కేశాల విటమిన్‌

శీతకాలం జుట్టుకు కష్టకాలమే. పొడిగాలుల వల్ల చుండ్రు దాడి చేస్తుంది. దీంతోపాటు అనేక కారణాల వల్ల చలికాలంలో జుట్టు రాలిపోతుంది.

శీతకాలం జుట్టుకు కష్టకాలమే. పొడిగాలుల వల్ల చుండ్రు దాడి చేస్తుంది. దీంతోపాటు అనేక కారణాల వల్ల చలికాలంలో జుట్టు రాలిపోతుంది. ఈ సమస్యకు విటమిన్‌-ఇ అడ్డుకట్ట వేసి తీరుతుందని చెబుతున్నారు ఆరోగ్య నిపుణులు. విటిమిన్‌-ఇలో పుష్కలంగా ఉండే యాంటీఆక్సిడెంట్స్‌ వల్ల జుట్టు కుదుళ్లు దృఢంగా ఉంటాయి. కణాలు దెబ్బతినకుండా, మళ్లీ వెంట్రుకలు పెరగడంలో లోపం లేకుండా చూస్తాయి.

వయసుతో పాటే కేశాలు బలహీనపడటంలో ఫ్రీ రాడికల్స్‌, ఆక్సిడేటివ్‌ స్ట్రెస్‌ పాత్ర కీలకం. విటమిన్‌-ఇ లోని యాంటీఆక్సిడెంట్స్‌ వీటిని అదుపు చేస్తాయి. పాలిష్‌ పట్టని బియ్యం, బొప్పాయి, పాలకూర, బాదంపప్పు.. లాంటి ఆహార పదార్థాల్లో విటమిన్‌-ఇ పుష్కలంగా లభిస్తుంది. విటమిన్‌-ఇ జోడించిన షాంపూ, కండిషనర్‌, తలనూనెలను వాడటం వల్ల కూడా ఉపయోగం ఉంటుంది. సప్లిమెంట్ల రూపంలో ఈ విటమిన్‌ను తీసుకోవాలనుకుంటే మాత్రం తప్పనిసరిగా వైద్యులను సంప్రదించాలి.