Visit:
Palm Oil | వంటల్లో విస్తృతంగా ఉపయోగించే నూనెల్లో పామాయిల్ కూడా ఒకటి. ప్యాకేజ్డ్ ఆహార పదార్థాల్లోనూ ఇది ఎక్కువగా కనిపిస్తుంది. అయితే ఇందులో సంతృప్త కొవ్వులు అధికంగా ఉండటంతో దీన్ని ఎంత మోతాదులో తీసుకోవాలి, ఎలాంటి సందర్భాల్లో జాగ్రత్తగా ఉండాలి అనే సందేహాలు చాలామందిలో ఉన్నాయి. పామాయిల్ ఆరోగ్యంపై చూపించే ప్రభావం దాని రకం, తయారీ విధానం, తీసుకునే పరిమాణం, మొత్తం ఆహారపు అలవాట్లపై ఆధారపడి ఉంటుందని నిపుణులు చెబుతున్నారు. పామాయిల్ను ఆయిల్ పామ్ చెట్టు పండ్ల నుంచి తీస్తారు. ఇందులో ట్రైగ్లిజరైడ్లు, సంతృప్త, అసంతృప్త కొవ్వు ఆమ్లాలు ఉంటాయి. ముఖ్యంగా పాల్మిటిక్ యాసిడ్తోపాటు ఒలియిక్ యాసిడ్, లినోలిక్ యాసిడ్, విటమిన్-ఇ, కెరోటినాయిడ్లు కూడా ఇందులో ఉంటాయి. పామాయిల్లో ఉండే యాంటీఆక్సిడెంట్లు దాని ఆరోగ్య ప్రభావాలను కొంతవరకు సమతుల్యం చేస్తాయని పరిశోధనలు సూచిస్తున్నాయి. అయితే దీన్ని ఎంత మోతాదులో, ఏ రూపంలో తీసుకుంటున్నారనేదే ముఖ్యమని నిపుణులు చెబుతున్నారు.
పామాయిల్లో ప్రధానంగా మూడు రకాలున్నాయి. ముడి లేదా ఎర్ర పామాయిల్లో కెరోటినాయిడ్లు, విటమిన్-ఇ సమ్మేళనాలు అధికంగా ఉంటాయి. శుద్ధి చేసిన పామాయిల్ను వంట నూనెగా, అనేక ఆహార ఉత్పత్తుల్లో ఉపయోగిస్తారు. అయితే శుద్ధి ప్రక్రియలో కెరోటినాయిడ్ల స్థాయి తగ్గుతుంది. ఇక పామ్ కెర్నల్ ఆయిల్ను పామ్ పండు విత్తనం నుంచి తీస్తారు. ఇందులోని కొవ్వు ఆమ్లాల నిర్మాణం సాధారణ పామాయిల్తో పోలిస్తే భిన్నంగా ఉంటుంది. భారతీయ ఆహార కూర్పు పట్టిక ప్రకారం 100 గ్రాముల పామాయిల్లో సుమారు 884 కేలరీలు, 100 గ్రాముల మొత్తం కొవ్వు ఉంటాయి. ఇందులో 49 నుంచి 50 గ్రాముల సంతృప్త కొవ్వులు, 37 నుంచి 40 గ్రాముల ఏక అసంతృప్త కొవ్వులు, 9 నుంచి 11 గ్రాముల బహుళ అసంతృప్త కొవ్వులు ఉంటాయి. ఇందులో కొలెస్ట్రాల్ ఉండదు. పామాయిల్లో కొలెస్ట్రాల్ లేకపోయినప్పటికీ, అదే నూనెను పదేపదే వేడి చేసి ఉపయోగించడం వల్ల దాని ఆరోగ్య ప్రభావం మారే అవకాశం ఉంటుంది. ముఖ్యంగా శుద్ధి చేసిన పామాయిల్ను దీర్ఘకాలం అధికంగా తీసుకోవడం జీర్ణవ్యవస్థపై ప్రభావం చూపే అవకాశం ఉందని నిపుణులు పేర్కొంటున్నారు.
పామాయిల్లో కొన్ని ప్రయోజనకరమైన పోషకాలు కూడా ఉన్నాయి. టోకోట్రయీనాల్స్, టోకోఫెరాల్స్ వంటి యాంటీఆక్సిడెంట్లు ఆక్సీకరణ ఒత్తిడిని తగ్గించడంలో సహాయపడతాయి. ఎర్ర పామాయిల్లో కెరోటినాయిడ్లు ఉండటం వల్ల విటమిన్-ఎ కూడా లభిస్తుంది. పరిమిత మోతాదులో తీసుకున్నప్పుడు సంతృప్త కొవ్వులతోపాటు ఏక అసంతృప్త కొవ్వులు కూడా అందుతాయి. పామాయిల్లోని టోకోట్రయీనాల్స్ మెదడుకు కొంత రక్షణ అందించే అవకాశం ఉందని కొన్ని పరిశోధనలు సూచిస్తున్నాయి. అయితే పామాయిల్ గుండె ఆరోగ్యంపై చూపే ప్రభావానికి సంబంధించి పరిశోధనల్లో స్పష్టమైన ఏకాభిప్రాయం లేదు. ముఖ్యంగా శుద్ధి చేసిన పామాయిల్ ఉన్న ప్యాకేజ్డ్, అత్యంత శుద్ధి చేసిన ఆహార పదార్థాలను ఎక్కువ కాలం తీసుకుంటే కొలెస్ట్రాల్ స్థాయిలు పెరిగే అవకాశం ఉంటుంది. అందువల్ల అధిక కొలెస్ట్రాల్ ఉన్నవారు, గుండె జబ్బుల ముప్పు ఎక్కువగా ఉన్నవారు పామాయిల్ తీసుకునే విషయంలో మరింత జాగ్రత్తగా ఉండాలి. పామాయిల్ను అధికంగా తీసుకోవడం వల్ల శరీరంలో సంతృప్త కొవ్వుల మోతాదు పెరిగి చెడు కొలెస్ట్రాల్ స్థాయిలు పెరిగే అవకాశం ఉంటుంది. ఎక్కువ మొత్తంలో తీసుకుంటే బరువు పెరిగే అవకాశమూ ఉంటుంది. ఒకే నూనెను పదేపదే వేడి చేయడం వల్ల దాని ఆరోగ్య ప్రభావం మారుతుంది. పామాయిల్ వల్ల అలర్జీ రావడం చాలా అరుదైనప్పటికీ, కొంతమందిలో అలాంటి ప్రతిచర్యలు సంభవించే అవకాశం ఉంటుంది.
ప్రపంచ ఆరోగ్య సంస్థ సూచనల ప్రకారం రోజువారీ మొత్తం కేలరీల్లో సంతృప్త కొవ్వుల వాటా 10 శాతానికి లోపే ఉండేలా చూసుకోవాలి. అందువల్ల పామాయిల్ను పూర్తిగా మానేయడం కంటే పరిమితంగా తీసుకోవడం మంచిదని నిపుణులు సూచిస్తున్నారు. రోజువారీ ఆహారంలో బాదం, అక్రోటు, విత్తనాలు వంటి వాటితో పాటు అసంతృప్త కొవ్వులు అధికంగా ఉండే వంట నూనెలను సమతుల్యంగా ఉపయోగించడం ప్రయోజనకరంగా ఉంటుంది. ఉపయోగించిన నూనెను మళ్లీ మళ్లీ వేడి చేసి వాడకుండా ఉండటం చాలా ముఖ్యం. అలాగే పామాయిల్ అధికంగా ఉండే అత్యంత శుద్ధి చేసిన ప్యాకేజ్డ్ ఆహార పదార్థాలను పరిమితం చేయాలి. ఇంట్లో వంట నూనెలను కూడా ఒకే రకానికి పరిమితం కాకుండా, సమతుల్య ఆహార విధానంలో భాగంగా తగిన మార్పులతో ఉపయోగించవచ్చు. పామాయిల్ను ఒకే మాటలో ఆరోగ్యానికి హానికరమైనదిగా లేదా పూర్తిగా ఆరోగ్యకరమైనదిగా చెప్పలేం. దాని రకం, తయారీ విధానం, తీసుకునే పరిమాణం, నూనెను ఎలా ఉపయోగిస్తున్నారనే అంశాలే ఆరోగ్యంపై దాని ప్రభావాన్ని నిర్ణయిస్తాయి. ముఖ్యంగా అధిక కొలెస్ట్రాల్ లేదా గుండె జబ్బుల ముప్పు ఉన్నవారు పామాయిల్ వినియోగాన్ని పరిమితం చేయడం, మొత్తం ఆహారంలో సంతృప్త కొవ్వుల మోతాదును నియంత్రించడం మంచిదని నిపుణులు సూచిస్తున్నారు.
