Depression : క్రీడలతో పిల్లల్లో డిప్రెషన్‌కు చెక్‌.. మాంట్రియల్ పరిశోధన

Depression : చిన్నారుల్లో ఆందోళన, విచారం పోగొట్టేందుకు వారిని క్రీడలు, ఇతర యాక్టివిటీల వైపు మళ్లించాలి. తల్లిదండ్రులు తమ చిన్నారులను...

September 28, 2021 / 01:21 PM IST

Depression : క్రీడలతో పిల్లల్లో డిప్రెషన్‌కు చెక్‌.. మాంట్రియల్ పరిశోధన

(Depression) చిన్నారుల్లో ఆందోళన, విచారం పోగొట్టేందుకు వారిని క్రీడలు, ఇతర యాక్టివిటీల వైపు మళ్లించాలి. తల్లిదండ్రులు తమ చిన్నారులను ఆ విధంగా ప్రోత్సహించాలి. కౌమార దశలో చురుకుగా ఉండే చిన్నారులు చాలా తక్కువ భావోద్వేగానికి గురవుతారు. కెనడాకు చెందిన మాంట్రియల్‌ యూనివర్శిటీ పరిశోధకులు ఈ విషయాన్ని తేల్చారు.

మానసిక ఆరోగ్యంపై పిల్లల శారీరక శ్రమ ప్రభావం కనిపించిందని మాంట్రియల్‌ విశ్వవిద్యాలయానికి చెందిన పరిశోధకుడు మరియా జోస్‌ చెప్పారు. దీని కోసం 5 నుంచి 12 ఏండ్ల వయసు గల బాలురు, బాలికలపై పరిశోధన చేపట్టారు. శారీరక శ్రమ గురించి ఈ పిల్లలతోపాటు వారి తల్లిదండ్రులను కూడా ప్రశ్నించారు. 5 సంవత్సరాల వయస్సులో క్రీడా కార్యక్రమాల్లో పాల్గొనని పిల్లలు.. త్వరగా అలసిపోతున్నట్లు వెల్లడించారు. వీరిలో అరవడం, భయంగా చూడటం వంటి లక్షణాలు కూడా కనిపించాయి. 12 సంవత్సరాల వయస్సులో కూడా శారీరకంగా చురుగ్గా లేని పిల్లల్లో డిప్రెషన్, ఆందోళన కేసులు ఎక్కువగా కనిపించినట్లు పరిశోధన నివేదికలో పేర్కొన్నారు. అయితే, బాలికల్లో పెద్ద మార్పులేవీ కనిపించలేదు.

తమ చుట్టూ ఉండే వాతావరణం చిన్నారులపై ఎలాంటి ప్రభావం చూపుతుందో తెలియజేయడమే తమ పరిశోధన ముఖ్యోద్దేశమని పరిశోధకులు తెలిపారు. తల్లిదండ్రుల చదువుతోపాటు వారి ఆదాయం కూడా వారిని ప్రభావితం చేస్తుందని వెల్లడించారు. పాఠశాలకు వెళ్లే ముందు కూడా తేలికపాటి శారీరక శ్రమ చేసే అబ్బాయిలు.. స్కూల్‌లో తోటి విద్యార్థులతో కలిసి పనిచేయడం, తమను తాము నియంత్రించుకోవడం, ఇతరులతో మంచి సంబంధాలను పెంచుకునే సామర్థ్యాన్ని పెంపొందించుకుంటారని తేల్చారు.

డిప్రెషన్‌, విశ్రాంతి తీసుకోకపోవడం వంటి అంశాల విషయంలో బాలురు, బాలికల మధ్య వ్యత్యాసం ఉన్నదని పరిశోధకులు తెలిపారు. అబ్బాయిల్లో డిప్రెషన్‌ కారణంగా సమాజం నుంచి దూరమవుతారు. ఇదే సమయంలో అమ్మాయిలు డిప్రెషన్‌, విశ్రాంతి లేనప్పుడు వారు స్నేహితుల సాయం తీసుకుని వారితో విషయాలు పంచుకొంటారు. ఫలితంగా డిప్రెషన్‌ అనేది చాలా తక్కువగా ఉంటుంది. అలాగే, అమ్మాయిలు అబ్బాయిల కంటే భావోద్వేగాలను బాగా నియంత్రించుకుంటారని పరిశోధకులు తెలిపారు.