Swapnalok Fire Accident | స్వప్నలోక్‌లో అగ్నిప్రమాదంలో ఆరుగురు చనిపోవడానికి కారణాలివే..

Swapnalok Fire Accident | సికింద్రాబాద్‌లోని స్వప్నలోక్‌ కాంప్లెక్స్‌లో జరిగిన అగ్ని ప్రమాదంలో అడుగడుగునా కాంప్లెక్స్‌ అసోసియేషన్‌ నిర్లక్ష్యం ఉందని, వారు ఎక్కడ కూడా ఫైర్‌ సేఫ్టీ నిబంధనలు పాటించకపోవడంతోనే ప్రాణనష్టం సంభవించిందని తెలంగాణ రాష్ట్ర విపత్తుల స్పందన, ఫైర్‌ సర్వీసెస్‌ డీజీ వై.నాగిరెడ్డి తెలిపారు

Swapnalok Fire Accident | హైదరాబాద్‌/సిటీబ్యూరో, మార్చి 17 (నమస్తే తెలంగాణ) : సికింద్రాబాద్‌లోని స్వప్నలోక్‌ కాంప్లెక్స్‌లో జరిగిన అగ్ని ప్రమాదంలో అడుగడుగునా కాంప్లెక్స్‌ అసోసియేషన్‌ నిర్లక్ష్యం ఉందని, వారు ఎక్కడ కూడా ఫైర్‌ సేఫ్టీ నిబంధనలు పాటించకపోవడంతోనే ప్రాణనష్టం సంభవించిందని తెలంగాణ రాష్ట్ర విపత్తుల స్పందన, ఫైర్‌ సర్వీసెస్‌ డీజీ వై.నాగిరెడ్డి తెలిపారు. స్వప్నలోక్‌లో జరిగిన అగ్ని ప్రమాదానికి ముఖ్య కారణం షార్ట్‌సర్క్యూట్‌ అని, ఇందుకు కాంప్లెక్స్‌ యజమానుల నిర్లక్ష్యం తోడవటంతో సహాయక చర్యలు ఆలస్యమైనట్లు తెలిపారు. ఈ మేరకు ప్రమాదానికి కారణమైన అంశాలు, భద్రతా లోపాలు, తమ సిబ్బంది స్పందించిన తీరుపై ఆయన శుక్రవారం అధికారికంగా ప్రకటన విడుదల చేశారు. స్వప్నలోక్‌ కాంప్లెక్స్‌లోని మొదటి అంతస్తులో ఉన్న ఎలక్ట్రికల్‌ డక్ట్‌లో మంటలు చెలరేగినట్లు ప్రాథమికంగా గుర్తించినట్లు పేర్కొన్నారు.

ఆదేశాలు పాటించని అసోసియేషన్‌

సికింద్రాబాద్‌లో జరిగిన డెక్కన్‌మాల్‌ అగ్ని ప్రమాద ఘటన తర్వాత జీహెచ్‌ఎంసీ, స్థానిక పోలీసులు, విద్యుత్‌ అధికారులు, ఫైర్‌ సేఫ్టీ సిబ్బంది ఆధ్వర్యంలో పైలెట్‌ ప్రాజెక్ట్‌ కింద జీహెచ్‌ఎంసీ పరిధిలో 1150 వాణిజ్య భవనాల్లో తనిఖీలు చేపట్టారు. 650 పరిశ్రమలు, రసాయన గోడౌన్లు, స్క్రాప్‌ గోడౌన్లలో సంయుక్తంగా తనిఖీలు చేపట్టారు. స్వప్నలోక్‌ ఫైర్‌ ఫైటింగ్‌ సిప్టమ్‌లో లోపాలు గుర్తించిన అధికారులు వెంటనే వాటిని సరిదిద్దుకోవాలని సూచనలు చేసింది. అయితే.. దానికంటూ యజమాని ఎవరూ లేకపోవడం, వ్యాపారాలు చేసుకునేవారంతా అసోసియేషన్‌గా ఏర్పడి దానిని నిర్వహిస్తుండటంతో అధికారులిచ్చిన ఆదేశాలను బేఖతారు చేశారు. అలా నోటీసులిచ్చి వారం రోజులు కూడా కాలేదు. అప్పుడే ప్రమాదం సంభవించింది.

ఇలా చేయాలి..

• బహుళ అంతస్థుల భవనాలలో సెక్యూరిటీ సిబ్బంది మాదిరిగానే, ఫైర్‌ సేఫ్టీ అధికారులను నియమించుకోవాలి.
• ప్రమాదం జరిగితే వెంటనే ఎలా వాటిని అడ్డుకోవాలనే విషయంపై సేఫ్టీ డ్రిల్స్‌ చేయాలి.
• బయటకు వెళ్లే మార్గాలను, మెట్లను మూసివేయవద్దు. పాడైన వస్తువులు, చెత్తాచెదారంతో ఆ మార్గాలను నింపకుండా సాఫీగా అందులో నుంచి వెళ్లే విధంగా చూసుకోవాలి.
• భవనం చుట్టూ ఫైర్‌ ఫైటర్స్‌ తిరిగే విధంగా చూసుకోవాలి. సెట్‌ బ్యాక్‌లలో వాహనాలు పార్కింగ్‌ చేయాలి.

స్వప్న లోక్‌లో గమనించిన అంశాలివే..

• షార్ట్‌ సర్యూట్‌ కారణంగా ఎలక్ట్రికల్‌ డక్ట్‌లో మంటలు చెలరేగి.. డక్ట్‌ గుండా 32 మీటర్ల ఎత్తులోని 5వ అంతస్తు వరకు వ్యాపించాయి. దీంతో తీవ్ర నష్టం వాటిల్లింది.
• స్వప్నలోక్‌ కాంప్లెక్స్‌లో అందుబాటులో ఉన్న అగ్నిమాపక పరికరాలు పని చేసే స్థితిలో లేవు.
• బయటకు వెళ్లే మెట్ల దారికి దొంగల భయంతో తాళాలు వేశారు.
• చెత్త, పాడైన వస్తువులు మెట్లకు అడ్డుగా ఉన్నాయి.
• బయట ఉన్న ఖాళీ స్థలం పార్కింగ్‌ వాహనలతో నిండిపోయింది. దీని కారణంగా బ్రోంటో సై లిఫ్ట్‌ను చేసే రెస్క్యూలో కొంత ఆలస్యం జరిగింది. అగ్నిమాపక వాహనాలకు దారినిచ్చేందుకు స్థానిక పోలీసులే వాహనాలన్నింటినీ పక్కకు జరపాల్సి వచ్చింది.
• ఎలక్ట్రికల్‌ వైర్లకు ఫైర్‌ డోర్స్‌ బదులుగా వుడ్‌ డోర్స్‌ ఏర్పాటు చేశారు.
• 5వ అంతస్తులో ప్యాకేజింగ్‌ కార్డ్‌ బోర్డ్‌ పెట్టెలు, స్రాప్‌ మెటీరియల్‌ నిండి ఉండటంతో మంటలు పెద్దఎత్తున ఎగిసిపడ్డాయి.
• మంటలు ఆర్పేందుకు అగ్నిమాపక సిలిండర్లు ఉన్నా.. అవి ఎక్స్‌పైరీ అయిపోయి పనిచేయని స్థితిలో ఉన్నాయి.
• 2011లో ఈ భవన యజమానిపై ఫైర్‌సేఫ్టీ నిబంధనలు పాటించలేదని కేసు నమోదైంది.