Telangana | ఏదీ నాటి దూకుడు.. సంచలనాత్మక కేసుల ఛేదనలో తడబడుతున్న పోలీసులు!

హైదరాబాద్‌ పోలీసులంటే అంతర్రాష్ట్ర దోపిడీ దొంగల ముఠాలకు హడల్‌.. ఎంత చాకచక్యంగా నేరాలు చేసినా హైదరాబాద్‌ పోలీసులు పట్టుకుంటారనే భయం వారిలో ఉండేది.. ఇదంతా గత పదేండ్ల కిందట వరకు... నేడు ఆ భయం పోయింది.

• సంచలనాత్మక కేసుల ఛేదనలో తడబడుతున్న నగర పోలీసులు
• టాస్క్‌ పెద్దది.. ఫోర్స్‌ చిన్నది..!
• 48 గంటల్లో ఛేదించే టార్గెట్‌ ఏమయ్యింది..
• నాడు సిటీ పోలీసులను చూస్తే అంతర్రాష్ట్ర ముఠాలకు ముచ్చమటలు
• నేడు ఈజీగా తప్పించుకుంటున్న దోపిడీ దొంగలు
• మూడు కమిషనరేట్ల మధ్య కొరవడిన సమన్వయం

Telangana | సిటీబ్యూరో, జనవరి 22(నమస్తే తెలంగాణ): హైదరాబాద్‌ పోలీసులంటే అంతర్రాష్ట్ర దోపిడీ దొంగల ముఠాలకు హడల్‌.. ఎంత చాకచక్యంగా నేరాలు చేసినా హైదరాబాద్‌ పోలీసులు పట్టుకుంటారనే భయం వారిలో ఉండేది.. ఇదంతా గత పదేండ్ల కిందట వరకు… నేడు ఆ భయం పోయింది. హైదరాబాద్‌లో నేరాలు జరుగొద్దు.. జరిగితే 24 గంటల నుంచి 48 గంటల్లో ఛేదించాలనే పట్టుదలతో పోలీసులు ఆయా కేసులను ఛేదించే వారు. ఇందులో ప్రధానంగా టాస్క్‌ఫోర్స్‌ కీలకం పాత్ర పోషించేది. నేడు టాస్క్‌ పెద్దదైనా అంత ఫోర్స్‌ అందులో కన్పించడం లేదనే వాదన కన్పిస్తోంది.

తాజాగా హైదరాబాద్‌లో జరిగిన కాల్పుల ఘటన జరిగి వారం రోజులు కావస్తున్నా ఇంకా దొంగల జాడ కనిపెట్టలేకపోవడంలో పోలీసులు విఫలం కావడంపై విమర్శలు వస్తున్నాయి. ఈ కేసు ఛేదించడానికి శాంతి భద్రతల పోలీసులతో పాటు టాస్క్‌ఫోర్స్‌, సీసీఎస్‌ బృందాలు రంగంలోకి దిగాయి. వీరికి తోడు కర్ణాటక పోలీసులు కూడా ప్రత్యేక బృందాలతో గాలింపు చేస్తున్నారు. ఈ రెండు రాష్ర్టాల పోలీసులకు ఇప్పుడు ఇద్దరు దోపిడీ దొంగలు మోస్ట్‌వాంటెడ్‌గా మారారు.

ఇలాంటి సంచలనాత్మకమైన ఘటనలను ఈజీగా హైదరాబాద్‌ పోలీసులు ఛేదించి దేశంలోనే బెస్ట్‌ పోలీసింగ్‌గా పేరు తెచ్చుకున్నారు. ప్రభుత్వాలు మారినా అదే యంత్రాంగం పనిచేస్తోంది.. అయితే పని చేయడంలోనే అప్పటిలా ఉత్సాహం చూపకపోవడానికి కారణమేమిటీ… ఆయా విభాగాల మధ్య సమన్వయం ఎలా ఉంది, మనకెందుకు ఫలాన టీమ్‌ అక్కడకు వెళ్లింది కదా అనే ధోరణితో ఒకరిపై ఒకరు వేసుకొని కేసు ఛేదనలో చతికిల పడుతున్నారా? అనే సందేహాలు వ్యక్తమవుతున్నాయి. గతంలో టాస్క్‌ఫోర్స్‌ మాదిరిగానే సీసీఎస్‌ బృందాలు కూడా కీలకంగా పనిచేయాలనే ఆలోచనతో సీసీఎస్‌ను బలోపేతం చేశారు. అయితే సీసీఎస్‌ను బలోపేతం చేసి రెండేండ్లవుతున్నా ఇప్పటి వరకు కీలక కేసులను ఛేదించలేదు, దానికి తోడు అవినీతి, అక్రమాలు గత ఏడాది ముఠా కట్టుకొని విమర్శలకు గురయ్యారు.

కొన్ని సంఘటనలు

• తెలంగాణ ఏర్పాటైన 2014, నవంబర్‌లో హైదరాబాద్‌లో సీసీ కెమెరాలు కూడా అంతగా లేవు. ఆ సమయంలో కేబీఆర్‌ పార్కు వద్ద వాకింగ్‌ చేస్తున్న ఒక ఫార్మ కంపెనీ యజమానిని లక్ష్యంగా చేసుకొని ఏకే 47తో కాల్పులు జరిపి భయభ్రాంతులకు గురిచేసి కిడ్నాప్‌కు దుండగుడు విఫలయత్నం చేశాడు. అది సాధ్యం కాకపోవడంతో గన్‌ అక్కడే వదిలేసి పరారయ్యాడు. రంగంలోకి దిగిన పోలీసులు 24 గంటల్లో నిందితుడిని గుర్తించి 48 గంటల్లోపు నిందితుడు పోలీస్‌ డిపార్టుమెంట్‌లో పనిచేసిన కానిస్టేబుల్‌గా గుర్తించి కర్నూల్‌లో అరెస్ట్‌ చేసి నగరానికి తరలించారు. ఇక్కడ టాస్క్‌ఫోర్స్‌ పోలీసులు వేగంగా స్పందించి నిందితుడిని పట్టుకోడంలో కీలకంగా వ్యవహరించారు.
• 2016లో షాహినాథ్‌గంజ్‌ పోలీస్‌స్టేషన్‌ పరిధిలో ఓంనగర్‌లో నివాసముండే పదో తరగతి చదువుతున్న వ్యాపారి కొడుకును కిడ్నాప్‌ చేసి దుండగులు హత్య చేశారు. మృతదేహాన్ని సికింద్రాబాద్‌ అల్ఫా హోటల్‌ వద్ద బాక్స్‌లో చుట్టి పడేసి వెళ్లిపోయారు. దీనిపై నగర పోలీసులు వేగంగా స్పందించి నిందితులను 24 గంటల్లోనే గుర్తించారు. కిడ్నాపర్లు ముందుగా బాలుడితో పరిచయం పెంచుకున్నారు.. ఆ తరువాత నమ్మించి అతడిని నమ్మించి ద్విచక్రవాహనంపై తీసికెళ్లి, ఆ తరువాత కిడ్నాపర్లు ఒక కారులో బాలుడిని కట్టి బంధించారు. ఈ క్రమంలోనే అరవకుండా బాలుడి నోటికి ప్లాస్టర్‌ వేయడంతో ఊపిరాడక మృతి చెందాడు. అయినా బాలుడి తండ్రికి ఫోన్‌ చేసి రూ.10 కోట్లు కావాలంటూ డిమాండ్‌ చేశారు. బాలుడి తండ్రి ఇచ్చిన ఫిర్యాదుతో రంగంలోకి దిగిన పోలీసులు సీసీ కెమెరాలను పరిశీలించి నిందితుల ఆచూకీని గుర్తించారు. మరో 24 గంటల్లో నిందితులను పట్టుకున్నారు. ఈ కేసులోను టాస్క్‌ఫోర్స్‌ కీలకంగా వ్యవహరించింది.
• 2018లో నిజాం మ్యూజియంలో దొంగలు పడ్డారు. వంద కోట్ల రూపాయల విలువైన వజ్ర వైడ్యురాలతో కూడిన వస్తువులను మ్యూజియం నుంచి దొంగలు కొట్టేశారు. 45 రోజుల పాటు రెక్కీ నిర్వహించి, పోలీసులకు ఆధారాలు దొరకకుండా ఉండేలా దొంగలు ఈ దొంగతనానికి పాల్పడ్డారు. ఈ కేసులో క్లూస్‌ టీమ్‌ ఇచ్చిన కొన్ని ఆధారాలు, సీసీ కెమెరాలలోని దొరికిన కొన్ని వీడియోలు పోలీసులకు కీలకంగా మారాయి. దీనిని ఛేదించేందుకు టాస్క్‌ఫోర్స్‌ పోలీసులు పక్క రాష్ర్టాలలోనూ గాలింపు చేపట్టాయి. అయితే వారం రోజులలోపే ఈ కేసును పోలీసులు ఛేదించారు, పోయిన సొత్తు మొత్తాన్ని రికవరీ చేసి, సిటీ పోలీస్‌ దర్యాప్తులలో బెస్ట్‌ అని రుజువు చేసుకున్నారు.
• ఒక రాజకీయ నాయకుడి ఇంట్లోకి చొరబడిన దుండగులు కాల్పులు జరిపి పరారయ్యారని, ఆ కాల్పులలో అతనికి గాయాలు కావడంతో దవాఖానకు తరలించారు. ఇంట్లోకి వచ్చి కాల్పులు జరిపిన దుండగులు ధైర్యంగా హైదరాబాద్‌ను వదిలేసి వెళ్లిపోయారంటూ వార్తలు వెలవడ్డాయి. అయితే కాల్పుల ఘటనపై భిన్న కోణాల్లో దర్యాప్తు జరిపిన పోలీసులు ఇది ఫ్యాక్షనిస్టుల పనా? ఉగ్రవాదులా? ప్రత్యర్థులా? దోపిడీ దొంగలా? ఆస్తుల గొడవలలో జరిగిందా? అనే కోణాలలో దర్యాప్తు జరిపారు. అయితే ఇవి దుండగులు కాల్చిన కాల్పులు కాదని, ఏదో ఇందులో జరిగి ఉంటుందనే కోణం పోలీసులు దర్యాప్తు జరిపి సీన్‌ రీకన్‌స్ట్రక్షన్‌ చేయించారు. చివరకు ఆ నాయకుడే తనకు తానుగా కాల్పులు జరిపించుకొని ఒక సంచలనం సృష్టించాలని తద్వారా ప్రజల సానుభూతి పొందాలని భావించాడని వెల్లడయ్యింది. ఈ కేసును కూడా 48 గంటల్లోనే పోలీసులు నిర్ధారించారు.

కొరవడుతున్న సమన్వయం..!

నేడు మూడు పోలీస్‌ కమిషనరేట్లతో పాటు స్థానికంగా ఉండే జూన్‌లు, డివిజన్లలోని ఆయా ఠాణాల మధ్యనే సమన్వయం కొరవడుతుంది. ఇటీవల అఫ్జల్‌గంజ్‌లో జరిగిన కాల్పుల ఘటనలోని నిందితులు కూడా అఫ్జల్‌గంజ్‌ నుంచి సికింద్రాబాద్‌కు వెళ్లి, సికింద్రాబాద్‌ నుంచి గజ్వేల్‌ వెళ్లేందుకు ప్లాన్‌ చేసి తిరుమలగిరిలో దిగిపోయినట్లు బయటకు వచ్చింది. ఆ తరువాత రూట్‌పై స్పష్టత రావడం లేదు, సీసీ కెమెరాలు కూడా నగరంలో అక్కడక్కడ పనిచేయకపోవడంతో సమస్య వస్తోంది. దీనికి తోడు దర్యాప్తు విభాగాల మధ్య సమన్వయం కొరవడిందనే విమర్శలు వస్తున్నాయి. ఎవరు కూడా దీనిపై పూర్తి బాధ్యత తీసుకోవడంలేదనే విమర్శలు వస్తున్నాయి. కాంగ్రెస్‌ ప్రభుత్వం అధికారంలోకి వచ్చిన తరువాత హైదరాబాద్‌ పోలీసింగ్‌లో మార్పులు చేసుకున్నాయి. ఒక్కసారిగా నేరాలు పెరగడం, దోపిడీ దొంగతనాలకు నిలయంగా మారడంతో ప్రభుత్వం కండ్లు తెరిచి నగర పోలీస్‌ బాస్‌ను బదిలీ చేసింది. కొత్తగా వచ్చిన బాస్‌ ఐదు నెలలుగా పోలీస్‌ వ్యవస్థను గాడిలో పెట్టేందుకు శ్రమిస్తున్నారు. కొంత వరకు గాడిలో పడినా, పూర్తిస్థాయిలో అన్ని విభాగాలు సమన్వయంతో పనిచేసే విధంగా పట్టు సాధించేలా మరిన్ని చర్యలు తీసుకోవాల్సిన అవసరముందని పోలీసు శాఖలో చర్చించుకుంటున్నారు.