బల్దియా బడ్జెట్‌ రూ. 6150కోట్లు

జీహెచ్‌ఎంసీ ప్రధాన కార్యాలయంలో నగర మేయర్‌ గద్వాల్‌ విజయలక్ష్మి అధ్యక్షతన బుధవారం ఏడవ స్టాండింగ్‌ కమిటీ సమావేశం జరిగింది. ఈ సమావేశంలో 2022-23 వార్షిక బడ్జెట్‌ రూ.6150 కోట్లకు స్టాండింగ్‌ కమిటీ ఆమోదించింది

జీహెచ్‌ఎంసీ స్టాండింగ్‌ కమిటీ ఆమోదం
అన్నపూర్ణ భోజనం ధర పెంపును భరించనున్న బల్దియా
స్థాయి సంఘం సమావేశంలో ఆరు అంశాలకు సభ్యుల ఆమోదం

సిటీబ్యూరో, మార్చి 16  : జీహెచ్‌ఎంసీ ప్రధాన కార్యాలయంలో నగర మేయర్‌ గద్వాల్‌ విజయలక్ష్మి అధ్యక్షతన బుధవారం ఏడవ స్టాండింగ్‌ కమిటీ సమావేశం జరిగింది. ఈ సమావేశంలో 2022-23 వార్షిక బడ్జెట్‌ రూ.6150 కోట్లకు స్టాండింగ్‌ కమిటీ ఆమోదించింది. అదే విధంగా స్థాయి సంఘం సమావేశంలో పలు అంశాలకు సభ్యులు ఆమోదం తెలిపారు. ఈ సమావేశంలో కార్పొరేటర్లు పన్నాల దేవేందర్‌ రెడ్డి, మహ్మద్‌ అబ్దుల్‌ సలామ్‌ షాహిద్‌, మహపర, మిర్జా ముస్తఫా బేగ్‌, ప్రవీణ్‌ సుల్తానా, మందగిరి స్వామి, బతా జబీన్‌, ఇ.విజయ్‌ కుమార్‌ గౌడ్‌, మహ్మద్‌ రషీద్‌ ఫరాజుద్దీన్‌, ఎం.శ్రీనివాస రావు, రావుల శేషగిరి, సామల హేమ, కుర్మ హేమలత, కమిషనర్‌ డీఎస్‌.లోకేశ్‌ కుమార్‌, అడిషనల్‌ కమిషనర్లు సంతోష్‌, శృతి ఓఝా, ఏసీ ఫైనాన్స్‌ అడిషనల్‌ కమిషనర్‌ కెనడి, జోనల్‌ కమిషనర్లు సామ్రాట్‌ అశోక్‌, శ్రీనివాస్‌ రెడ్డి, పంకజ, రవికిరణ్‌, వి.మమత, ప్రియాంక అలా, సీసీపీ దేవేందర్‌ రెడ్డి, అడిషనల్‌ సీపీ శ్రీనివాస్‌, సీఈ దేవానంద్‌, ఫైనాన్స్‌ అడ్వైజర్‌ విజయ్‌ కుమార్‌, అకౌంట్‌ చీఫ్‌ ఎగ్జామినర్‌ వెంకటేశ్వర్‌ రెడ్డి, కార్యదర్శి లక్ష్మి, తదితరులు పాల్గొన్నారు.

ఆమోదం తెలిపిన అంశాలు ఇవే..

• ఆరాంఘర్‌ జంక్షన్‌ నుంచి రేతిబౌలి జంక్షన్‌ వరకు పీవీఆర్‌ ఫ్లై ఓవర్‌ పొడవున ట్రాక్‌ లేన్‌, సెంట్రల్‌ మీడియన్‌ 60 మీటర్ల ప్రతిపాదిత రోడ్డుకు 440 ఆస్తుల సేకరణ
• అత్తాపూర్‌ బ్రిడ్జి రేతిబౌలి వరకు చేపట్టే 45 ఫీట్ల రోడ్డు వెడల్పులో 36 ఆస్తుల సేకరణ
• ఓవైసీ మిధాని జంక్షన్‌ నుంచి వయా ఫిసల్‌ బండ మీదుగా కేశవగిరి జంక్షన్‌ వరకు ప్రతిపాదిత 45 మీటర్ల ఇన్నర్‌ రింగ్‌ రోడ్డుకు సెంట్రల్‌ మీడియన్‌, ట్రాక్‌ లేన్‌ వెడల్పు కోసం 78 ఆస్తుల సేకరణ
• రుక్మిణీ ఎన్‌క్లేవ్‌ నుంచి అల్వాల్‌ మెయిన్‌ రోడ్డు బొల్లారం వరకు 18 మీటర్ల రోడ్డు వెడల్పునకు 103 ఆస్తుల సేకరణ
• నానల్‌ నగర్‌ ఎస్సార్‌ పెట్రోల్‌ బంక్‌ నుంచి టిప్పు ఖాన్‌ బ్రిడ్జి వయా లంగర్‌ హౌస్‌ ఫ్లై ఓవర్‌ మీదుగా ప్రతిపాదిత రోడ్డు వెడల్పునకు 164ఆస్తుల సేకరణ
• రూ.5 అన్నపూర్ణ భోజన పథకంలో భాగంగా హరే కృష్ణ మూవ్‌మెంట్‌ చారిటబుల్‌ ఫౌండేషన్‌కు రెండు సంవత్సరాల ఒప్పందం పొడిగింపు కోసం గ్రాంట్‌ రూ.24.25 నుంచి గ్రాంట్‌ రూ.28 పెంచాలని కోరగా రూ. 26.25 గ్రాంట్‌ ఇచ్చేందుకు కమిటీ ఆమోదం.
• ఇంజన్‌ బౌలి (సత్తార్‌ హోటల్‌) జహానుమా పానికి తని, శామా టాకీస్‌ మిస్త్రీగంజ్‌ మీదుగా ఫతే దర్వాజ వరకు చందులాల్‌ బరాదారి (హౌసింగ్‌ బోర్డు కాలనీ) వాటర్‌ వర్స్‌ జంక్షన్‌ వరకు రోడ్డు వెడల్పునకు 274 ఆస్తుల సేకరణ

  స్టాండింగ్‌ కమిటీలో వార్షిక బడ్జెట్‌ ఆమోదం

•  గ్రేటర్‌ హైదరాబాద్‌ మున్సిపల్‌ కార్పొరేషన్‌ 2022-23 వార్షిక బడ్జెట్‌ రూ.6150 కోట్లకు స్టాండింగ్‌ కమిటీ ఆమోదించింది.
• 2021-22లో రూ.5,600 కోట్ల బడ్జెట్‌ను రివైజ్‌ చేసి రూ.6,300 కోట్లకు పెంచారు.
•  ప్రాపర్టీ ట్యాక్స్‌లో రూ.1700 కోట్లు, టౌన్‌ ప్లానింగ్‌లో రూ. 1200 కోట్లు, ట్రేడ్‌ లైసెన్స్‌లో రూ.63 కోట్లు, 15 ఫైనాన్స్‌ (పట్టణ ప్రగతి) రూ.708 కోట్లు, టీడీఆర్‌ ద్వారా రూ.500 కోట్లు వస్తాయని అంచనా వేశారు.