వెన్నుకు దన్ను

March 31, 2021 / 01:25 AM IST

నెలలు నిండే కొద్దీ గర్భిణి శరీరంలో చాలా మార్పులు వస్తుంటాయి. కడుపులో బిడ్డను మోసే క్రమంలో వెన్నుమీద ఒత్తిడి ఎక్కువవుతుంది. దీని ప్రభావం మెడపైనా పడుతుంది. ఈ సమస్యకు త్రికోణాసనం చక్కటి పరిష్కారం. వైద్య నిపుణుల సలహా తీసుకున్న తర్వాతే ఈ ఆసనాన్ని ప్రయత్నించాలి.

నిటారుగా తాడాసన స్థితిలో నిలబడాలి.
శ్వాస నిదానంగా తీసుకుంటూ రెండు కాళ్ల మధ్యలో మూడు అడుగుల దూరం ఉండేలా ఎడంగా జరపాలి. చేతులు రెండూ భుజాలకు సమాంతరంగా ఎత్తి అరచేతులు నేలను చూస్తున్నట్టుగా ఉంచాలి.
కుడి పాదాన్ని 90 డిగ్రీలు కుడి పక్కకు తిప్పి, ఎడమపాదాన్ని కాస్త లోనికి జరపాలి. పిక్కలు, మోకాళ్లు కాస్త టైట్‌ చేయాలి.
ఇప్పుడు గాలి వదులుతూ శరీరాన్ని కుడివైపునకు వంచాలి. కుడిచేతితో కుడికాలి చీలమండను పట్టుకోవాలి. తర్వాత ఎడమ చేతిని గాలిలోకి పైకి లేపాలి. ఈ సమయంలో కుడి, ఎడమ చేతులు రెండూ సమాంతరంగా ఉండేలా జాగ్రత్త పడాలి. ఎడమ అరచేయి ముందుకు చూస్తున్న స్థితిలో ఉంచాలి.
ఎడమ అరచేయి బొటన వేలిని చూసే విధంగా తలను కాస్త పైకి తిప్పాలి. మెడ నొప్పి అనిపిస్తే తలను వెన్నెముకకు సమాంతరంగా ఉంచొచ్చు.
ఈ ఆసనంలో 20 నుంచి 30 సెకన్లు ఉండాలి. సాధారణ స్థాయిలో శ్వాస తీసుకుంటూ వదలాలి.
ఇదే విధంగా ఎడమ చేతితో ఎడమ కాలి చీలమండను పట్టుకొని, కుడిచేతిని పైకి పెట్టి, కుడి బొటన వేలిని చూస్తూ 20 నుంచి 30 సెకన్లు ఉండాలి.
త్రికోణాసనం వల్ల మెడనొప్పి, వెన్నునొప్పి నుంచి ఉపశమనం లభిస్తుంది. వెన్నెముక కింది భాగం శక్తిమంతం అవుతుంది.
వికారం, వాంతులు వస్తున్నట్టు అనిపిస్తే ఈ ఆసనం ప్రయత్నించొద్దు. అధిక రక్తపోటు ఉన్నవాళ్లు, ఊబకాయం ఉన్నవాళ్లు కూడా ఈ ఆసనం వేయొద్దు.

షరతులు వర్తిస్తాయి

కండ్ల్లు తిరుగుతున్నట్టుగా ఉన్నప్పుడు ఈ ఆసనం వేయకూడదు. పొట్టలో అసౌకర్యంగా ఉన్నా.. వ్జైనా నుంచి రక్తస్రావం అవుతున్నా ఆపేయాలి.