White Discharge | మ‌హిళ‌ల్లో క‌నిపించే వైట్ డిశ్చార్జ్ వంటి స‌మ‌స్య‌ల‌కు కార‌ణాలేంటి.. ఇవి హానిక‌ర‌మా..?

మహిళల్లో యోని నుంచి తెల్లని లేదా ఇతర రకాల స్రావాలు రావడం సాధారణమైన శారీరక ప్రక్రియలో భాగమేనని ఆరోగ్య నిపుణులు చెబుతున్నారు. అయితే దీనిని చాలామంది మహిళలు అనారోగ్యానికి సంకేతంగా భావించి ఆందోళన చెందుతుంటారు. వాస్తవానికి రుతుచక్రంలో హార్మోన్ల స్థాయిల్లో వచ్చే మార్పుల కారణంగా గర్భాశయ ముఖద్వారం నుంచి విడుదలయ్యే శ్లేష్మం పరిమాణం, రంగు, స్వభావంలో మార్పులు చోటుచేసుకుంటాయి.

White Discharge | మహిళల్లో యోని నుంచి తెల్లని లేదా ఇతర రకాల స్రావాలు రావడం సాధారణమైన శారీరక ప్రక్రియలో భాగమేనని ఆరోగ్య నిపుణులు చెబుతున్నారు. అయితే దీనిని చాలామంది మహిళలు అనారోగ్యానికి సంకేతంగా భావించి ఆందోళన చెందుతుంటారు. వాస్తవానికి రుతుచక్రంలో హార్మోన్ల స్థాయిల్లో వచ్చే మార్పుల కారణంగా గర్భాశయ ముఖద్వారం నుంచి విడుదలయ్యే శ్లేష్మం పరిమాణం, రంగు, స్వభావంలో మార్పులు చోటుచేసుకుంటాయి. ఈ మార్పులను గమనించడం ద్వారా మహిళలు తమ శరీరంలో జరుగుతున్న సహజ మార్పులను మరింతగా అర్థం చేసుకోవచ్చని నిపుణులు సూచిస్తున్నారు.

ఈస్ట్రోజెన్ స్థాయిలు త‌క్కువ‌గా ఉంటే..

రుతుచక్రం ప్రారంభ దశలో యోని పొడిగా అనిపిస్తుంది లేదా శ్లేష్మం చాలా తక్కువగా ఉంటుంది. ఈ సమయంలో ఈస్ట్రోజెన్ స్థాయిలు తక్కువగా ఉండడంతో గర్భాశయ ముఖద్వారం మూసి ఉంటుంది. ఆ తర్వాత ఈస్ట్రోజెన్ స్థాయులు పెరగడం ప్రారంభించినప్పుడు స్రావం మందంగా, జిగటగా మారుతుంది. అనంతరం లోషన్‌లా క్రీమీలాంటి స్రావం కనిపిస్తుంది. మరికొంత సమయం తర్వాత అది మరింత తడిగా, జారుడుగా మారుతుంది. సాధారణంగా అండోత్సర్గానికి ముందు ఈస్ట్రోజెన్ స్థాయిలు అత్యధికంగా ఉన్నప్పుడు స్రావం పారదర్శకంగా, సాగే స్వభావంతో పచ్చి గుడ్డులోని తెల్లసొనలా కనిపిస్తుంద‌ని నిపుణులు వివరిస్తున్నారు.

రుతుచ‌క్రాన్ని బ‌ట్టి మారుతుంది..

సాధారణంగా 28 రోజుల రుతుచక్రం ఉన్న మహిళల్లో 11 నుంచి 15వ రోజుల మధ్య పారదర్శకంగా, సాగే స్వభావం కలిగిన గర్భాశయ ముఖద్వార శ్లేష్మం కనిపించే అవకాశం ఉంటుంది. అయితే ప్రతి మహిళలో సమయం ఒకేలా ఉండదు. ఈ రకమైన శ్లేష్మం స్త్రీ పునరుత్పత్తి మార్గంలో శుక్రకణాలు ఐదు రోజుల వరకు జీవించేందుకు సహాయపడుతుంది. అండోత్సర్గం తర్వాత అండం సాధారణంగా 12 నుంచి 24 గంటల వరకు అందుబాటులో ఉంటుంది. అనంతరం ఒకటి రెండు రోజుల్లో ప్రొజెస్టెరాన్ స్థాయిలు పెరగడంతో స్రావం మళ్లీ మందంగా మారుతుంది లేదా తగ్గిపోతుంది.

నిర్ల‌క్ష్యం చేయొద్దు..

అయితే ప్రతి రకమైన యోని స్రావాన్ని సాధారణంగా భావించి నిర్లక్ష్యం చేయకూడదని నిపుణులు సూచిస్తున్నారు. దుర్వాసన, దురద, మంటతో కూడిన స్రావం లేదా సాధారణంగా కనిపించే విధానంలో అకస్మాత్తుగా మార్పు ఉంటే వైద్యుల సలహా తీసుకోవాలి. గర్భధారణను ప్లాన్ చేయని మహిళలు కూడా తమ గర్భాశయ ముఖద్వార శ్లేష్మంలో వచ్చే మార్పులను గమనించవచ్చు. ప్రతి మహిళలో స్రావం పరిమాణం భిన్నంగా ఉంటుంది. అయితే పారదర్శకంగా, సాగే గుడ్డులోని తెల్లసొనలాంటి స్రావం ఎప్పుడూ కనిపించకపోవడంతోపాటు రుతుక్రమం కూడా క్రమం తప్పితే వైద్యుడిని సంప్రదించి కారణాలను తెలుసుకోవడం మంచిదని నిపుణులు సూచిస్తున్నారు.