GHMC | రోడ్‌ కటింగ్‌ నయా రూల్స్‌.. ఇబ్బడిముబ్బడి తవ్వకాలకు చెక్‌!

జీహెచ్‌ఎంసీలో రోడ్‌ కటింగ్‌ అనుమతులపై కమిషనర్‌ ఇలంబర్తి నూతన నియమ నిబంధనలను అమల్లోకి తీసుకువస్తూ తాజాగా ఉత్తర్వులు జారీ చేశారు.

• ఇక మీదట ఇంజినీర్లే అన్నింటికీ బాధ్యులు

GHMC | సిటీబ్యూరో, ఏప్రిల్‌ 14 (నమస్తే తెలంగాణ) : జీహెచ్‌ఎంసీలో రోడ్‌ కటింగ్‌ అనుమతులపై కమిషనర్‌ ఇలంబర్తి నూతన నియమ నిబంధనలను అమల్లోకి తీసుకువస్తూ తాజాగా ఉత్తర్వులు జారీ చేశారు. అడ్డగోలుగా రోడ్‌ కటింగ్‌ పర్మిషన్లు ఇస్తుండడం, తిరిగి పునరుద్ధరణలో జాప్యం కారణంగా వాహనదారులు, ప్రజలు ఇబ్బందులు పడుతుండడం, అంతేకాకుండా ముఖ్యంగా అసంపూర్తిగా రోడ్‌ కటింగ్‌ ప్రతిపాదనలు సమర్పిస్తుండడం పట్ల కమిషనర్‌కు ఫిర్యాదులు వెలువెత్తాయి.

అన్నింటి కంటే జోనల్‌ కమిషనర్ల అనుమతితో రోడ్‌ కటింగ్‌ పర్మిషన్లు ఇక ఉండకుండా నేరుగా సంబంధిత ఇంజినీర్లే బాధ్యులుగా వ్యవహరించనున్నారు. రోడ్‌ కటింగ్‌ పర్మిషన్‌ నుంచి రహదారి పునరుద్ధ్దరణ వరకు ఇంజినీర్లు కీలకం కానున్నారు.

నూతన నియమ నిబంధనలు ఇవే

• పది మీటర్ల వరకు రోడ్‌ కటింగ్‌కు ఎగ్జిక్యూటివ్‌ ఇంజినీర్‌ అనుమతులు ఇవ్వాలి.
• 15 మీటర్ల రోడ్డు కటింగ్‌ కోసం వచ్చిన దరఖాస్తులను సూపరింటెండెంట్‌ ఇంజినీర్‌ పరిశీలించి అనుమతులు ఇవ్వడంతో పాటు పనులు పూర్తయిన తర్వాత పునరుద్ధరణకు మళ్లీ జీహెచ్‌ఎంసీకి పంపించాల్సి ఉంటుంది.
• 15 మీటర్ల కన్నా ఎక్కువ రోడ్డు కటింగ్‌కు అనుమతులు కోరితే ఆ దరఖాస్తులను క్షేత్రస్థాయిలో పరిశీలించాలి. తనిఖీల నివేదికతో పాటు సంబంధిత ఫైల్‌ను చీఫ్‌ ఇంజినీర్‌కు పంపాల్సి ఉంటుంది.
• గతంలో జారీ చేసిన జీవో 82 ప్రకారం రోడ్డు కటింగ్‌ క్యాలిక్కులేషన్లు, జీవో 53 ప్రకారం విధించాల్సిన రోడ్డు కట్టింగ్‌ చార్జీలను తప్పకుండా పాటించాల్సి ఉంటుంది.
• రోడ్డు కటింగ్‌ మెథలాజీస్‌ను అనుసరించి విధించాల్సిన కటింగ్‌ చార్జీల శాంపిళ్లను సర్క్యులర్‌లో పొందుపర్చాలి.

అంచనాలు, మంజూరీలు తప్పనిసరి
రోడ్‌ కటింగ్‌ పనులు పూర్తయిన వెంటనే రోడ్డును పునరుద్ధరించేందుకు ఇంజినీర్లు అంచనాలు తయారు చేసి, దానికి సంబంధించిన మంజూరీని కూడా జతపర్చాల్సి ఉంటుందని అధికారులు పేర్కొన్నారు. సంబంధిత రోడ్డుకు సంబంధించి ల్యాండ్‌ కాస్ట్‌, కటింగ్‌కు సంబంధించిన గణాంకాలను కూడా సమర్పించాల్సి ఉంటుందన్నారు.

విద్యుత్‌ స్తంభాల ఏర్పాటు కోసం వస్తున్న రోడ్డు కటింగ్‌ ప్రతిపాదనలకు గూగుల్‌ మ్యాప్‌ను కూడా పంపించాలి. కటింగ్‌లకు విధించే చార్జీలకు 16.5 శాతం సెంటేజీ చార్జీలను, అలాగే రోడ్డు పునరుద్ధరణ పనులకు 18 శాతం జీఎస్టీని విధిస్తూ సీఈ (చీఫ్‌ ఇంజినీర్‌)కి ప్రతిపాదనలు పంపాల్సి ఉంటుందని సర్క్యూలర్‌లో పేర్కొన్నారు.