మందులు కొనేటప్పుడు.. జాగ్రత్త

• సూపర్‌ అంటూ.. నకిలీ మెడిసిన్‌ ఇస్తారు.!
• నకిలీ కావని నిర్ధారించుకున్నాకే తీసుకోవాలి
• లైసెన్స్‌ పొందిన దుకాణాల్లోనే ఖరీదు చేయండి
• సీపీ అంజనీకుమార్‌

సిటీబ్యూరో, ఏప్రిల్‌ 28 (నమస్తే తెలంగాణ): కొవిడ్‌ 19 ఇన్‌ఫెక్షన్‌ పెరుగుతూ పోతున్నది. ఇది గత ఏడాది కంటే ఎక్కువగా నమోదవుతున్నది. ఈ నేపథ్యంలో మందులు కొనేటప్పుడు ప్రజలు అప్రమత్తంగా ఉండాలని నగర పోలీస్‌ కమిషనర్‌ అంజనీకుమార్‌ ట్విట్టర్‌ ద్వారా ప్రజలకు సూచించారు. విపత్కర పరిస్థితుల్లో అవసరమైన మందులను కొందరు బ్లాక్‌మార్కెట్‌లో విక్రయిస్తున్నారని, అలాంటి వారి సమాచారాన్ని పోలీసులకు తెలుపాలన్నారు. రెమిడిసివర్‌ బ్లాక్‌లో విక్రయిస్తున్న 40మందిని ఇప్పటి వరకు అరెస్ట్‌ చేశామన్నారు. ఈ సందర్భంగా మందులు కొనుగోలు చేసే సమయంలో నకిలీ మందుల విక్రయదారుల నుంచి జాగ్రత్తగా ఉండాలన్నారు.
ఇవి పాటించాలి..!

• మందులు కొనుగోలు చేసే సమయంలో గుర్తుతెలియని వెబ్‌సైట్‌ల నుంచి కొనుగోలు చేయవద్దు. లైసెన్స్‌ పొందిన కెమిస్ట్‌ అండ్‌ డ్రగిస్ట్‌ల దగ్గర మాత్రమే మందులు కొనుగోలు చేయాలి.
• వైద్యుల ప్రిస్క్రిప్షన్‌తోనే మందులు కొనాలి.
• కొందరు మందుల దుకాణాలు, వైద్యులు తప్పుడు వాగ్దానాలు(ప్రామిసెస్‌) చేస్తుంటారు. పలాన మెడిసిన్‌ బాగా పనిచేస్తుందని తమ వద్ద ఉన్న మందులను ఇచ్చేందుకు ప్రయత్నిస్తుంటారు. వాటిని నమ్మవద్దు. వైద్యులు రాసిన ప్రిస్క్రిప్షన్‌లోని మందులను తీసుకోవాలి.
• ఎంఆర్‌పీ ధరలను పరిశీలించాలి. అంతకంటే ఎక్కువగా విక్రయిస్తే పోలీసులకు సమాచారం ఇవ్వాలి.
• వెబ్‌సైట్ల ద్వారా మందులు కొనుగోలుచేసే సమయంలో కార్డులు, బ్యాంకింగ్‌ వివరాల విషయంలో జాగ్రత్తగా ఉండాలి. సైబర్‌మోసాలు జరిగే అవకాశాలుంటాయి.
• మెడిసిన్‌ కొనుగోలుచేసే సమయంలో మీకు తెలిసిన వారితో చర్చించండి. ఎక్కడ కొన్నారు, ఎలా ఉన్నాయి సదరు ప్రొడక్ట్‌కు సంబంధించిన విషయాలను తెలుసుకోవాలి.