Pregnant | లేటు వ‌య‌స్సులో గ‌ర్భం దాల్చాల‌ని చూస్తున్న మ‌హిళ‌లు త‌ప్ప‌నిస‌రిగా తెలుసుకోవాల్సిన విష‌యాలు ఇవే..

ప్రస్తుతం దేశంలో ఉన్నత విద్య, ఉద్యోగ అవకాశాలు, ఆర్థిక స్వావలంబన, ఆలస్య వివాహాలు వంటి కారణాల వల్ల చాలా మంది మహిళలు 30 ఏళ్ల తర్వాత గర్భం దాల్చాలని నిర్ణయించుకుంటున్నారు. ఆధునిక వైద్య సదుపాయాలు అందుబాటులో ఉన్నప్పటికీ, వయస్సు పెరుగుతున్న కొద్దీ సంతానోత్పత్తి సామర్థ్యంలో సహజంగానే మార్పులు వస్తాయని నిపుణులు చెబుతున్నారు.

Pregnant | ప్రస్తుతం దేశంలో ఉన్నత విద్య, ఉద్యోగ అవకాశాలు, ఆర్థిక స్వావలంబన, ఆలస్య వివాహాలు వంటి కారణాల వల్ల చాలా మంది మహిళలు 30 ఏళ్ల తర్వాత గర్భం దాల్చాలని నిర్ణయించుకుంటున్నారు. ఆధునిక వైద్య సదుపాయాలు అందుబాటులో ఉన్నప్పటికీ, వయస్సు పెరుగుతున్న కొద్దీ సంతానోత్పత్తి సామర్థ్యంలో సహజంగానే మార్పులు వస్తాయని నిపుణులు చెబుతున్నారు. అందుకే ఆలస్యంగా మాతృత్వాన్ని ఎంచుకునే మహిళలు ముందుగానే సరైన అవగాహనతో నిర్ణయం తీసుకోవడం అవసరమని సూచిస్తున్నారు. మహిళ జన్మించినప్పుడే ఆమె జీవితాంతం ఉండే అండాల సంఖ్య నిర్ణయం అవుతుంది. వయస్సు పెరిగే కొద్దీ ఈ అండాల సంఖ్య మాత్రమే కాదు, వాటి నాణ్యత కూడా క్రమంగా తగ్గుతుంది. సాధారణంగా 20 ఏళ్ల ప్రారంభంలో ఉన్న మహిళలకు ప్రతి నెల గర్భం దాల్చే అవకాశం 25 నుంచి 30 శాతం వరకు ఉంటుంది. అయితే 30 ఏళ్ల తర్వాత ఈ సామర్థ్యం తగ్గడం ప్రారంభమవుతుంది. 35 ఏళ్లు దాటిన తర్వాత ఈ తగ్గుదల మరింత వేగంగా ఉంటుంది. 40 ఏళ్ల వయస్సులో ప్రతి నెల గర్భం దాల్చే అవకాశం సుమారు 5 శాతానికి మాత్రమే పరిమితమవుతుంది. ఆరోగ్యకరమైన గర్భధారణ, శిశువు జననం విషయంలో వయస్సును అత్యంత కీలకమైన అంశంగా పరిగణిస్తారు.

వ‌య‌స్సుతో త‌గ్గే సంతాన సామ‌ర్థ్యం..

చాలామంది ఐవీఎఫ్‌ చికిత్స ద్వారా వయస్సు ప్రభావాన్ని పూర్తిగా అధిగమించవచ్చని భావిస్తుంటారు. అయితే ఇది పూర్తిగా నిజం కాదని నిపుణులు చెబుతున్నారు. 30 నుంచి 34 ఏళ్ల మహిళల్లో ఒక పూర్తి ఐవీఎఫ్‌ చికిత్స చక్రంలో సజీవ శిశువు జన్మించే అవకాశం సుమారు 43 శాతం ఉంటుంది. ఇది 35 నుంచి 39 ఏళ్ల మధ్య 31 శాతానికి తగ్గిపోతుంది. 40 నుంచి 44 ఏళ్ల మధ్య ఈ అవకాశం కేవలం 11 శాతానికి మాత్రమే పరిమితమవుతుంది. ఐవీఎఫ్‌ ఒక సమర్థవంతమైన చికిత్స అయినప్పటికీ, వయస్సు వల్ల కలిగే జీవసంబంధ మార్పులను పూర్తిగా అధిగమించలేదని నిపుణులు స్పష్టం చేస్తున్నారు. 35 ఏళ్ల తర్వాత గర్భం దాల్చిన మహిళల్లో గర్భస్రావం, గర్భధారణ సమయంలో మధుమేహం, సిజేరియన్‌ ప్రసవం అవసరమయ్యే అవకాశాలు, శిశువులో క్రోమోజోమ్‌ సంబంధిత లోపాలు వంటి సమస్యల ప్రమాదం పెరిగే అవకాశం ఉంటుంది. అయినప్పటికీ 30 ఏళ్లు దాటిన తర్వాత కూడా ఎంతోమంది మహిళలు ఆరోగ్యవంతమైన శిశువులకు జన్మనిస్తున్నారని నిపుణులు గుర్తుచేస్తున్నారు. సరైన వైద్య పర్యవేక్షణ, ఆరోగ్యకరమైన జీవనశైలి, ముందస్తు జాగ్రత్తలు తీసుకుంటే మంచి ఫలితాలు సాధ్యమవుతాయని చెబుతున్నారు.

నిపుణుల‌ను సంప్రదించాలి..

మాతృత్వాన్ని వాయిదా వేయాలని భావిస్తున్న మహిళలు ముందుగా గైనకాలజిస్టును సంప్రదించి అండాల నిల్వ (ఎగ్‌ రిజర్వ్‌) పరీక్ష చేయించుకోవడం మంచిదని సూచిస్తున్నారు. కుటుంబంలో సంతానోత్పత్తి లేదా జన్యుపరమైన సమస్యల చరిత్ర ఉందో లేదో తెలుసుకోవడం కూడా అవసరం. వీలైతే 35 ఏళ్లకు ముందే ఎగ్‌ ఫ్రీజింగ్‌ గురించి ఆలోచించవచ్చని, ఎందుకంటే అండాల నాణ్యత భవిష్యత్తులో గర్భధారణ అవకాశాలపై కీలక ప్రభావం చూపుతుందని చెబుతున్నారు. అలాగే సంతానోత్పత్తి విషయంలో మహిళల వయస్సు మాత్రమే కాదు, పురుషుల వయస్సు కూడా ప్రభావం చూపుతుందని నిపుణులు పేర్కొంటున్నారు. ముఖ్యంగా 45 ఏళ్ల తర్వాత పురుషుల్లో వీర్యకణాల నాణ్యత తగ్గే అవకాశం ఉండటంతో గర్భస్రావం, శిశువులో ఎదుగుదల సంబంధిత సమస్యల ప్రమాదం పెరుగుతుంది. కాబట్టి మాతృత్వాన్ని ఆలస్యం చేయడం తప్పు కాదు. అయితే శాస్త్రీయ వాస్తవాలను తెలుసుకుని, సరైన వైద్య సలహాలతో ఆ నిర్ణయం తీసుకోవడం అత్యంత ముఖ్యమని నిపుణులు సూచిస్తున్నారు.