్‌కేపురం ఆర్వోబీ పునరుద్ధరణకు రూ. 6 కోట్ల పనులకు పరిపాలన అనుమతికి ఆమోదం.
• ఎల్బీనగర్‌ నాలుగు జంక్షన్లలో ఎస్‌ఆర్‌డీపీ కింద చేపట్టిన ఫ్లై ఓవర్ల నిర్మాణానికి రివైజ్డ్‌ అంచనా వ్యయం మొత్తం రూ. 550కోట్లకు పరిపాలన ఆమోదం. అదనంగా రూ. 67 కోట్లు పెరిగినట్లు అధికారులు కమిటీ సభ్యులకు వివరించారు.
• యూసుఫ్‌గూడ, వెంగళ్‌రావు నగర్‌ డివిజన్‌లల్లో యూసుఫ్‌గూడ బస్తీ జంక్షన్‌ అభివృద్ధికి అంచనా రూ. 4.90 కోట్లకు పరిపాలన అనుమతికి ఈ-టెండర్లు పిలిచేందుకు అనుమతి.
• శేరిలింగంపల్లి సర్కిల్‌ 19 రహమత్‌నగర్‌ పీజీఆర్‌ విగ్రహం జంక్షన్‌ అభివృద్ధికి అంచనా వ్యయం రూ. 5.17 కోట్లకు పరిపాలన అనుమతి.
• మూసాపేట సర్కిల్‌లో లూలూ ఇంటర్నేషనల్‌ షాపింగ్‌
  మాల్స్‌ ప్రైవేట్‌ లిమిటెడ్‌ సొంత నిధులతో ఇప్పటికే ఉన్న రహదారిని వెడల్పునకు ఆమోదం.
•  బాలాజీ నగర్‌ నుంచి బీఎస్‌ఎన్‌ఎల్‌ ఓపెన్‌ ల్యాండ్‌ వరకు రూ. 599 లక్షల అంచనా వ్యయంతో చేపట్టే (బాక్స్‌ డ్రైన్‌) వరద నీటి కాలువ నిర్మాణానికి కమిటీ ఆమోదం.
• బంజారాహిల్స్‌లో వైకుంఠ మహాప్రస్థానం శ్మశాన వాటిక సీఎస్‌ఆర్‌ పద్ధతిలో మూడు సంవత్సరాల పాటు ఫీనిక్స్‌ ఫౌండేషన్‌ సంస్థతో ఎంవోయూ చేసుకునేందుకు కమిటీ అనుమతి ఇస్తూ ఆమోదం. ఈ సమావేశంలో స్టాండింగ్‌ కమిటీ సభ్యులు మహమ్మద్‌ ముజఫర్‌ హుస్సేన్‌, ఫాహద్‌ బిన్‌ అబ్దుల్‌ బిన్‌ అబ్ధత్‌, మహ్మద్‌ ఖాదర్‌, పొడవు అర్చన, మహమ్మద్‌ నసీర్‌ ఉద్దీన్‌ తదితరులు పాల్గొన్నారు.