అన్ని రంగాల్లో సికింద్రాబాద్‌ అగ్రగామి

సికింద్రాబాద్‌ అసెంబ్లీ నియోజకవర్గాన్ని అన్ని రంగాల్లో అగ్రగామిగా నిలుపుతున్నామని డిప్యూటీ స్పీకర్‌ పద్మారావుగౌడ్‌ అన్నారు. గతేడాది కాలంలో జీహెచ్‌ఎంసీ ద్వారా రూ.67 కోట్లు, జలమండలి ద్వారా రూ.ఆరు కోట్ల నిధులతో వివిధ పనులను ప్రారంభించామన్నారు.

• సమీక్షా సమావేశంలో డిప్యూటీ స్పీకర్‌ పద్మారావు

ఉస్మానియా యూనివర్సిటీ, మార్చి 27: సికింద్రాబాద్‌ అసెంబ్లీ నియోజకవర్గాన్ని అన్ని రంగాల్లో అగ్రగామిగా నిలుపుతున్నామని డిప్యూటీ స్పీకర్‌ పద్మారావుగౌడ్‌ అన్నారు. గతేడాది కాలంలో జీహెచ్‌ఎంసీ ద్వారా రూ.67 కోట్లు, జలమండలి ద్వారా రూ.ఆరు కోట్ల నిధులతో వివిధ పనులను ప్రారంభించామన్నారు. సికింద్రాబాద్‌ అసెంబ్లీ నియోజకవర్గ అభివృద్ధి కార్యకలాపాలపై సమీక్షా సమావేశాన్ని సోమవారం నిర్వహించారు. సీతాఫల్‌మండిలోని ఎమ్మెల్యే క్యాంపు కార్యాలయంలో నిర్వహించిన ఈ సమావేశానికి డిప్యూటీ మేయర్‌ మోతె శ్రీలతా శోభన్‌రెడ్డి, కార్పొరేటర్లు సామల హేమ, కంది శైలజ, రాసూరి సునీత, లింగాని ప్రసన్నలక్ష్మి శ్రీనివాస్‌, జీహెచ్‌ఎంసీ జోనల్‌ కమిషనర్‌ శ్రీనివాస్‌రెడ్డి, డిప్యూటీ కమిషనర్‌ దశరథ్‌, జలమండలి జీఎం రమణారెడ్డి, ఈఈ ఆశాలత, బీఆర్‌ఎస్‌ కార్మిక విభాగం అధ్యక్షుడు మోతె శోభన్‌రెడ్డి, నాయకులు హాజరయ్యారు. ఈ సందర్భంగా పద్మారావుగౌడ్‌ మాట్లాడుతూ సికింద్రాబాద్‌ అసెంబ్లీ నియోజకవర్గం పరిధిలో యాభై ఏళ్లలో చేపట్టలేని ఎన్నో పనులను కేవలం గడిచిన ఏడేళ్ల వ్యవధిలోనే చేపట్టామని తెలిపారు.

• సీతాఫల్‌మండిలోని ప్రభుత్వ కుట్ట వెల్లోడీ ఆసుపత్రిని 75 పడకల స్థాయికి పెంచి, కొత్త భవనాల నిర్మాణానికి రూ.12 కోట్ల నిధులను ప్రభుత్వం నుంచి మంజూరు చేయించామని చెప్పారు. త్వరలోనే తార్నాక, అడ్డగుట్ట డివిజన్లలో మరో రెండు బస్తీ దవాఖానలు ఏర్పాట్లు చేస్తున్నామని తెలిపారు.
• మాణికేశ్వరీనగర్‌, చిలకలగూడ ఆర్‌యూబీల నిర్మాణానికి రూ.యాభై కోట్లు మంజూరయ్యాయని పేర్కొన్నారు. జంట నగరాల్లో అత్యధికంగా మహిళా పొదుపు గ్రూపులకు రుణాలను అందించిన ఘనతను సాధించామని చెప్పారు.
• 1977 పొదుపు సంఘాల్లో 449 సంఘాలకు రూ.19.98 కోట్ల మేర రుణాలను అందించామన్నారు. రాష్ట్రంలోనే అత్యధికంగా నియోజకవర్గంలో పేదలకు వైద్య ఖర్చుల నిమిత్తం సీఎంఆర్‌ఎఫ్‌ కింద నిధులను అందించామని, మొత్తం సుమారు 3100 మందికి రూ.29 కోట్ల మేరకు నిధులను అందజేశామని వివరించారు.
• ఆడపిల్లల తల్లిదండ్రులకు భారం కాకుండా పెళ్లి ఖర్చుల కోసం కళ్యాణలక్ష్మి, షాదీ ముబారక్‌ పథకాలను అమలు చేస్తున్నామని గుర్తు చేశారు.
• సీతాఫల్‌మండిలో జూనియర్‌, డిగ్రీ కళాశాలల భవన నిర్మాణానికి రూ.29.75 కోట్ల నిధులను ప్రభుత్వం ద్వారా మంజూరు చేయించామన్నారు. సెట్విన్‌ శిక్షణా కేంద్రాన్ని సైతం సీతాఫల్‌మండిలో నెలకొల్పి ఉపాధి శిక్షణ అందిస్తున్నామని పేర్కొన్నారు.
• సీతాఫల్‌మండిలో మల్టీపర్పస్‌ ఫంక్షన్‌ హాల్‌, బోయబస్తీ, మధురనగర్‌ కాలనీల్లో ఫంక్షన్‌ హాళ్లను నిర్మించి పేదలకు మంచి సౌకర్యాలతో కళ్యాణ వేదికలను సిద్ధం చేశామన్నారు.
• అడ్డగుట్ట, లాలాపేటలో రూ.తొమ్మిది కోట్ల ఖర్చుతో మరో రెండు ఫంక్షన్‌హాల్స్‌, రూ. ఆరు కోట్లతో స్విమ్మింగ్‌పూల్‌ నిర్మిస్తున్నామని, వాటి నిర్మాణ పనులు వేగంగా జరుగుతున్నాయన్నారు. వారసిగూడ, చిలకలగూడ, లాలాగూడ, గోపాలపురం ట్రాఫిక్‌కు కొత్త పోలీస్‌ స్టేషన్‌ భవనాలు నిర్మించాలని నిర్ణయించినట్లు తెలిపారు.