Visit:
సిటీబ్యూరో, సెప్టెంబర్‌ 20(నమస్తే తెలంగాణ): నగరానికి చెందిన ఓ మహిళను ఆన్‌లైన్‌ టాస్క్‌ల పేరుతో ఇన్వెస్ట్‌మెంట్‌ చేయించారు. కొంత లాభాలిచ్చి రూ. 1.05కోట్లు పెట్టుబడి పెట్టించారు. తన అకౌంట్‌లో ఆరుకోట్లు కనిపిస్తున్నా వాటిని విత్‌ డ్రా చేసే అవకాశం లేకపోవడంతో తాను మోసపోయానని గ్రహించిన బాధితురాలు సైబర్‌ పోలీసులకు ఫిర్యాదు చేశారు. ఈ కేసులో చైనాకు చెందిన చెన్‌చెన్‌ అనే నేరగాడు అసలైన సూత్రధారి కాగా మిగతావారు అకౌంట్లను ఇవ్వడం, మ్యూల్‌ అకౌంట్లు ఓపెన్‌ చేయడం వంటివి చేశారు. పోలీసులు చెన్‌చెన్‌ కాకుండా మిగతావారిని అరెస్ట్‌ చేశారు.
కానీ డబ్బులు రాబట్టలేకపోయారు. ట్రేడింగ్‌ ఫ్రాడ్‌ కేసులో సైబర్‌ క్రైమ్‌ పోలీసులు పంజాబ్‌కు చెందిన గుర్‌దిత్‌ సింగ్‌ అనే అకౌంట్‌ హోల్డర్‌ను అరెస్ట్‌ చేశారు. హైదరాబాద్‌కు చెందిన ఒక వ్యక్తి ఏప్రిల్‌నెలలో తాను ఆన్‌లైన్‌ ట్రేడింగ్‌లో పెట్టుబడులు పెడితే 2%-20% వరకు లాభాలు ఇస్తామని చెప్పడంతో అతను రూ.86 లక్షలు పెట్టుబడి పెట్టారు. మొదట్లో లాభాలు ఇచ్చినా తర్వాత పెట్టుబడి డబ్బులు కూడా ఇవ్వకపోవడంతో బాధితుడికి అనుమానం వచ్చి సైబర్‌ పోలీసులకు ఫిర్యాదు చేశారు. గుర్‌దిత్‌ సింగ్‌ను అరెస్ట్‌ చేశారు.
సిటీబ్యూరో, సెప్టెంబర్‌ 20(నమస్తే తెలంగాణ): ఇలా దాదాపుగా అన్ని సైబర్‌ నేరాల్లో సైబర్‌ పోలీసులు అరెస్ట్‌ చేసిన వారిలో అసలు సూత్రధారులు తప్పించుకుంటున్నారు. ఒక్క ఆగస్టు నెలలోనే 338 కేసులు.. 233 ఎఫ్‌ఐఆర్‌లు.. 14 రాష్ర్టాలకు చెందిన 61 మంది అరెస్ట్‌ కాగా.. వీరిలో అసలు నేరస్తులు, డబ్బులు దోచేసినవాళ్లు దొరకలేదు. ప్రతీ ఏడాది లక్షకు పైగా సైబర్‌ మోసాలు జరుగుతున్నాయి.
ఇండియన్‌ బ్యాంక్‌ అకౌంట్లను ఇంటర్నేషనల్‌ సైబర్‌ నేరగాళ్లు టార్గెట్‌ చేస్తున్నారు. కొందరు ఏజెంట్ల సాయంతో అమాయకులకు డబ్బులు ఎరవేసి వారి అకౌంట్లను అద్దెకు తీసుకుంటున్నారు. ఆన్‌లైన్‌ మోసాలతో కొట్టేసిన డబ్బులను మ్యూల్‌ అకౌంట్లకు ట్రాన్స్‌ఫర్‌ చేసుకుని క్రిప్టోకరెన్సీ, బిట్‌కాయిన్స్‌ రూపంలోకి మార్చుకుంటున్నారు. ఇందుకోసం ఏజెంట్లతోపాటు ఖాతాదారులకు భారీగా కమీషన్లు ఇస్తున్నారు. ఇలాంటి మ్యూల్‌ అకౌంట్లను గుర్తించి ఖాతాదారులను, ఏజెంట్లను అరెస్ట్‌ చేస్తున్నారు తప్ప.. అసలు నేరస్తులను పట్టుకోలేకపోతున్నారు.
చాలా సందర్భాల్లో నేరగాళ్లు విదేశాల నుంచి అంటే కంబోడియా, మయన్మార్‌, థాయ్‌లాండ్‌ వంటి దేశాల నుంచి పెద్ద ఎత్తున మోసాలకు పాల్పడుతున్నారని పోలీసుల విచారణలో తేలింది. అక్కడ నుంచి డమ్మీ సిమ్‌ల ద్వారా బాధితులను ట్రాప్‌ చేయడం, ఆ తర్వాత వారిపై ఏదో రకమైన ఒత్తిడి తీసుకొని రావడం, అంతకుముందే మన దేశానికి సంబంధించిన వారిని కమీషన్‌ పేరుతో ఆకర్షించి వారి ద్వారా బ్యాంక్‌ లావాదేవీలు కొనసాగించడం, బ్యాంక్‌ అకౌంట్లు ఓపెన్‌ చేయడం వంటివి చేయడం వల్ల అసలు నేరస్తులు తప్పించుకుని బ్యాంక్‌ ఖాతాలు ఇచ్చిన వారు, వాటిని కొనసాగించిన వారు పోలీసులకు చిక్కుతున్నారు. ప్రతీ ఏటా పెరిగిపోతున్న సైబర్‌ నేరాల్లో నైజీరియన్‌ గ్యాంగ్స్‌, చైనా సైబర్‌ నేరగాళ్ల పాత్రే ఎక్కువగా ఉంటున్నది.
ఢిల్లీ, ముంబై, రాజస్థాన్‌, యూపీ,బీహార్‌, జార్ఖండ్‌లలో ఏజెంట్లను నియమించుకుని ఖాతాల దందా చేస్తున్నారు. గత ఏడాది కాలంగా ఏపీ, తెలంగాణల్లోనూ ఎక్కువగా ఈ తరహా ఖాతాలు పెరిగినట్లు పోలీసులు గుర్తించారు. కాగా, నేషనల్‌క్రైమ్‌ రిపోర్టింగ్‌ పోర్టల్‌లో దాదాపు 1.14 లక్షల ఫిర్యాదులు నమోదుకాగా, అందులో ట్రై కమిషనరేట్‌లే ముందు స్థానాల్లో ఉన్నాయి. గతంతో పోలిస్తే ఈ సంవత్సరం సుమారు 4వేల కోట్ల రూపాయల ఆర్థిక నష్టం జరిగి ఉండవచ్చని పోలీసులు అంచనావేస్తున్నారు. ఇటీవల జరుగుతున్న నేరాలు చూస్తే దాదాపు కోటిరూపాయల పైన మోసపోయిన వారి సంఖ్య ఎక్కువగా ఉండడం గమనార్హం.
