Visit:
Iodine | మ‌న శరీరంలో అనేక ర‌కాల విధుల‌ను నిర్వ‌హించేందుకు ప‌లు ర‌కాల పోష‌కాలు అవసరం అవుతాయి. పోష‌కాలు అధికంగా ఉండే ఆహారాల‌ను తింటేనే మ‌నం ఆరోగ్యంగా ఉంటాం. ఒక్కో పోష‌క ప‌దార్థం అనేక ర‌కాల ప‌నులు చేస్తుంది. వాటిల్లో అయోడిన్ కూడా ఒక‌టి. అయోడిన్ అంటే కేవ‌లం థైరాయిడ్ కోస‌మేన‌ని చాలా మంది అనుకుంటారు. కానీ అయోడిన్ వ‌ల్ల మ‌న‌కు ఇంకా అనేక లాభాలు క‌లుగుతాయి. ఒక‌ప్పుడు భార‌తీయుల్లో అయోడిన్ లోపం అధికంగా ఉంటుంద‌న్న కార‌ణంగా ఉప్పులో దీన్ని క‌లిపి అందించ‌డం మొద‌లు పెట్టారు. అలా ప్ర‌స్తుతం మ‌నం అయోడైజ్డ్ ఉప్పును వాడుతున్నాం. అయిన‌ప్ప‌టికీ ఇంకా చాలా మంది ఈ స‌మ‌స్య‌తో బాధ‌ప‌డుతున్నారు. అయితే కేవ‌లం అయోడైజ్డ్ సాల్ట్‌ను తీసుకోవ‌డం మాత్ర‌మే కాదు, అయోడిన్ మ‌న‌కు ఇంకా అనేక ఇత‌ర ఆహారాల ద్వారా కూడా ల‌భిస్తుంది.
అయోడిన్ మ‌న శ‌రీరానికి అవసరం అయ్యే మిన‌ర‌ల్స్‌లో ఒక‌టి. ఇది సూక్ష్మ పోష‌క ప‌దార్థం. క‌నుక మ‌న శ‌రీరానికి ఇది చాలా స్వ‌ల్ప మోతాదులో అవసరం అవుతుంది. అయోడిన్ ఉన్న ఆహారాల‌ను రోజూ తింటుంటే మ‌న‌కు అనేక లాభాలు క‌లుగుతాయి. థైరాయిడ్ గ్రంథి ఆరోగ్యంగా ఉండేందుకు, ఆ గ్రంథి స‌రిగ్గా ప‌నిచేసేందుకు గాను అయోడిన్ ఉప‌యోగ‌ప‌డుతుంది. గ‌ర్భ‌స్థ శిశువు నాడీ మండ‌ల వ్య‌వ‌స్థ నిర్మాణానికి, చిన్నారులు స‌రైన ఎత్తు, బరువు ఉండేందుకు, స్త్రీల‌లో వ‌క్షోజాల సంబంధిత సమస్యలు రాకుండా ఉండేందుకు అయోడిన్ దోహ‌దం చేస్తుంది. అలాగే బ్యాక్టీరియా, వైర‌స్‌ల నుంచి మ‌న శ‌రీరానికి అయోడిన్ ర‌క్ష‌ణ క‌ల్పిస్తుంది. క‌నుక అయోడిన్ ఉండే ఆహారాల‌ను మ‌నం రోజూ తినాల్సి ఉంటుంది.
అప్పుడే పుట్టిన చిన్నారుల నుంచి 6 నెలల వయస్సు ఉన్న శిశువుల‌కు రోజుకు 110 మైక్రోగ్రాముల అయోడిన్ అవసరం. అలాగే 7 నుంచి 12 నెలల మధ్య వయస్సున్న వారికి 130 మైక్రోగ్రాములు, 1 నుంచి 8 ఏళ్ల వయస్సు వారికి 90 మైక్రోగ్రాములు, 9 నుంచి 13 ఏళ్ల వారికి 120 మైక్రోగ్రాములు, 14 ఏళ్లు అంతకన్నా పైబడిన వారికి 150 మైక్రోగ్రాములు, గర్భిణీలకు నిత్యం 220 మైక్రోగ్రాములు, పాలిచ్చే తల్లుల‌కు రోజుకు 290 మైక్రోగ్రాముల అయోడిన్ అవసరం అవుతుంది. ఇక అయోడిన్ లోపిస్తే మ‌న శరీరంలో ప‌లు ల‌క్ష‌ణాలు, సంకేతాలు క‌నిపిస్తాయి. శరీరంలో అయోడిన్ లోపిస్తే మెడ దగ్గర వాపు కనిపిస్తుంది. థైరాయిడ్ గ్రంథి వాపునకు గురై టచ్‌ చేస్తే నొప్పి అనిపిస్తుంది. శ్వాస తీసుకోవడంలో, నిద్రించడంలో ఇబ్బందులు వస్తాయి. మింగడం కష్టమవుతుంది. తీవ్రమైన అలసట ఉంటుంది. సాధారణ ఉష్ణోగ్రత ఉన్నప్పటికీ బాగా చలిగా ఉన్నట్లు అనిపిస్తుంది. వెంట్రుకలు రాలిపోతుంటాయి. డిప్రెషన్‌ వస్తుంది. అధికంగా బరువు పెరుగుతారు. ఇవ‌న్నీ అయోడిన్ లోపం ఉంద‌ని తెలిపే ల‌క్ష‌ణాలు.
అయోడిన్ లోపం త‌గ్గాలంటే డాక్ట‌ర్ అందుకు మందుల‌ను ఇస్తారు. వాటిని క్ర‌మం త‌ప్ప‌కుండా వాడాల్సి ఉంటుంది. అలాగే ఆహారంలో అయోడైజ్డ్ ఉప్పును తినాలి. అదేవిధంగా క్రాన్‌ బెర్రీలు, ఆలుగడ్డలు, స్ట్రాబెర్రీలు, మొక్కజొన్న, ప్రూన్స్‌, అరటి పండ్లు, బీన్స్‌, పాలకూర, కొబ్బరినూనె, బ్రొకొలి, హిమాలయన్‌ సాల్ట్‌, సోంపు గింజల ఆకు, సముద్రపు ఉప్పు, సముద్రపు చేపలు, పెరుగు, కోడిగుడ్లు, టర్కీ మాంసం, చికెన్ వంటి ఆహారాల‌ను తింటుంటే అయోడిన్ ల‌భిస్తుంది. దీని వ‌ల్ల అయోడిన్ లోపం నుంచి బ‌య‌ట ప‌డ‌వ‌చ్చు. ఆయా అనారోగ్య సమస్యలు కూడా త‌గ్గుతాయి. ఆరోగ్యంగా ఉంటారు.
