Sweets | పండుగ‌ల స‌మ‌యంలో స్వీట్లు, ఇత‌ర ఆహారాల‌ను అధికంగా తినొద్దంటే.. ఇలా చేయాలి..

పండుగ సమయంలో కుటుంబ సభ్యులు, స్నేహితులతో విందులు, వేడుకలు, రాత్రి వేళ పార్టీలతో సందడి నెలకొంటుంది. ఈ సందర్భంగా రకరకాల పిండి వంటలు, స్వీట్లు, చిరుతిళ్లు అందుబాటులో ఉండడంతో చాలామంది తమ ఆహార నియమాలను, వ్యాయామ అలవాట్లను పక్కనపెట్టి ఎక్కువగా తింటుంటారు.

Sweets | పండుగ సమయంలో కుటుంబ సభ్యులు, స్నేహితులతో విందులు, వేడుకలు, రాత్రి వేళ పార్టీలతో సందడి నెలకొంటుంది. ఈ సందర్భంగా రకరకాల పిండి వంటలు, స్వీట్లు, చిరుతిళ్లు అందుబాటులో ఉండడంతో చాలామంది తమ ఆహార నియమాలను, వ్యాయామ అలవాట్లను పక్కనపెట్టి ఎక్కువగా తింటుంటారు. అయితే పండుగను ఆనందిస్తూనే ఆరోగ్యాన్ని కూడా కాపాడుకోవచ్చని పోషకాహార నిపుణులు సూచిస్తున్నారు. వరుసగా విందులకు హాజరవుతున్నప్పటికీ ఆహార నియమాలు పాటించేందుకు కొన్ని సులభమైన చిట్కాలను వెల్లడించారు.

ఖాళీ క‌డుపుతో ఉండ‌కూడ‌దు..

విందుకు వెళ్లే ముందు ఖాళీ కడుపుతో ఉండకూడదని, ఇంటి నుంచే తగినంత ప్రొటీన్లు, పీచు పదార్థాలు ఉన్న ఆహారం తీసుకోవాలని సూచిస్తున్నారు. పెసరపప్పుతో చేసిన అట్లు, పెరుగు లేదా గుడ్డులోని తెల్లసొనతో బ్రెడ్‌ వంటి పదార్థాలు తీసుకోవచ్చ‌ని సూచిస్తున్నారు. ఇలా చేయడం వల్ల రక్తంలో చక్కెర స్థాయిలు స్థిరంగా ఉండడంతోపాటు విందులో అతిగా తినకుండా ఉండవచ్చని చెబుతున్నారు. మద్యం సేవించే అలవాటు ఉన్నవారు ప్రతి పానీయం తర్వాత ఒక గ్లాసు నీటిని నిమ్మరసం కలిపి తాగాలని సూచిస్తున్నారు. దీనివల్ల శరీరంలో నీటి లోపం ఏర్పడకుండా చూసుకోవచ్చని పేర్కొంటున్నారు.

పేగుల క‌ద‌లిక‌ల‌ను మెరుగుపరిచే ఆహారం..

రాత్రి పడుకునే ముందు నానబెట్టిన మెంతులు లేదా నీటిలో కలిపిన ఇసబ్గోల్ తీసుకోవచ్చని పోషకాహార నిపుణులు సూచిస్తున్నారు. ఇసబ్గోల్ పేగుల కదలికలు సజావుగా సాగేందుకు సహాయపడుతుందని, మెంతులు ఇన్సులిన్‌ స్పందనను మెరుగుపరచడంలో తోడ్పడతాయ‌ని చెబుతున్నారు. అయితే వీటిని తీసుకునే ముందు వ్యక్తిగత ఆరోగ్య పరిస్థితులను పరిగణనలోకి తీసుకోవడం అవసరం. పండుగ రోజున ఎక్కువగా తిన్నామని మరుసటి రోజు ఆహారం మానేయడం లేదా ఆకలితో ఉండడం సరైన పద్ధతి కాదని స్పష్టం చేస్తున్నారు.

ప్రోటీన్లు, ఫైబ‌ర్ ముఖ్యం..

ఉదయం నిద్రలేవగానే తగినంత నీరు తాగి, ఆ తర్వాత ప్రొటీన్లు, పీచు పదార్థాలు సమృద్ధిగా ఉన్న అల్పాహారం తీసుకోవాలని సూచిస్తున్నారు. శరీరానికి అవసరమైన పోషకాలు అందితే రోజంతా శక్తి నిలకడగా ఉంటుందని చెబుతున్నారు. పండుగ సమయంలో ప్రతి ఆహార పదార్థంలోని కేలరీలను లెక్కించుకోవడం కంటే వాటి నాణ్యత, తయారీలో ఉపయోగించే పదార్థాలపై దృష్టి పెట్టడం మంచిదని పేర్కొంటున్నారు. రోజంతా తగినంత నీరు తాగడం, వ్యాయామాన్ని కొనసాగించడం ద్వారా ఉబ్బరం వంటి సమస్యలను తగ్గించుకోవచ్చని సూచిస్తున్నారు.